GET sa bann portre. Sakenn i montre en fleo ki Zeova ti anmenn lo Lezip. Dan premye portre ou kapab vwar Aaron pe tap Larivyer Nil avek son baton. Kan i ti tap larivyer, delo ti vin disan. Bann pwason ti mor, e larivyer ti konmans pi.

Apre, Zeova ti fer bann grenwiy sorti dan Larivyer Nil. Zot partou—dan four, dan bann kastrol, lo lili bann dimoun—partou. Kan bann grenwiy ti mor bann Ezipsyen ti anmas zot e met zot dan bann gro ta, e sa pei ti pi avek zot.

Apre Aaron ti tap later avek son baton, e lapousyer ti vin bann moustik. Bann moustik ti trwazyenm fleo lo Lezip.

Larestan fleo ti fer ditor bann Ezipsyen selman, pa bann Izraelit. Katriyenm fleo ti bann gro mous ki ti anvol par ta partou dan lakaz bann Ezipsyen. Senkyenm fleo ti lo bann zannimo. En kantite bef, mouton ek kabri ki ti pou bann Ezipsyen ti mor.

Apre, Moiz ek Aaron ti pran enpe lasann e anvoy dan ler. Zot ti fer bann dimoun ek bann zannimo ganny bann klou lo zot. Sa ti sizyenm fleo.

Apre sa Moiz ti lev son lanmen ver lesyel, e Zeova ti anvoy loraz ek lagrel. I ti sa pli move lagrel ki Lezip ti’n deza gannyen.

Wityenm fleo ti bann sotrel. Zanmen oparavan e ni menm depi sa pa’n annan sa kantite sotrel. Zot ti manz tou keksoz ki lagrel pa ti’n detri.

Nevyenm fleo ti fernwanr. Pour trwa zour fernwanr epe ti kouver pei, me kot bann Izraelit ti reste ti annan lalimyer.

Finalman, Bondye ti demann son pep pour met disan en zenn kabri oubyen en zenn mouton lo lankadreman zot laport. Apre lanz Bondye ti pas parlao Lezip. Kan lanz ti vwar disan, i pa ti touy personn dan sa lakaz. Me dan bann lakaz ki ti napa disan lo lankadreman laport, lanz Bondye ti touy bann premye ne zonm ek bann zannimo. Sa ti dizyenm fleo.

Apre sa dernyen fleo, Faraon ti les bann Izraelit ale. Tou pep Bondye ti’n pare pour ale, e sa swar menm zot ti konmans sorti Lezip.