1. Ki nou devret fer pour fer sir ki nou ador Zeova dan en fason ki fer li plezir e akoz?

 ZEZI ti dir: “Bann vre adorater pou ador Bondye an armoni avek lespri sen ek laverite, parski Bondye pe rod bann dimoun koumsa pour ador li.” (Zan 4:23; 6:44) Nou tou nou devret “kontinyen fer sir ki sa ki [nou] fer i akseptab pour Senyer.” (Efezyen 5:10) Sa pa toultan fasil. Satan i esey anbet nou pour ki nou fer bann keksoz ki Zeova pa kontan.​—Revelasyon 12:9.

2. Ki ti arive o bor Montanny Sinai?

² Ki mannyer Satan i esey anbet nou? En fason i ler i esey konfiz nou konsernan sa ki byen ek sa ki mal. Remarke ki ti arive avek nasyon Izrael ler zot ti pe kanpe o bor Montanny Sinai. Moiz ti’n al anler dan montanny e bann dimoun ti pe esper li retournen. Finalman zot ti fatige esper Moiz e zot ti demann Aaron pour fer en bondye pour zot. I ti fer en zidol, en pti bef annor. Apre sa, bann dimoun ti fete. Zot ti danse toultour sa pti bef e tonm azenou devan li. Zot ti krwar ki zot ti pe ador Zeova. Me menm  si bann dimoun ti konsider sa levennman konman “en lafet pour [Zeova],” sa pa vedir ki sa ki zot ti pe fer ti byen. Pour Zeova, zot ti pe ador zidol e en kantite zot ti mor. (Egzod 32:1-6, 10, 28) Ki nou kapab aprann atraver zot move legzanp? Pa les ou ganny anbete. “Pa tous nanryen ki enpir” e les Zeova ansenny ou sa ki byen ek sa ki mal.​—Izai 52:11; Ezekyel 44:23; Galat 5:9.

3, 4. Akoz i byen pour egzamin lorizin bann lafet popiler?

³ Ler Zezi ti lo later, i ti ansenny son bann zapot ki mannyer pour ador Bondye dan en fason ki fer li plezir. Apre son lanmor, bann zapot ti kontinyen ansenny bann prensip Zeova avek bann nouvo disip. Me apre lanmor bann zapot, bann fo ansenyan ti konmans entrodwi bann fo krwayans, koutim ek lafet payen dan kongregasyon. Zot ti menm sanz non serten sa bann lafet payen pour fer zot vin lafet Kretyen. (Akt 20:29, 30; 2 Tesalonisyen 2:7, 10; 2 Zan 6, 7) Ozordi, en kantite sa bann lafet i popiler e zot ankor promot bann fo krwayans e menm bann pratik demonyak. a​—Revelasyon 18:2-4, 23.

⁴ Partou dan lemonn, bann lafet ek selebrasyon i en keksoz enportan dan lavi dimoun. Par kont, anmezir ki ou pou kontinyen aprann konn pwennvi Zeova lo sa bann lafet, ou pou kapab vwar li neseser pour sanz ou pwennvi lo serten sa bann lafet. Sa i kapab pa fasil, me ou kapab asire ki Zeova pou ed  ou. Ler nou konn lorizin serten lafet, sa pou ed nou konpran pwennvi Zeova lo sa bann lafet.

5. Ki mannyer nou konnen ki Zezi pa ti ne le 25 Desanm?

⁵ Dan bokou pei, en kantite dimoun i selebre lafet Nwel le 25 Desanm akoz zot krwar ki sa i dat nesans Zezi. Labib pa dir nou ki zour oubyen ki mwan ki Zezi ti ne. Me i donn nou serten detay konsernan letan ki Zezi ti ne. Lik ti ekri ki ler Zezi ti ne Betleenm, “bann berze . . . ti pe vey zot mouton deor pandan lannwit.” (Lik 2:8-11) Pandan mwan Desanm, i fer fre dan rezyon Betleenm, i sezon lapli e i annan lanez. Alor, bann berze pa ti pou reste deor avek zot troupo pandan lannwit. Ki sa i montre nou? Ler Zezi ti ne, i pa ti sitan fre parey pandan mwan Desanm. Labib ek listwar i montre ki Zezi ti ne dan Septanm oubyen Oktob.

