Winston, rakont nou en pti pe lo ki mannyer ou’n rod Bondye.

Mon’n grandi lo en laferm Queensland, Lostrali e nou fanmir pa ti relizye. Vi ki nou ti reste ase lwen, mon ti napa bokou kontakt avek lezot apard ki mon fanmir pros. Depi ler mon ti annan 12 an mon ti konmans rod Bondye. Mon ti priy Bondye e demann li pour ed mwan aprann konn laverite lo li. Pli tar mon ti kit laferm e al travay Adelaide, Sid Lostrali. A laz 21 an, mon ti zwenn Pam ler mon ti dan vakans Sydney. I ti dir mwan konsernan en group relizye ki apel British-Israel. Zot krwar ki bann dimoun sorti Grannbretanny i desandans sa ki dimoun i apel sa dis tribi perdi Izrael ki ti al an egzil wityenm syek avan Kris. Alor ler mon ti retourn Adelaide, mon ti koz lo sa size avek enn mon koleg travay ki ti’n konmans etidye Labib avek bann Temwen Zeova. Mon ti koz avek li pour zis enn de erdtan. Nou ti koz plis lo sa ki bann Temwen i krwar ladan. Apre nou konversasyon, mon ti realize ki lapriyer ki mon ti’n fer ler mon ti zenn ti pe ganny reponn. Mon ti pe aprann laverite lo mon Kreater ek son Rwayonm! Mon ti’n trouv sa “perl ki annan en gran valer.”​—Mat. 13:45, 46.

Pam, ou osi ou ti konmans rod sa perl depi byen zenn. Ki mannyer ou ti trouv li?

Mon’n grandi dan lavil Coffs Harbour, New South Wales e nou fanmir ti vreman relizye. Mon paran ek granparan ti krwar dan bann lansennyman sa group British-Israel. Mwan, mon pti frer, mon gran ser ek lezot kouzen ek kouzin ti ganny elve pour krwar ki Bondye i prefer bann dimoun ki desandans Angle. Me selman, mon pa ti dakor avek sa bann lansennyman e mon pa ti santi mwan pros avek Bondye. Ler mon ti annan 14 an,  mon ti vizit diferan legliz kot mon ti reste, sa ti enkli legliz Anglikan, Baptist ek legliz bann Advantis. Me zot pa ti ed mwan pour aprann konn Bondye.

Pli tar, mon fanmir ti al reste Sydney kot mon ti zwenn Winston ki ti dan vakans. Parey Winston in dir, nou bann diskisyon lo Bondye ti pous li pour konmans etidye Labib avek bann Temwen Zeova. Apre sa, tou son bann let ki i ti ekri mwan ti zis ranpli avek bann verse Labib! Mon bezwen admet ki o konmansman sa ti fatig mwan e menm fer mwan ankoler. Me avek letan, mon ti rekonnet ki sa ki i ti pe ekri ti laverite lo Bondye.

An 1962, mon ti al reste lavil Adelaide pour mwan kapab pli pros avek Winston. I ti’n fer laranzman pour mwan reste kot en koup Temwen ki ti apel Thomas ek Janice Sloman. Zot ti’n servi konman misyonner Papua New Guinea. Sa letan mon ti annan zis 18 an. Zot ti vreman zantiy anver mwan e ed mwan pour aprann konn plis lo Zeova. Alor mwan osi mon ti konmans etidye Labib e mon ti konvenki ki mon ti’n trouv laverite. Apre ki nou ti’n marye nou de Winston, deswit nou ti konmans en lavi satisfezan dan servis Zeova. Menm si nou’n bezwen fer fas avek plizyer difikilte dan nou lavi, nou servis in ed nou pour pli apresye sa perl ki nou’n trouve ki annan en gran valer.

Winston, rakont nou en pti pe lo ou bann premye lannen dan servis Zeova.

Pa bokou letan apre ki nou de Pam ti’n marye, Zeova ti konmans donn nou bann responsabilite spesyal dan son servis. (1 Kor. 16:9) Frer Jack Porter ti pe servi konman sirveyan rezyonal pour nou pti kongregasyon e i ti ed nou pour vwar sa premye responsabilite spesyal ki nou ti kapab annan dan servis Zeova. (Ozordi, nou de Frer Porter pe servi lo Komite Biro Brans Australasia.) Jack ek son madanm Roslyn ti ankouraz nou pour pran servis pionye e nou ti fer sa pour senk an. Ler mon ti annan 29 an, nou de Pam nou ti ganny demande pour fer travay sirveyan rezyonal dan South Pacific Islands, ki ti tonm anba biro brans Fiji. Nou ti vizit sa bann zil swivan, American Samoa, Samoa, Kiribati, Nauru, Niue, Tokelau, Tonga, Tuvalu ek Vanuatu.

