LESON 09
Vin pros avek Bondye atraver lapriyer
Eski ou’n deza santi ki ou bezwen gidans dan lavi? Ou annan serten kestyon enportan ki ou ti a kontan ganny reponn? Eski ou bezwen ganny rekonforte oubyen ankouraze? Ou ti a kontan santi ou pli pros avek Zeova? Lapriyer i kapab ed ou konble tou sa bann bezwen. Me ki mannyer nou devret priye? Eski Bondye i ekout tou lapriyer? Ki ou kapab fer pour asire ki Bondye i ekout ou lapriyer? Annou vwar.
1. Avek ki nou devret priye e lo kwa nou devret priye?
Zezi in ansenny nou pour priy zis avek nou Papa ki dan lesyel. Zezi li menm ti priy avek Zeova. I ti dir: “Me zot, la ki mannyer zot devret priye: ‘Nou Papa ki dan lesyel . . .’” (Matye 6:9) Ler nou priy avek Zeova, nou pe fer nou lanmitye avek li vin pli for.
Nou kapab koz avek li lo preski tou keksoz. Byensir, pour Bondye reponn nou lapriyer, i pou bezwen an armoni avek son lavolonte. “Nenport kwa ki nou demann [Bondye] ki an armoni avek son lavolonte, i pou ekout nou.” (1 Zan 5:14) Zezi ti donn nou serten legzanp bann keksoz ki apropriye pour priy lo la. (Lir Matye 6:9-13.) Apard ki zis priy konsernan nou bann keksoz personnel, nou devret remersye Bondye pour tou sa ki i’n fer pour nou e demann li osi pour ed lezot.
2. Ki mannyer nou devret priye?
Labib i ankouraz nou pour “devid [nou] leker avek [Bondye].” (Psonm 62:8) Alors nou lapriyer i devret senser e sorti dan nou leker. Nou kapab priy aotvwa oubyen avwabas e dan nenport pozisyon ki respektab. Nou kapab priy nenport ki ler e nenport ki landrwa kot nou ete.
3. Ki mannyer Bondye i reponn nou lapriyer?
I fer li dan diferan fason. Zeova in donn nou son Parol Labib e souvandfwa nou trouv larepons nou bann kestyon ladan. Lir Labib i kapab “fer sa enn ki napa leksperyans vin saz.” (Psonm 19:7; lir Zak 1:5.) I kapab donn nou lape lespri ler nou fer fas avek difikilte. I osi kapab pous son bann serviter pour ed nou ler nou vreman dan bezwen.
AL PLI O PROFON
Vwar ki mannyer ou kapab priy dan en fason ki fer plezir Bondye e ki mannyer lapriyer i kapab benefisye ou.
4. Lapriyer ki akseptab pour Bondye
Kwa ki fer nou lapriyer akseptab pour Bondye? Zwe sa VIDEO.
Zeova i anvi nou priy avek li. Lir Psonm 65:2 e apre reponn sa bann kestyon:
-
Eski ou krwar ki “sa Enn ki ekout lapriyer” i anvi ou priy avek li? Akoz ou dir sa?
Nou bezwen esey viv annakor avek standar Bondye si nou anvi i ekout nou lapriyer. Lir Mika 3:4 ek 1 Pyer 3:12 e apre reponn sa kestyon:
-
Ki mannyer nou kapab fer sir ki Zeova i ekout nou lapriyer?
Dan en lager, tou le de kote i kapab pe priye pour ganny laviktwar. Eski i fer sans pour ekspekte Bondye reponn lapriyer tou le de kote?
5. Nou lapriyer i devret sorti dan nou leker
Serten dimoun i ganny ansennyen pour resit serten lapriyer mo pour mo. Koumsa ki Bondye i anvi nou koz avek li? Lir Matye 6:7 e apre reponn sa kestyon:
-
Ki mannyer ou kapab evite “repet menm zafer” dan ou lapriyer?
Sak zour, reflesi lo en benediksyon ki ou gannyen dan ou lavi e remersi Zeova pour sa. Si ou fer sa toulezour pour en semenn, ou pou’n priy lo set diferan topik san ki ou bezwen repet menm keksoz.
En bon Papa i anvi son zanfan i dir li sa ki i annan dan son leker. Zeova osi i anvi ou dir li sa ki dan ou leker
6. Lapriyer i en kado sorti kot Bondye
Ki mannyer lapriyer i kapab donn nou lafors, dan botan konman dan move tan? Zwe sa VIDEO.
Labib i promet nou ki lapriyer i kapab ed nou pour trouv lape lespri. Lir Filipyen 4:6, 7 e apre reponn sa bann kestyon:
-
Kantmenm lapriyer pa toultan tir nou problenm, ki mannyer i kapab ede?
-
Ki serten keksoz ou ti a kontan priy lo la?
Eski ou ti konnen?
Sa mo “amenn” i vedir “ki sa i arive” oubyen “sirman.” Depi dan letan Labib, dimoun i dir “amenn” a lafen lapriyer.—1 Kronik 16:36.
7. Fer letan pour priye
Parfwa nou sitan okipe ki nou bliye pour nou fer lapriyer. Ki kantite enportan lapriyer ti ete pour Zezi? Lir Matye 14:23 ek Mark 1:35 e apre reponn sa bann kestyon:
-
Ki Zezi ti fer pour fer letan pour priye?
-
Kan ou kapab trouv letan pour priye?
SERTEN DIMOUN I DIR: “Lapriyer i zis en keksoz ki fer ou santi ou byen dan ou lespri.”
-
Ki ou annan pour dir lo la?
REZIMEN
Lapriyer senser i ed nou pour vin pli pros avek Bondye, i donn nou lape lespri e i donn nou sa lafors ki nou bezwen pour fer plezir Zeova.
Revizyon
-
Avek ki nou devret priye?
-
Ki mannyer nou devret priye?
-
Ki serten byenfe nou gannyen ler nou priye?
FER PLIS RESERS
Vwar larepons bann kestyon lo lapriyer ki souvan dimoun i demande.
“Set keksoz ki ou bezwen konnen lo lapriyer” (Latour Veyer 1 Novanm 2010)
Aprann akoz ou devret priye e ki mannyer ou kapab amelyor ou bann lapriyer.
Dapre Labib, gete avek lekel nou devret priye.
“Eski mon devret fer lapriyer avek bann sen?” (Lartik lo jw.org)
Dan sa video lanmizik, gete kote oubyen kan nou devret priye.
Ou pou kapab kontan sa osi
BANN KESTYON KI DIMOUN I SOUVAN DEMANDE LO TEMWEN ZEOVA
Ki sa letid Labib ki Temwen Zeova i ofer?
Ou kapab servi nenport tradiksyon Labib avek sa progranm Labib enteraktif gratwit ki Temwen Zeova i ofer. Santi ou alez pour envit ou fanmir antye oubyen nenport zanmi pour asiste ou letid.
