1, 2. (a) Eski ou vreman konn en dimoun popiler si ou konn zis son non? Eksplike. (b) Ki serten dimoun i krwar lo Zezi?

 I ANNAN en kantite dimoun popiler dan lemonn. Petet ou konn non serten sa bann dimoun, me sa pa vedir ki ou konn zot byen. Ou pa konn sak pti detay zot lavi oubyen ki kalite dimoun zot vreman ete.

² I tre probab ki ou’n tann koz lo Zezi, menm si i ti viv lo later apepre 2,000 an pase. Me laplipar dimoun pa vreman konnen ki kalite dimoun Zezi ti ete. Serten i dir ki i ti en bon dimoun, serten i dir ki i ti en profet, tandis ki lezot zot krwar ki i Bondye. Me ou, ki ou panse?​—Vwar Lezot lenformasyon nimero 12.

3. Akoz i enportan pour ou konn Zeova ek Zezi?

³ I enportan pour ou konn laverite lo Zezi. Akoz? Labib i dir nou: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.” (Zan 17:3) Si ou konn laverite lo Zeova ek Zezi, ou kapab viv dan en paradi lo later pour touzour. (Zan 14:6) Deplis, ler ou konn Zezi, sa pou ed ou parski lafason ki Zezi in viv son lavi e tret lezot i en bon legzanp pour ou. (Zan 13:34, 35) Dan Sapit 1, nou ti aprann laverite lo Bondye. Aprezan nou pou vwar ki Labib i vreman dir lo Zezi.

4. Ki sa de tit “Mesi” ek “Kris” i vedir?

⁴ Plizyer lannen avan ki Zezi ti ne, Zeova ti promet dan Labib ki i ti pou anvoy Mesi ouswa Kris. Sa mo “Mesi” i sorti dan langaz Ebre e sa mo “Kris” i sorti dan langaz Grek. Sa de tit i vedir sa enn ki Bondye in swazir, sa enn ki’n ganny apwente dan en pozisyon spesyal. Mesi pou fer tou bann promes Bondye vin vre. Zezi i osi kapab ed ou la konmela menm. Me avan ki Zezi ti ne, bokou dimoun ti pe demande, ‘Lekel ki pou vin sa Mesi?’

5. Eski bann disip ti krwar ki Zezi ti sa Mesi?

⁵ Bann disip Zezi ti napa okenn dout ki i ti sa Mesi ki ti’n ganny promet. (Zan 1:41) Par egzanp, Simon Pyer ti dir sa avek Zezi: “Ou menm Kris.” (Matye 16:16) Ki mannyer nou osi nou kapab asire ki Zezi i sa Mesi?

6. Ki mannyer Zeova ti ed bann dimoun senser pour konnen lekel Mesi?

⁶ Byen lontan avan Zezi ti ne, bann profet Bondye ti donn bokou detay ki ti pou ed dimoun konnen lekel Mesi. Ki mannyer sa bann detay ti pou ede? Be meton ou ti ganny demande pour al zwenn en dimoun ki ou pa konnen lasose kot i annan en ta dimoun. Si en dimoun ki konn li ti dekrir sa dimoun byen, ou ti pou kapab rekonnet li. Dan menm fason, Zeova ti servi son bann profet pour dir nou sa ki Mesi ti pou fer e osi sa ki ti pou arive avek li. Ler bann profesi ti ganny akonplir lo Zezi, sa in ed bann dimoun senser pour rekonnet ki Zezi i Mesi.

7. Mansyonn de profesi ki prouve ki Zezi i Mesi.

 ⁷ Annou vwar de profesi ki’n ganny akonplir lo Zezi. Premyerman, 700 an avan ki Zezi ti ne, profet Mika ti predir ki Mesi ti pou ne dan en pti lavil ki apel Betleenm. (Mika 5:2) Laba menm ki Zezi ti ne! (Matye 2:1, 3-9) Dezyenmman, profet Danyel ti predir ki Mesi ti pou aparet lannen 29. (Danyel 9:25) Sa i zis de parmi sa plizyer profesi ki montre klerman ki Zezi i sa Mesi ki ti’n ganny promet.​—Vwar Lezot lenformasyon nimero 13.

8, 9. Ki ti arive ler Zezi ti batize ki prouve ki i ti Mesi?

⁸ Zeova in fer li byen kler ki Zezi i Mesi. Bondye ti promet pour donn Zan ki batize en siny pour li konnen lekel Mesi. Zan ti vwar sa siny ler Zezi ti al kot li kot Larivyer Zourden lannen 29. Labib i dir nou ki ti arive: “Apre ki i ti’n ganny batize, desito Zezi ti sorti anba delo e la! lesyel ti ouver e i ti vwar lespri sen Bondye parey en kolonm, pe desann lo li. Osi, en lavwa sorti dan lesyel ti dir: ‘Sa i mon Garson ki mon kontan ki mon’n aprouve.’” (Matye 3:16, 17) Ler Zan ti vwar sa siny e tann sa parol, i ti konnen ki Zezi ti Mesi. (Zan 1:32-34) Sa zour, Zeova ti donn Zezi son lespri sen e i ti vin Mesi. I ti sa enn ki Bondye ti’n swazir pour vin Sef ek Lerwa.​—Izai 55:4.