6, 7. (a) Kote bokou koutim Nwel i sorti? (b) Kwa ki merit pous nou pour donn kado?

⁶ Alor, ki mannyer lafet Nwel ti konmanse? Nwel i sorti dan bann lafet payen, parey Saturnalia, en lafet ki bann Romen ti fer pour Saturn, bondye lagrikiltir. The Encyclopedia Americana i dir: “En kantite koutim ki relye avek Nwel i sorti dan sa lafet Romen, Saturnalia ki ti ganny selebre dan milye Desanm. Par egzanp, pandan sa lafet Saturnalia, bann payen ti fer bann gran gran selebrasyon, donn kado e alim labouzi.” Deplis, lanniverser nesans, bondye soley Mitra ki bann Pers ti adore, ti osi ganny selebre le 25 Desanm.

 ⁷ Me ozordi, bokou dimoun ki selebre Nwel pa pe reflesir lo son lorizin payen. Zot zis anvi pas letan avek zot fanmir, anmize e donn kado. I toutafe normal ki nou kontan nou fanmir ek zanmi e Zeova i oule ki son bann serviter i kontan donnen. Parey 2 Korentyen 9:7 i dir nou: “Bondye i kontan sa bann ki donn avek lazwa.” Zeova pa oule nou donn lezot zis lo bann lokazyon spesyal. Pep Zeova i kontan  donn kado e zwenn ansanm avek zanmi ek fanmir nenport zour pandan lannen, san ekspekte okenn keksoz an retour. Zot donnen akoz zot kontan lezot.​—Lik 14:12-14.

8. Eski bann astrolog ti donn kado Zezi ler i ti’n fek ne? Eksplike.

⁸ En kantite dimoun i kontan donn kado zour Nwel, akoz zot krwar ki trwa zonm saz ti anmenn kado pour Zezi ler i ti’n fek ne dan en pti lakaz kot zannimo ti reste. I vre ki i ti annan en group zonm ki ti vizit Zezi e anmenn kado. Dan letan Labib, i ti en koutim pour anmenn kado pour en dimoun enportan. (1 Lerwa 10:1, 2, 10, 13) Me eski ou ti konnen ki Labib i dir ki sa bann dimoun ti bann astrolog, setadir dimoun ki ti fer mazik e ki pa ti ador Zeova? Deplis, zot pa ti vizit Zezi ler i ti’n fek ne. Zot ti vizit li pli tar, ler i ti’n vin en “pti garson” e i ti pe reste dan en lakaz.​—Matye 2:1, 2, 11.

9. Ki sa de lafet lanniverser nesans ki ganny mansyonnen dan Labib?

⁹ Tou dimoun i kontan ler en pti baba i ne. (Psonm 127:3) Me sa pa vedir ki nou devret selebre lanniverser nesans. Zis mazin sa: Labib i koz zis lo de lafet lanniverser nesans. Enn ti lanniverser en Faraon Ezipsyen e sa lot ti lanniverser Lerwa Erod Antipas. (Lir Zenez 40:20-22; Mark 6:21-29.) Sa bann dirizan pa ti bann serviter Zeova. Anfet, Labib pa mansyonn okenn serviter Zeova ki ti selebre son lanniverser nesans.

10. Ki mannyer bann premye Kretyen ti konsider lanniverser nesans?

 ¹⁰ The World Book Encyclopedia i dir ki bann premye Kretyen “ti konsider selebrasyon lanniverser nesans konman en koutim payen.” Sa bann koutim ti baze lo bann fo krwayans. Par egzanp, bann Grek ti krwar ki sak dimoun ti ganny proteze par en lespri ki ti asiste nesans sa dimoun. Zot ti krwar ki sa lespri ti annan en relasyon spesyal avek en bondye ki ti ne menm zour avek sa dimoun. Zot ti krwar ki sa dimoun ti bezwen selebre son lanniverser pour ki sa lespri i kapab protez li tou dilon son lavi. An plis ki sa bann krwayans payen, lanniverser nesans i osi relye avek astrolozi ek oroskop.