Sa letan, dimoun ki ti reste lo bann zil pli lwen ti mefye Temwen Zeova, alor nou ti bezwen pridan. (Mat. 10:16) I ti napa bokou frer ek ser dan bann kongregasyon e serten pa ti kapab donn nou landrwa reste. Alor nou ti demann bann dimoun dan vilaz si nou ti kapab reste avek zot e zot ti toultan zantiy anver nou.

Winston, ou annan en gran lentere dan travay tradiksyon. Kwa ki’n fer ou santi koumsa?

Sa letan, bann frer ek ser lo zil Tonga ti annan zis detrwa trak ek pti liv dan langaz Tongan, en langaz Polinezi. Dan predikasyon, zot ti etidye avek bann dimoun an servan sa liv The Truth That Leads to Eternal Life an Angle. Alor, pandan en lekol ansyen ki ti dire pour kat semenn, trwa ansyen ki ti sorti dan sa landrwa ti dakor pour tradwir sa liv The Truth That Leads to Eternal Life dan langaz Tongan menm si zot pa ti tro konpran Angle. Pam ti tip zot tradiksyon e nou ti anvoy li kot biro Leta-z-ini pour ganny enprimen. Sa proze ti pran apepre wit semenn pour konplete. Menm si sa tradiksyon pa ti tro tro bon, sa piblikasyon ti ed en kantite dimoun ki koz langaz Tongan pour aprann laverite. Nou de Pam nou pa bann tradikter, me sa leksperyans ti fer nou enterese dan sa travay.

Pam, ki mannyer lavi lo bann zil ti diferan avek lavi Lostrali?

I ti annan en gran diferans! Dan serten landrwa, i ti annan en ta moustik, i ti fer so e imid, i ti annan lera, nou ti malad e parfwa, nou ti menm napa ase manze. De lot kote, a lafen sak zour, ler nou ti kot nou, nou  ti abitye get lanmer e nou ti santi nou anpe. Nou ti reste dan en lakaz tradisyonnel (ki apel fale dan langaz Samoan) ki ti parey en pti kyosk, kouver avek zerb sek, san okenn miray. Par ler, lalin ti sitan kler aswar ki nou ti menm kapab vwar bann pye koko e nou ti vwar refleksyon lalin lo lanmer. Bann moman koumsa ti pous nou pour medite, priye e konsantre lo sa ki byen olye sa ki mal.

Nou ti kontan bann zanfan. I ti toultan gou avek zot e zot ti anvi konn plis sirtou ler zot ti vwar bann etranze blan. En zour ler nou ti pe vizit zil Niue, en pti garson ti frot lebra Winston e dir, “Mon kontan ou bann pwal.” Aparaman, i pa ti’n zanmen vwar sa kantite plim lo lebra en dimoun e i pa ti konnen ki mannyer pour dekri li.

I ti fer lapenn pour vwar fason viv bann dimoun parski zot ti mizer. Zot ti pe reste lo bann zoli zil me zot ti napa bon swen medikal ek delo prop pour bwar. Me selman, nou bann frer ek ser pa ti paret enkyet. Sa ti normal pour zot. Zot ti kontan pour annan zot fanmir, en landrwa pour ador Zeova e lefet ki zot ti annan sa privilez pour loue Li. Zot legzanp ti ed nou pour konsantre lo sa ki pli enportan e pour gard nou lavi senp.

Pam, par ler ou ti bezwen al sers delo e kwi manze dan en lanvironnman konpletman diferan. Ki mannyer ou ti kapab fer li?

Granmersi mon papa ti’n montre mwan bokou keksoz. Par egzanp ki mannyer pour alim dife deor pour kwi manze lo la e pour viv avek sa ki nou annan. En fwa ler nou ti vizit zil Kiribati, nou ti reste dan en pti lakaz ki ti kouver avek zerb sek, son miray ti’n ganny fer avek banbou e ater ti’n ganny fer avek koray ki ti’n ganny kraze e aplatir. Pour kwi en pti repa, mon ti fouy en trou ater kot mon ti alim dife avek labour koko. Pour ganny delo, mon ti bezwen al met laliny kot en pwi ansanm avek lezot madanm dan sa vilaz. Pour tir delo, nou ti servi en baton ki ti apepre 2 met longer ki ti annan en lakord fen lo bout. I ti en pe parey en fishing rod. Me olye met en lanmson lo bout sa lakord, zot ti met en bwat dile. Sakenn son tour, bann madanm ti balans zot lakord, vir zot lanmen dan en fason pour ki sa bwat i tonm lo kote e ranpli avek delo. Mon ti krwar i senp mwan, ziska ler i ti mon tour. Mon ti balans mon lakord plizyer fwa me sa bwat ti zis tonm lo delo e flote. Apre ki tou dimoun ti’n aret riye, enn bann madanm ti ofer pour ed mwan. Zot ti toultan zantiy e pare pour ede.

Zot tou le de zot ti kontan pour servi lo bann zil. Eski zot kapab rakont nou bann leksperyans spesyal?