 ⁹ Bann profesi Labib, ler Zeova ti koze e sa siny ki Bondye ti donnen ler Zezi ti batize i prouve ki Zezi i sa Mesi. Me kote Zezi ti sorti e ki kalite dimoun i ti ete? Annou vwar larepons dan Labib.

10. Ki Labib i dir nou konsernan Zezi avan i ti vin lo later?

¹⁰ Labib i dir ki Zezi ti viv dan lesyel pour en  kantite letan avan ki i ti vin lo later. Mika ti dir ki Mesi “ti la depi byen lontan.” (Mika 5:2, NWT) Plizyer fwa, Zezi li menm ti dir ki i ti viv dan lesyel avan ki i ti ne konman en imen. (Lir Zan 3:13; 6:38, 62; 17:4, 5.) Menm avan i ti vin lo later, Zezi ti annan en relasyon spesyal avek Zeova.

11. Akoz Zeova i vreman kontan Zezi?

¹¹ Zeova i vreman kontan Zezi. Akoz? Parski Bondye ti kree li avan tou lezot keksoz e avan tou dimoun. I pour sa rezon ki i ganny apele “premye ne tou kreasyon.” a (Kolosyen 1:15) Zeova i osi kontan Zezi en kantite parski zis Zezi ki Zeova ti kree direkteman. Sanmenm sa i ganny apele “sel Garson” Zeova. (Zan 3:16, not.) Zis Zezi tousel ki Zeova ti servi pour kree tou lezot keksoz. (Kolosyen 1:16) Apre osi, zis Zezi ki ganny apele “Parol” parski Zeova ti servi li pour pas son bann mesaz ek lenstriksyon avek bann lanz ek imen.​—Zan 1:14.

12. Ki mannyer nou konnen ki Zezi pa Bondye?

¹² Serten dimoun i krwar ki Zezi i Bondye. Me pa sa ki Labib i dir. Labib i dir ki Zezi ti ganny kree, ki vedir ki Zezi i annan en konmansman. Me Zeova napa en konmansman, li ki ti kree tou keksoz. (Psonm 90:2) Zezi, Garson Bondye pa’n zanmen mazinen pour vin Bondye. Labib i kler ler i dir ki Bondye i pli gran ki Zezi. (Lir Zan 14:28;  1 Korentyen 11:3) Zis Zeova ki ‘Bondye Tou Pwisan.’ (Zenez 17:1) Bondye i sa enn ki pli gran e pli pwisan dan liniver antye.​—Vwar Lezot lenformasyon nimero 14.

13. Akoz Labib i dir ki Zezi i “resanblans sa Bondye envizib”?

¹³ Zeova ek son Garson Zezi ti travay ansanm pandan plizyer bilyon lannen avan ki lesyel ek later ti ganny kree. I bezwen ki zot ti vreman kontan kanmarad! (Zan 3:35; 14:31) Zezi ti imit bann kalite son papa telman byen ki Labib i dir ki i “resanblans sa Bondye envizib.”​—Kolosyen 1:15.

14. Ki mannyer Garson Zeova ti kapab ne konman en imen?

¹⁴ Garson Zeova ti pare pour kit lesyel e ne lo later konman en imen. Ki mannyer sa ti posib? Atraver en mirak, Zeova ti transfer lavi son Garson ki ti dan lesyel, dan vant en vyerz ki ti apel Mari. Sanmenm sa Zezi pa ti bezwen en papa lo later. Alor Mari ti ganny en garson parfe e i ti apel li Zezi.​—Lik 1:30-35.

15. Ki mannyer ou kapab aprann plis lo Zeova?

¹⁵ Si ou lir Matye, Mark, Lik ek Zan, ou pou kapab aprann en kantite lo Zezi, son lavi ek son bann kalite. Sa kat liv Labib i ganny apele Levanzil. Deplis, vi ki Zezi i zis parey son Papa, sa ki ou lir pou osi ed ou pour aprann konn Zeova pli byen. Sanmenm sa Zezi ti kapab dir: “Sa ki’n vwar mwan, i’n vwar mon Papa osi.”​—Zan 14:9.

16. Ki Zezi ti ansennyen? Kote Zezi ti ganny son bann lansennyman?

¹⁶ Bokou dimoun ti kriy Zezi “Ansenyan.” (Zan  1:38; 13:13) Enn parmi bann keksoz pli enportan ki Zezi ti ansennyen ti “sa bon nouvel Rwayonm.” Kisisa sa Rwayonm? Sa i gouvernman Bondye dan lesyel ki pou diriz later antye e ki pou anmenn bokou benediksyon lo bann dimoun ki obei Bondye. (Matye 4:23) Tou sa ki Zezi ti ansennyen ti sorti kot Zeova. Zezi ti dir: “Sa ki mon ansennyen pa sorti kot mwan me kot sa enn ki’n anvoy mwan.” (Zan 7:16) Zezi ti konnen ki Zeova i anvi ki dimoun i tann sa bon nouvel ki Rwayonm Bondye pou diriz later.