11. Ki mannyer Zeova i santi ler nou zenere?

¹¹ Pour bokou dimoun, zot lanniverser nesans i en zour spesyal kot zot santi ki lezot i devret montre ki zot apresye e kontan zot. Me nou kapab montre nou fanmir ek zanmi ki nou kontan zot tou dilon lannen, olye zis en zour spesifik. Zeova i anvi ki nou toultan bon e zenere. (Lir Akt 20:35.) Nou remersye li tou le zour pour lavi, sa zoli kado ki i’n donn nou, pa zis zour nou lanniverser nesans.​—Psonm 8:3, 4; 36:9.

12. Akoz zour nou lanmor i pli bon ki zour nou nesans?

¹² Eklezyast 7:1 i dir: “En bon repitasyon i pli bon ki parfen renonmen e zour lanmor i preferab ki zour nesans.” Ki mannyer zour nou lanmor i kapab pli bon ki zour nou nesans? Ler nou ne, nou pa ankor fer nanryen dan nou lavi, ki swa byen ouswa  mal. Me ler nou servi nou lavi pour fer lavolonte Zeova e fer dibyen pour lezot, nou pou annan “en bon repitasyon” e Zeova pou mazin nou, menm apre nou lanmor. (Zob 14:14, 15) Pep Zeova pa selebre zot lanniverser nesans ni lanniverser nesans Zezi. Anfet, sel levennman ki Zezi ti demann nou pour selebre i Memoryal son lanmor.​—Lik 22:17-20; Ebre 1:3, 4.

13, 14. Kote bann koutim lafet Pak i sorti?

¹³ En kantite dimoun i krwar ki zot pe selebre rezireksyon Zezi ler zot selebre Pak. Anfet, lafet Pak oubyen Easter an Angle i relye avek bondye granmaten ek prentan, ki apel Eostre, ki ti bondye bann Angle lontan. The Dictionary of Mythology i eksplike ki Eostre ti en bondye reprodiksyon. Serten koutim Pak i relye avek sa bann krwayans. Par egzanp, Encyclopædia Britannica i dir ki dizef in touzour “en senbol ki reprezant nesans ek rezireksyon.” Bann lapen i osi ganny servi konman en senbol pour reprezant reprodiksyon dan ladorasyon payen. I kler ki Pak napa nanryen pour fer avek rezireksyon Zezi.

¹⁴ Eski ou krwar ki Zeova i kontan ler i vwar dimoun pe melanz bann koutim fo larelizyon avek rezireksyon son Garson? Pa ditou! (2 Korentyen 6:17, 18) Anfet, Zeova pa’n zanmen demann nou pour selebre rezireksyon Zezi.

15. Ki mannyer Halloween ti konmanse?

¹⁵ Halloween ki osi ganny apele All Hallows’ Eve oubyen lavey Lafet Latousen i relye avek sorsye, pti nen ek nanm. Sa pa en nouvo lafet. Ler i ti plennlin ver le 1 Novanm, bann dimoun (Celts) ki ti reste Langleter ek Irlann lontan ti selebre en lafet ki ti apel Samhain. Zot ti krwar ki pandan sa lafet, lespri dimoun mor ti retourn lo later. Dimoun ti met manze ek bwar deor pour ki sa bann lespri pa fer  zot ditor. Ler bann zanfan konmela i degiz zot e al kazankaz pour fer per sa met lakour si i pa donn zot en keksoz, san realize zot pe kontinyen swiv sa koutim demonyak.

16, 17. Ki nou devret reflesir lo la ler nou pe prepar en maryaz?

¹⁶ En maryaz i en levennman zwaye. Maryaz i ganny selebre dan diferan fason partou dan lemonn. Normalman, dimoun pa reflesir lo kote bann koutim maryaz i sorti, alor petet zot pa konnen ki serten koutim i sorti dan larelizyon payen. Me en koup Kretyen ki pe mazin marye i bezwen fer sir ki zot maryaz i fer plezir Zeova. Si zot konnen kote bann koutim maryaz i sorti, zot pou kapab fer bann bon desizyon.​—Mark 10:6-9.

