Pyer fek tann konsey Zezi konsernan ki mannyer pour regle bann problenm ant bann frer ek ser. Par kont, i paret ki Pyer i anvi konnen konbyen fwa i devret fer sa zefor pour regle problenm.

Pyer i demande: “Senyer, konbyen fwa mon frer i kapab fer pese kont mwan e mon devret pardonn li? Set fwa?” Serten sef relizye i dir ki en dimoun i devret pardonn son kanmarad trwa fwa. Alor Pyer i kapab mazinen ki i vreman byen si i pardonn son frer “set fwa.”​—Matye 18:21.

Par kont, konte konbyen fwa en dimoun in ofans ou pa an armoni avek lansennyman Zezi. Alor i koriz Pyer: “Mon dir ou, pa zis set fwa, me 77 fwa.” (Matye 18:22) Andotmo, nou devret touzour pardonnen. I pa devret annan okenn limit lo lakantite fwa ki Pyer i pardonn son frer.

Apre sa, Zezi i donn Pyer ek lezot en legzanp pour montre ki i en lobligasyon pour pardonn lezot. I koz lo en lesklav ki pa montre menm konpasyon ki son met in demontre. Sa lerwa i anvi ki son bann lesklav i pey zot det. Zot anmenn en lesklav ki annan en gro det. I dwa lerwa 10,000 talan [60 milyon denye]. Napa okenn fason ki i kapab pey sa det. Alor sa lerwa i donn lord ki sa lesklav, son madanm ek son bann zanfan i ganny vann pour pey son det. Ler sa lesklav i tann sa, i tonm azenou devan son met e sipliy li: “Donn mwan ankor en pe letan e mon pou pey ou tou sa ki mon dwa ou.”​—Matye 18:26.

Ler sa lerwa i vwar sa, son leker i fermal e son konpasyon i pous li pour kennsel sa gro det ki son lesklav i dwa li. Dek ki sa lerwa in fer sa, sa lesklav i ale e zwenn en lot lesklav ki dwa li 100 denye. I graponn sa lot lesklav e konmans trangle li. I dir: “Pey mwan tou sa ki ou dwa mwan.” Me sa lesklav i tonm azenou devan li e sipliy  li: “Donn mwan ankor en pe letan e mon pou pey ou sa ki mon dwa ou.” (Matye 18:28, 29) Par kont, sa lesklav ki lerwa fek pardonnen pa fer parey lerwa. I fer sa lesklav ki dwa li bokou mwens ganny met dan prizon ziska ki i pey sa ki i dwa.

Apre Zezi i rakonte ki lezot lesklav ki vwar sa ki’n arive i ale e raport avek zot met. Sa lerwa i ankoler ki sa lesklav pa’n montre konpasyon e i kriy sa lesklav e dir li: “Move lesklav, mon ti kennsel tou ou det ler ou ti sipliy mwan. Pa ou ti’n devret pran pitye pour ou kanmarad parey mon ti pran pitye pour ou?” Sa lerwa ki byen ankoler i livre sa lesklav ki napa konpasyon avek gard prizonnyen ziska ki i pey tou sa ki i dwa. Zezi i fini par dir: “Se koumsanmenm ki mon Papa dan lesyel pou fer avek zot si zot pa pardonn zot frer avek tou zot leker.”​—Matye 18:32-35.

Pa sa i ansenny nou en zoli leson konsernan pardonn lezot! Bondye in pardonn nou bann pese ki parey en gro det. Alor, nenport keksoz ki en frer i fer kont nou pa sitan grav. Deplis, Zeova pa pardonn nou zis en fwa me plizyer milye fwa. Pa nou kapab pardonn nou frer oubyen ser plizyer fwa menm si i’n vreman ofans nou? Parey Zezi ti ansennyen dan Sermon lo Montanny, Bondye pou “pardonn nou nou bann pese parey nou’n osi pardonn bann ki’n ofans nou.”​—Matye 6:12.