17. Kote Zezi ti ansennyen? Akoz i ti travay sitan dir pour ansenny lezot?

¹⁷ Kote Zezi ti ansennyen? Partou kot i ti trouv dimoun. I ti ansenny dan lakanpanny, lavil, vilaz, bazar, landrwa kot dimoun ti ador Bondye e osi kot lakour dimoun. I pa ti ekspekte ki dimoun i vin kot li, me souvan li ki ti al kot zot. (Mark 6:56; Lik 19:5, 6) Zezi ti travay dir, i ti pas en kantite letan pe ansenny dimoun e i ti donn tou son lenerzi dan sa travay. Pour ki rezon? Parski i ti konnen ki Bondye ti anvi ki i fer sa travay e i ti toultan obei son Papa. (Zan 8:28, 29) Zezi ti osi anons mesaz Bondye parski i ti annan konpasyon pour bann dimoun. (Lir Matye 9:35, 36.) I ti kapab vwar ki bann sef relizye pa ti pe ansenny laverite lo Bondye ek son Rwayonm. Alor i ti anvi ed otan dimoun posib pour tann sa bon nouvel.

18. Kwa ki ou pli kontan dan Zezi?

¹⁸ Zezi ti en zonm ki ti kontan dimoun e i ti  enterese avek zot. I ti zantiy e i ti fasil pour koz avek li. Menm bann manrmay ti kontan pas letan avek li. (Mark 10:13-16) Zezi pa ti fer lapreferans. I pa ti kontan koripsyon ek lenzistis. (Matye 21:12, 13) I ti viv dan en lepok kot bann madanm ti napa bokou drwa e zot pa ti ganny trete avek respe. Me Zezi ti toultan tret bann madanm avek respe ek dinyite. (Zan 4:9, 27) Zezi ti vreman annan limilite. Par egzanp, en zour swar i ti lav lipye son bann zapot. Sa ti en louvraz ki ti souvan ganny fer par en serviter.​—Zan 13:2-5, 12-17.

19. Ki legzanp ki montre ki Zezi ti konnen kwa ki dimoun ti vreman bezwen e ki i ti anvi ed zot?

¹⁹ Zezi ti konnen kwa ki dimoun ti vreman bezwen e i ti anvi ed zot. Sa ti evidan ler i ti servi pwisans Bondye pour fer bann mirak e geri dimoun. (Matye 14:14) Par egzanp, en msye ki ti annan lalep ti vin kot Zezi e dir li: “Ou kapab fer mwan vin pir si ou oule.” Zezi ti santi douler ek soufrans sa msye. I ti pran lapenn pour li e i ti anvi ed li. Alor Zezi ti tous li e i ti dir li: “Mon oule ki ou vin pir, vin pir!” (Mark 1:40-42) Eski ou kapab mazinen ki mannyer sa msye ti santi?

20, 21. Akoz Zezi i sa pli bon legzanp lobeisans anver Bondye?

²⁰ Zezi i sa pli bon legzanp lobeisans anver Bondye. Nenport kwa ki ti arive avek li oubyen nenport kwa ki son bann lennmi ti fer li, i ti reste fidel avek son Papa. Par egzanp, Zezi pa ti fer pese ler Satan ti esey tant li. (Matye 4:1-11) Serten dan fanmir Zezi  pa ti krwar ki i ti Mesi e zot ti dir ki ‘i ti’n perdi latet,’ me Zezi ti kontinyen fer travay Bondye. (Mark 3:21) An plis ki sa, ler son bann lennmi ti persekit li, Zezi ti reste fidel avek Bondye e i pa ti zanmen esey fer zot ditor.​—1 Pyer 2:21-23.

²¹ Menm ler Zezi ti pe soufer dan en fason kriyel, i ti reste fidel avek Zeova ziska lanmor. (Lir Filipyen 2:8.) Zis mazinen ki kantite i ti bezwen pas atraver sa zour ki i ti mor. I ti ganny arete, bann fo temwen ti akiz li konmkwa i ti koz kont Bondye, bann ziz koronpi ti kondann li, dimoun ti boufonn li, bann solda ti tortir li e klout li lo poto. Ler i ti pe mor i ti dir:  “I’n ganny akonplir!” (Zan 19:30) Trwa zour apre ki Zezi ti’n mor, Zeova ti resisit li konman en lespri. (1 Pyer 3:18) Detrwa semenn pli tar, Zezi ti retourn dan lesyel, i ti “asiz lo kote drwat Bondye” e espere ziska ki Bondye i fer li vin Lerwa.​—Ebre 10:12, 13.

22. Ki loportinite nou annan aprezan vi ki Zezi ti reste fidel avek son Papa?

²² Ozordi, zis parey Zeova ti’n plàn, nou annan sa loportinite pour viv pour touzour dan en paradi lo later akoz Zezi ti reste fidel avek son Papa. Dan Sapit 5, nou pou vwar ki mannyer lanmor Zezi i fer li posib pour nou viv pour touzour.