Winston: I ti pran nou en pe letan pour aprann serten koutim. Par egzanp, ler bann frer ek ser ti prepar en repa pour nou, laplipar ditan zot ti donn nou tou manze ki zot ti annan. Premye kou, nou pa ti konnen ki nou ti sipoze kit en pe pour zot. Alor nou ti manz tou sa ki zot ti met devan nou! Byensir, ler nou ti konnen ki se tou manze ki zot ti annan, nou ti kit en pe pour zot. Malgre bann pti fot ki nou ti fer, bann frer ek ser ti konpran nou. An plis, zot ti eksite pour vwar nou apepre tou le sis mwan ler nou ti vizit zot pour semenn spesyal. Apard ki bann frer ek ser dan sa landrwa, nou ti sel Temwen ki zot ti vwar sa letan.

Ler nou ti vizit zot, sa ti osi en bon temwannyaz. En kantite dimoun dan bann vilaz ti krwar ki bann frer ek ser ti’n envant sa larelizyon. Alor, ler en paster ek son madanm ki sorti aletranze ti vizit bann frer ek ser, bann dimoun dan vilaz ti vwar ki i en vre larelizyon ki enterese avek kanmarad e sa ti enpresyonn zot.

Pam: Enn mon bann pli zoli leksperyans, i ler nou ti lo zil Kiribati, kot i ti annan en pti kongregasyon avek zis detrwa frer ek ser. I ti annan en sel ansyen ki apel Itinikai Matera e i ti fer son mye pour pran swen avek nou. En zour, i ti traverse avek en pannyen e  ladan i ti annan zis en dizef poul. I ti dir, “Sa pour zot.” Sa letan, dizef poul ti rar. Menm si i pa ti bokou, i ti vreman zenere e sa ti tous nou leker.

Detrwa lannen pli tar Pam, ou ti perdi ou pti baba avan i ne. Kwa ki ti ed ou fer fas avek sa sityasyon?

Mon ti tonm ansent an 1973 ler nou de Winston ti pe servi South Pacific. Nou ti deside retourn Lostrali me kat mwan pli tar nou ti perdi nou pti baba. Winston osi ti vreman sagren. Apre tou, i ti osi son pti baba. Sa douler dan mon leker ti diminyen en ptigin avek letan me i pa ti zanmen al net ziska ler nou ti ganny sa Latour Veyer le 1 Avril 2009. Sa Kestyon lekter ti demande: “Eski en pti baba ki mor avan ki i ne pou ganny resisite?” Sa lartik ti ed nou pour annan konfyans ki tou keksoz i dan lanmen Zeova ki toultan fer sa ki byen. I pou fer laranzman pour tir sa kantite soufrans ki nou’n eksperyanse akoz sa lavi dan sa move lemonn, anmezir ki i diriz son Garson pour ‘detri bann travay dyab.’ (1 Zan 3:8) Sa lartik ti osi ed nou pour pli apresye sa zoli “perl” ki nou annan konman pep Zeova. Ki lespwar nou ti pou annan san Rwayonm!

Apre ki nou ti’n perdi nou pti baba, nou ti repran servis a plen tan. Nou ti servi dan Betel Lostrali pour detrwa mwan e apre nou ti rekonmans fer travay sirveyan rezyonal. Nou ti servi pour kat-r-an dan lakanpanny New South Wales ek Sydney. Apre, an 1981 nou ti ganny demande pour servi dan biro brans Lostrali e nou ankor pe servi laba. Ozordi i apel biro brans Australasia.

Winston, eski ou leksperyans South Pacific Islands pe ed ou dan ou travay konman en manm Komite Biro Brans Australasia?

Wi, dan plizyer fason. Premyerman, Lostrali ti ganny demande pour okip travay ki pe ganny fer American Samoa ek Samoa. Apre sa, biro brans Nouvel Zelann ti zwenn avek Lostrali. Ozordi, biro brans Australasia i responsab pour Lostrali, American Samoa ek Samoa, Cook Islands, Nouvel Zelann, Niue, Timor-Leste, Tokelau ek Tonga. Mon’n ganny sa privilez pour vizit plizyer sa bann pei konman reprezantan biro brans. Vi ki mon’n travay avek sa bann frer ek ser fidel lo bann zil, sa in ed mwan pour servi zot dan en lot fason la ki mon pe travay kot biro brans.

Pour fini, mon ti a kontan dir ki pour plizyer lannen nou de Pam nou’n realize ki pa zis bann adilt ki pe rod Bondye. Bann zenn osi i anvi sa “perl ki annan en gran valer” menm si zot fanmir pa enterese. Nou’n aprann sa atraver nou prop leksperyans. (2 Rwa. 5:2, 3; 2 Kron. 34:1-3) Nou kapab asire ki Zeova i en Bondye lanmour ki oule ki zenn konman aze i ganny lavi!

Senkant an pase, ler nou de Pam nou ti konmans rod Bondye, nou pa ti konnen ki tousala pou arive. Sirman laverite lo Rwayonm i en perl ki annan en gran valer! Nou determinen pour tyonbo sa zoli perl avek tou nou lafors!