Bann Zwif i vin kot Zezi vi ki i ankor dan zanmirant Zerizalenm. Serten i anvi aprann avek li e lezot i anvi teste li. En dimoun ki konn byen Lalwa, i demann Zezi sa kestyon: “Ansenyan, ki mon bezwen fer pour ganny lavi eternel?”​—Lik 10:25.

Zezi i remarke ki sa zonm pa pe zis demann en kestyon. I kapab ki i pe esey fer Zezi reponn dan en fason ki pou ofans bann Zwif. I realize ki sa zonm i deza annan son prop pwennvi. Alor avek lasazes, i demann sa zonm pour dir sa ki li i panse.

Zezi i demande: “Kwa ki’n ganny ekrir dan Lalwa? Ki ou konpran?” Sa zonm in etidye Lalwa Bondye alor son larepons i baze lo la. I sit Deterononm 6:5 ek Levitik 19:18: “‘Ou devret kontan Zeova ou Bondye avek tou ou leker, avek tou ou nanm, avek tou ou lafors e avek tou ou lespri’ e ‘ou devret kontan ou prosen parey ou kontan ou prop lekor.’” (Lik 10:26, 27) Eski son larepons i bon?

Zezi i dir sa zonm: “Ou’n byen reponn, kontinyen fer sa e ou a ganny lavi.” Eski sa konversasyon i fini lanmenm? Sa zonm pa zis anvi en larepons pour son kestyon, plito i anvi ‘montre ki i en zonm drwat.’ I anvi ki Zezi i dir li ki i annan en bon pwennvi e ki i annan rezon tret lezot parey i pe fer. Alor i demande: “Lekel vreman ki mon prosen?” (Lik 10:28, 29) Sa kestyon i paret senp, me anfet i ase profon. Akoz?

Bann Zwif i krwar ki sa mo “prosen” i aplik zis avek bann ki swiv bann tradisyon Zwif e i kapab paret ki Levitik 19:18 i siport sa pwennvi. Anfet, en Zwif i menm kapab dir ki “i kont lalwa” pour frekant en dimoun ki pa Zwif. (Akt 10:28) Alor sa zonm e petet menm serten disip Zezi i krwar ki zot pe fer sa ki byen ler zot tret lezot Zwif avek labonte. Me zot kapab tret bann ki pa Zwif dan en move fason parski zot pa vreman zot “prosen.”

Ki mannyer Zezi i kapab koriz sa fason panse san ki i ofans sa zonm ek lezot Zwif? I konmans par rakont zot en zistwar: “En zonm ti pe desann Zeriko sorti Zerizalenm. Dan semen bann voler ti atak li, depouy li, bat li, kit li demi mor e ale. Par azar, en pret ti pe desann dan sa menm semen, me ler i ti vwar li i ti sanz kote semen. En Levit ti osi pas dan sa menm landrwa e ler i ti vwar li i ti sanz kote semen. Me ler en Samariten ki ti pe pas dan sa semen ti vwar li, son leker ti fermal.”​—Lik 10:30-33.

Sa zonm ki Zezi pe rakont sa zistwar i konnen ki bokou pret ek Levit ki ede dan tanp i reste Zeriko. Pour retourn se zot sorti Zerizalenm, zot bezwen mars apepre 23 kilomet. Sa semen ki desann Zeriko i kapab danzere akoz i annan bann voler ki kasyet tou dilon semen pour atak dimoun. Si en pret ek en Levit i vwar en lot Zwif ki dan problenm, pa zot devret ed li? Dan sa zistwar, Zezi i dir ki zot pa ti ed sa dimoun. Me se en Samariten, en zonm ki sorti dan en nasyon ki bann Zwif pa ti kontan ki ed sa Zwif.​—Zan 8:48.

Ki mannyer sa Samariten ti ed sa Zwif ki ti’n ganny blese? Zezi i dir: “I ti vin kot li, vid delwil ek diven lo son bann blesir e bann zot. Apre sa, i ti met li lo son prop bourik e anmenn li dan en pti lotel e pran swen avek li. Lannmen i ti pran de denye, i ti donn propriyeter sa pti lotel e dir: ‘Pran swen avek li e sa ki ou depanse an plis, mon ava pey ou ler mon retournen.’”​—Lik 10:34, 35.

 Apre ki Zezi sa Gran Ansenyan in fini rakont sa zistwar, i demann sa zonm en kestyon pour fer li reflesir: “Lekel parmi sa trwa ki’n azir konman prosen sa zonm ki ti ganny atake par bann voler?” Petet sa zonm pa santi li konfortab pour dir: “Sa Samariten,” alor i dir: “Sa enn ki’n pran pitye pour sa zonm.” Apre Zezi i met lanfaz lo sa leson byen kler dan sa zistwar par dir li, “ale e fer parey ou osi.”​—Lik 10:36, 37.

Pa sa i en bon fason ansennyen! Si Zezi ti’n zis dir sa zonm ki bann ki pa Zwif osi i son prosen, eski sa zonm ek lezot Zwif ki ti pe ekout li ti pou’n aksepte sa? I tre probab ki non. Par kont, Zezi ti servi en zistwar senp avek bann detay ki sa bann dimoun ti konn byen pour reponn sa kestyon “Lekel vreman ki mon prosen?” En bon prosen i sa dimoun ki demontre lanmour ek labonte parey Labib i demann nou pour fer.