Dan en pei dan les Izrael, i ti annan dimoun ki ti krwar ki zetwal i kapab gid zot. En zour swar, serten zonm dan les ti vwar en lalimyer ki ti pe briye parey en zetwal pe bouze dan lesyel. Zot ti swiv sa “zetwal” ki ti anmenn zot Zerizalenm. Sa bann zonm ti konmans demann dimoun: ‘Oli sa zanfan ki pou vin lerwa bann Zwif? Nou’n vin onor li.’

Ler lerwa Zerizalenm, Erod, ti tann pe koz lo en nouvo lerwa, i ti vreman trakase. I ti demann bann sef pret: ‘Kote sa lerwa i sipoze ne?’ Zot ti dir li: ‘Bann profet ti dir ki i pou ne Betleenm.’ Alor Erod ti apel sa bann zonm ki sorti dan les e dir zot: ‘Al Betleenm e rod sa zanfan. Apre retournen e dir mwan kot i ete. Mwan osi mon anvi al onor li.’ Me sa pa ti vre.

Sa “zetwal” ti konmans bouz ankor. Sa bann zonm ti swiv li ziska Betleenm. Sa “zetwal” ti aret par lao en lakaz e sa bann zonm ti antre anndan. Zot ti vwar Zezi ek son manman, Mari. Zot ti tonm azenou devan sa zanfan e donn li bann kado, lor, lansan blan ek lamir. Eski Zeova ki ti’n vreman anvoy sa bann zonm pour rod Zezi? Non.

Sa zour swar, Zeova ti dir Zozef dan en rev: ‘Erod i anvi touy Zezi. Pran ou madanm ek ou garson e sov Lezip. Reste laba ziska ler mon dir ou retournen.’ Deswit, Zozef ek son fanmir ti al Lezip.

Zeova ti’n dir sa bann zonm ki sorti dan les pour pa retourn kot Erod. Ler Erod ti realize ki zot pa ti’n retournen, i ti vreman ankoler. Vi ki i pa ti konnen kot Zezi i ete, i ti donn lord pour touy tou bann pti garson ki ti dan laz Zezi, Betleenm. Me Zezi ti byen lwen avek zot, sen e sof Lezip.

 Pli tar, Erod ti mor. Zeova ti dir Zozef: ‘Aprezan zot kapab retourn Izrael.’ Zozef, Mari ek Zezi ti retourn Izrael e zot ti al reste dan lavil Nazaret.