EN FWA, sa Gran Ansennyan ti demann en kestyon ki ti sirprann bann dimoun. I ti demande: “Ki sennla mon manman? Ki sennla mon bann frer?” (Matye 12:48) Ou ti pou kapab reponn sa kestyon ou?— Petet ou konnen ki manman Zezi ti apel Mari. Be ou konn non son bann frer?— Eski i ti annan ser?—

Labib i dir ki bann frer Zezi ti apel “Zak, Zozef, Simon, Zida.” Zezi ti annan bann ser osi. Vi ki Zezi ti ne premye, son bann frer ek ser ti pli zenn ki li.​—Matye 13:55, 56; Lik 1:34, 35.

Eski bann frer Zezi ti vin son disip?— Labib i dir ki okonmansman zot “pa ti krwar li.” (Zan 7:5) Me plitar, Zak ek Zida (ki ti osi apel Zid) ti vin son disip. Zot ti menm ekrir serten liv dan Labib. Ou konnen ki liv zot ti ekrir?— Liv Zak ek Zid.

Kantmenm Labib pa dir ki mannyer ser Zezi ti apele, nou konnen ki i ti annan omwen de ser. Me i ti kapab annan plis ki sa. Eski son bann ser ti vin son disip?— Nou pa konnen, akoz Labib pa dir. Me ou konnen akoz Zezi ti demann sa kestyon, “Ki sennla mon manman? Ki sennla mon bann frer?”— Annou vwar akoz.

Zezi ti pe ansenny son bann disip. En dimoun ti vini e dir li: “Ou manman ek ou bann frer i deor e zot oule koz avek  ou.” Alors Zezi ti sezi sa loportinite pour ansenny son bann disip en leson enportan. I ti demande: “Ki sennla mon manman? Ki sennla mon bann frer?” Apre i ti montre lanmen lo son bann disip e dir: “La mon manman ek mon bann frer!”

Apre Zezi ti eksplike ki i oule dir par sa: “Tou dimoun ki fer lavolonte mon Papa ki dan lesyel limenm ki mon frer, mon ser, mon manman.” (Matye 12:47-50) Sa i montre ki kantite Zezi ti kontan son bann disip! I ti pe ansenny nou ki son bann disip ti parey son prop frer, ser, ek manman.

Sa letan bann frer Zezi, savedir Zak, Zozef, Simon, ek Zida, pa ti krwar Zezi ti Garson Bondye. Petet zot pa ti krwar sa ki lanz Gabriyel ti’n dir zot manman. (Lik 1:30-33) Alors petet zot pa ti tret Zezi dan en bon fason. En dimoun ki azir koumsa pa en vre frer  oubyen en vre ser. Ou konn en dimoun ki pa ti tret byen son frer oubyen son ser?—

Labib i koz lo Ezai ek Zakob. I dir ki Ezai ti telman ankoler ki i ti dir: “Mon pou touy mon frer Zakob.” Zot manman Rebeka ti telman per ki i ti fer Zakob sove pour Ezai pa touy li. (Zenez 27:41-46) Me apre bokou lannen, Ezai ti sanze e i ti may Zakob e anbras li.—Zenez 33:4.

Avek letan, Zakob ti annan 12 garson. Bann ki ti pli vye pa ti kontan zot pti frer Zozef. Zot ti zalou li akoz i ti garson prefere zot papa. Alors zot ti vann li avek bann dimoun ki ti fer biznes lesklav, ki ti pe pase pour al Lezip. Apre zot ti dir zot papa en bebet feros ti’n touy Zozef. (Zenez 37:23-36) Pa sa i en move keksoz pour fer?—

Plitar, bann frer Zozef ti regret sa ki zot ti’n fer. Alors Zozef ti pardonn zot. Ou konnen ki mannyer Zozef ti parey Zezi?— Bann zapot Zezi ti kit li ler i ti dan problenm,  e Pyer ti menm dir i pa konn li. Me Zezi ti pardonn zot, parey Zozef ti fer.

Ti osi annan de frer, ki ti apel Kaen ek Abel. Nou kapab aprann en leson avek zot osi. Bondye ti vwar dan leker Kaen ki i pa ti kontan son frer. Alors Bondye ti dir Kaen ki i devret sanz son fason. Si Kaen ti vreman kontan Bondye, i ti pou ekout li. Me i pa ti kontan Bondye. En zour, Kaen ti dir Abel: ‘Annou al marse.’ Abel ti ale ansanm avek Kaen. Ler zot ti ariv en landrwa kot zot ti tousel, Kaen ti tap son frer sitan for ki i ti tonbe e mor.​—Zenez 4:2-8.

Labib i dir sa i ansenny nou en bon leson. Ou konnen ki leson i ansenny nou?— ‘Lala mesaz ki zot in tande depi okonmansman: Ki nou devre kontan kanmarad. Nou pa devre fer konman Kaen. I ti sorti kot Dyab e i ti touy son frer.’ Alors bann frer ek ser i devret kontan kanmarad. Zot pa devret vin parey Kaen.​—1 Zan 3:11, 12.

Akoz nou pa pou anvi vin parey Kaen?— Akoz Labib i dir ki i ‘sorti kot Dyab.’ Vi ki Kaen ti azir parey Dyab, i konmsi Dyab ti son papa.

Ou vwar akoz i enportan pour kontan ou bann frer ek ser?—Si ou pa kontan zot, ou pe fer parey zanfan lekel?— Zanfan Dyab. Ou ti pou kontan vin parey zanfan Dyab ou?— Alors ki mannyer ou kapab montre ki ou anvi vin en zanfan Bondye?— Par kontan ou bann frer ek ser.

Be kisisa kontan?— Kontan i en santiman profon ki fer nou anvi fer sa ki byen pour lezot dimoun. Nou montre ki nou kontan lezot ler nou annan en bon santiman anver zot e  ler nou fer sa ki byen pour zot. E lekel nou bann frer ek ser, ki nou devret kontan?— Ou rapel? Zezi ti dir nou bann frer ek ser i bann dimoun ki form parti nou gran fanmiy Kretyen.

Eski i enportan pour nou kontan nou bann frer ek ser Kretyen?— Labib i dir: “Si en dimoun i ay son frer [oubyen son ser] ki i war, i pa kapab kontan Bondye ki i pa war.” (1 Zan 4:20) Alors nou pa kapab kontan zis detrwa nou frer ek ser. Nou bezwen kontan zot tou. Zezi ti dir: “Dimoun pou war ki zot mon bann disip si zot kontan kanmarad.” (Zan 13:35) Eski ou kontan tou bann frer ek ser?— Pa bliye, si ou pa kontan zot, alors ou pa kontan Bondye.

Ki mannyer nou kapab montre ki nou vreman kontan nou bann frer ek ser?— Be si nou kontan zot, nou pa pou pas lwen avek zot akoz nou pa anvi koz avek zot. Nou pou zantiy avek zot tou. Nou pou fer dibyen anver zot e nou pou pare pour partaze. E si en zour, zot dan problenm nou pou ed zot akoz vreman nou en gran fanmiy.

Ler nou vreman kontan tou nou bann frer ek ser, ki sa i montre?— I montre ki nou disip Zezi, sa Gran Ansennyan. Pa sanmenm ki nou ti a kontan vini?—