Laba Galile, Zezi ti zwenn son bann disip. I ti donn zot en lord enportan: ‘Al kot bann dimoun dan tou nasyon e fer zot vin mon disip. Ansenny sa bann dimoun tou sa ki mon’n ansenny zot e batiz zot.’ Apre i ti promet: ‘Mazinen! mon pou toultan avek zot.’

Pandan karant zour apre ki i ti’n resisite, Zezi ti aparet avek plizyer son bann disip Galile ek Zerizalenm. I ti ansenny zot bann leson enportan e fer en kantite mirak. Apre, Zezi ti zwenn avek son bann disip pour en dernyen fwa lo Montanny Pye Zoliv. I ti dir: ‘Pa bezwen kit Zerizalenm. Kontinyen esper sa ki mon Papa in promet.’

Son bann disip pa ti konpran ki i ti pe dir. Zot ti demann li: ‘Eski ou pe al vin Lerwa Izrael la konmela?’ Zezi ti dir ‘I pa ankor ariv letan pour Zeova fer mwan vin Lerwa. Byento zot pou resevwar lespri sen e zot pou vin mon bann temwen. Ale, pres Zerizalenm, Zide, Samari e dan bann landrwa pli lwen lo later.’

Apre Zezi ti mont dan lesyel e en nyaz ti kouver li. Son bann disip ti kontinyen get dan lesyel, me i ti’n fini disparet.

Bann disip ti desann lo Montanny Pye Zoliv e zot ti al Zerizalenm. Zot ti zwenn regilyerman dan en lasanm anler e zot ti priye. Zot ti esper Zezi donn zot plis lenstriksyon.