En pe letan apre ki lerwa Neboukadnezar ti’n ganny sa rev lo sa stati, i ti fer en gran stati annor. I ti met sa gran stati lo laplenn Doura e i ti rasanble tou bann dimoun enportan dan sa pei devan sa stati, enkli Sadrak, Mesak ek Abednego. Lerwa ti donn sa lord: ‘Ler zot tann tapaz tronpet, larp ek lezot lenstriman lanmizik, zot devret tonm azenou devan sa stati. Nenport ki dimoun ki pa tonm azenou devan sa stati pou ganny zete dan dife.’ Eski sa trwa Ebre ti pou ador sa stati oubyen zot ti pou ador zis Zeova?

Apre, lerwa ti donn lord pour zwe lanmizik. Tou dimoun ti tonm azenou e ador sa stati. Zis Sadrak, Mesak ek Abednego ki pa ti fer li. Serten dimoun ti remark sa e zot ti dir lerwa. ‘Sa trwa Ebre pa ti ador ou stati.’ Neboukadnezar ti apel zot e dir: ‘Mon donn zot en lot sans pour ador sa stati. Me si zot pa fer li, mon pou zet zot dan dife. Napa okenn bondye ki pou kapab sov zot.’ Zot ti reponn: ‘Nou lerwa, nou pa bezwen en lot sans. Nou Bondye i kapab sov nou. Me menm si i pa sov nou, nou pa pou ador sa stati.’

Neboukadnezar ti vreman ankoler. I ti dir son bann zonm: ‘Fer sa dife set fwa pli so ki labitid!’ Apre i ti donn lord son bann solda: ‘Anmar sa bann zonm e zet zot ladan.’ Sa dife ti sitan so ki ler bann solda ti vin o bor, zot ti mor deswit. Sa trwa Ebre ti  tonm dan dife. Me ler Neboukadnezar ti get dan dife, i ti vwar kat zonm pe marse ladan olye trwa. I ti vreman per e demann son bann zofisye: ‘Pa nou ti zet trwa zonm dan dife? Mon vwar kat e enn i parey en lanz!’

Neboukadnezar ti aprose e kriye: ‘Sorti, zot serviter sa Bondye Tre O!’ Tou dimoun ti etonnen pour vwar Sadrak, Mesak ek Abednego sorti dan dife san okenn dimal. Zot lapo, seve ek zot lenz pa ti’n ganny brile e zot pa ti ni menm pi lafimen.

Neboukadnezar ti dir: ‘Bondye Sadrak, Mesak ek Abednego i gran. I’n anvoy son lanz pour sov zot. Napa en lot bondye ki parey zot Bondye.’

Eski ou determinen pour reste fidel avek Zeova dan nenport ki sityasyon, parey sa trwa Ebre?