OU RAPEL akoz enn bann lanz Bondye ti vin Satan oubyen Dyab?— Akoz i ti anvi lezot ador li. Sanmenm ki i ti vir kont Bondye. Eski i annan lezot lanz ki ti swiv li?— Wi, ti annan. Labib i apel zot ‘lanz Satan,’ oubyen bann demon.​—Revelasyon 12:9.

Eski sa bann move lanz oubyen demon i krwar dan Bondye?— Labib i dir ‘bann demon i krwar Bondye i egziste.’ (Zak 2:19) Zot per akoz zot konnen Bondye pou pini zot pour bann move keksoz ki zot in fer. Ki move keksoz ki zot in fer?—

Labib i dir ki sa bann lanz ti kit zot landrwa reste dan lesyel e vin viv lo later konman bann zonm. Zot ti fer sa akoz zot ti anvi annan relasyon seksyel avek bann zoli fiy lo later. (Zenez 6:1, 2; Zid 6) Ki ou konnen lo relasyon seksyel?—

 Relasyon seksyel i ler en msye i dormi avek en madanm dan en fason tre spesyal. Apre en pti baba i kapab devlope dan vant sa madanm. Me i mal pour bann lanz annan relasyon seksyel. Bondye i oule zis bann msye ek madanm ki’n marye annan relasyon seksyel. Koumsa si en pti baba i ne, sa msye ek son madanm i kapab pran swen avek li.

Me bann lanz ti sanz zot lekor pour vin bann zonm pour zot kapab annan relasyon seksyel avek bann madanm lo later. Zot pti baba ti grandi e vin bann zean. Zot ti brit e kontan bat lezot dimoun. Alors Bondye ti anmenn en gro deliz pour detrir sa bann zean ek tou move dimoun. Me i ti fer Noe konstri en lars, savedir en gro bato, pour sov sa pti gin dimoun ki ti pe fer sa ki byen. Sa Gran Ansennyan ti dir i enportan pour rapel sa ki ti arive zour Deliz.​—Zenez 6:3, 4, 13, 14; Lik 17:26, 27.

Ou konnen ki sa bann move lanz ti fer ler Deliz ti vini?— Zot ti kit zot lekor imen e retourn dan lesyel. Me zot ti nepli kapab  vin lanz Bondye. Alors zot ti vin lanz Satan oubyen bann demon. Me ki ti arive avek zot zanfan, sa bann zean la?— Zot ti mor dan Deliz. Tou lezot dimoun osi ki pa ti obeir Bondye ti mor.

Depi letan Deliz, Bondye pa’n les bann demon vin parey bann imen ankor. Me kantmenm nou pa kapab vwar zot, bann demon i ankor pe sey fer dimoun fer move keksoz. Zot pe kree plis problenm ki avan. Sa i akoz zot in ganny tire dan lesyel e zete lo later.

Ou konnen akoz nou pa kapab vwar bann demon?— Akoz zot envizib. Me nou asire ki zot vivan. Labib i dir ki Satan pe ‘tronp dimoun dan lemonn antye’ e son bann demon pe ed li.​—Revelasyon 12:9, 12.

Eski Dyab ek son bann demon i tronp oubyen anbet nou osi?— Wi, zot kapab anbet nou si nou pa fer atansyon. Me pa fodre ki nou per. Sa Gran Ansennyan ti dir: ‘Dyab napa okenn pouvwar lo mwan.’ Si nou reste pros avek Bondye, i pou protez nou kont Dyab ek son bann demon.​—Zan 14:30.

I enportan nou konn bann move keksoz ki bann demon pou sey fer nou fer. Reflesir. Ki bann move keksoz bann demon ti fer ler zot ti vin lo later?— Avan Deliz, zot ti annan relasyon seksyel avek bann madanm. Sa i en keksoz ki pa ti byen pour bann lanz fer. Ozordi bann demon i kontan ler dimoun pa obeir lalwa Bondye konsernan relasyon seksyel. Ou rapel selman lekel ki annan drwa annan relasyon seksyel?— Zis bann dimoun ki’n marye.

Ozordi bann pti garson ek pti fiy i annan relasyon seksyel, me sa i mal. Labib i koz lo “parti seksyel” bann zonm ki apel kolor  oubyen penis. (Levitik 15:1-3) Parti seksyel bann madanm i apel popot oubyen vilv. Zeova ti kree parti seksyel pour bann dimoun marye servi li dan en fason spesyal. Bann demon i kontan ler dimoun i fer keksoz ki Zeova i defann fer. Par egzanp, bann demon i kontan ler en pti garson ek en pti fiy i zwe avek zot parti seksyel. Nou pa anvi fer bann demon kontan, pa i vre?—

I annan en lot keksoz ki bann demon i kontan me Zeova pa kontan. Ou konnen kwa?— Vyolans. (Psonm 11:5) En dimoun ki vyolan i brit e kontan bat son kanmarad. Sanmenm sa ki bann zean, piti bann demon, ti kontan fer. Ou rapel?

Bann demon i osi kontan fer per dimoun. Parfwa zot fer krwar zot en dimoun ki’n mor. Zot kapab koz parey sa dimoun. Zot fer sa pour fer nou krwar bann dimoun mor i vivan e kapab koz avek nou. Sanmenm bokou dimoun i krwar dan fantonm.

 Alors nou bezwen veye ki Satan ek son bann demon pa anbet nou. Labib i averti nou: ‘Satan i sey fer li parey en bon lanz, e son bann serviter osi i fer parey.’ (2 Korentyen 11:14, 15) Me an realite sa bann demon i vreman move. Annou vwar ki mannyer zot kapab sey fer nou vin parey zot.

Kote dimoun i aprann bokou lo vyolans, relasyon seksyel ki mal, e lo fantonm?— Pa lo televizyon, film, konpiter, zwe video, Internet, ek bann liv kartoun? Eski ler nou fer sa bann keksoz nou vin pli pre avek Bondye oubyen pli avek Dyab ek son bann demon? Ki ou panse?—

Lekel ki ou krwar i anvi nou ekout e get bann move keksoz?— Be Satan ek son bann demon. Alors, ki ou ek mwan nou bezwen fer?— Nou bezwen lir, ekout, e get bann keksoz ki bon pour nou e ki pou ed nou servi Zeova. Ou kapab mazin serten bon keksoz ki nou kapab fer?—

Si nou anvi fer sa ki byen, napa okenn rezon pour nou per bann demon. Zezi i pli for ki zot e zot per li. En fwa bann demon ti kriy avek Zezi: “Ou’n vin isi pour detri nou?” (Mark 1:24) Pa nou pou kontan ler Zezi pou detri Satan ek son bann demon?— Me ziska ki sa i arive, nou asire ki Zezi pou protez nou kont bann demon si nou reste pros avek li ek son Papa dan lesyel.