¹⁷ Serten koutim maryaz i swadizan anmenn “lasans” pour sa nouvo koup. (Izai 65:11) Par egzanp, dan serten landrwa dimoun i anvoy diri oubyen lezot keksoz lo nouvo ek nouvel marye. Zot krwar ki sa pou fer sa koup annan zanfan, ki zot pou viv lontan e ere e zot pou ganny proteze kont bann move lespri. Me bann Kretyen i fer sir ki zot pa swiv okenn koutim ki relye avek fo larelizyon.​—Lir 2 Korentyen 6:14-18.

18. Ki lezot prensip Labib ki aplikab pour en maryaz?

¹⁸ En koup Kretyen i anvi ki zot maryaz i en levennman zwaye, respektab e ki tou dimoun ki asiste i kontan. Kot resepsyon maryaz en Kretyen, bann envite pa pou fer bann dyok sal ek bann speech ki pou anbaras oubyen montre en mank respe pour sa  nouvo koup ek lezot dimoun. (Proverb 26:18, 19; Lik 6:31; 10:27) En maryaz Kretyen pa devret en lokazyon pour ‘demonstre bann keksoz materyel’ ki zot annan. (1 Zan 2:16) Si ou pe fer preparasyon pour ou maryaz, fer sir ki pli tar ler ou pou mazin ou maryaz, ou pou annan bann bon souvenir.​—Vwar Lezot lenformasyon nimero 28.

19, 20. Kote sa koutim pour lev ver anler i sorti?

¹⁹ Dimoun i kontan bwar en pti lasante, tap ver ansanm oubyen lev zot ver anler dan bann maryaz ek lezot rankont. Ler zot fer sa, i annan en dimoun ki fer en swe. Ki mannyer bann Kretyen i devret konsider sa koutim?

²⁰ International Handbook on Alcohol and Culture i dir ki i probab ki lev ver anler i sorti dan en koutim payen kot “en labwason sakre ti ganny ofer avek bann bondye.” Sa ti ganny fer pour ki sa bondye i ekout sa swe oubyen lapriyer kot zot dir ‘cheers!’ oubyen ‘en pti lasante!’ Dan letan lontan, dimoun ti abitye lev zot ver anler pour demann zot bondye en benediksyon. Me pa koumsa ki Zeova i donn son benediksyon.​—Zan 14:6; 16:23.

21. Ki lezot lafet ki bann Kretyen i merit evite?

²¹ Ler ou pe deside si ou pou partisip dan en lafet oubyen non, reflesir lo kalite latitid ek konportman  ki bann dimoun i annan pandan sa lafet. Par egzanp, dan serten lafet ek karnaval, dimoun i dans dan en fason degradan, bwar san en kontrol e menm komet imoralite seksyel. Sa bann selebrasyon i kapab osi ankouraz omoseksyalite ek nasyonalizm. Si nou partisip dan sa bann lafet, eski nou pe vreman deteste sa ki Zeova i deteste?​—Psonm 1:1, 2; 97:10; 119:37.

22. Kwa ki kapab ed en Kretyen deside si i pou pran par dan en lafet?

²² Bann Kretyen i bezwen fer byen atansyon pour pa partisip dan okenn lafet ki dezonor Zeova. Zapot Pol ti ekri: “Ki swa zot pe manze ouswa bwar oubyen nenport kwa ki zot pe fer, fer tou pour laglwar Bondye.” (1 Korentyen 10:31; vwar Lezot lenformasyon nimero 29.) Byensir, pa tou lafet ki relye avek imoralite, fo larelizyon oubyen nasyonalizm. Si en lafet pa kas prensip Labib, nou bezwen deside nou menm si nou pou pran par dan sa lafet oubyen non. Nou bezwen pran an konsiderasyon osi ki lefe nou desizyon pou annan lo lezot.

23, 24. Ki mannyer nou kapab eksplik nou fanmir ki pa Temwen akoz nou pa selebre serten lafet?

²³ Petet ou’n deza aret partisip dan bann lafet ki pa pe onor Zeova. Me serten ou fanmir ki pa Temwen Zeova i kapab krwar ki ou nepli kontan zot oubyen ou nepli anvi pas letan avek zot. Petet zot krwar ki sa sel letan pour fanmir zwenn ansanm i ler  i annan lafet. Alor, ki ou kapab fer? I annan en kantite fason ki ou kapab reasir zot ki ou kontan zot e ki zot enportan pour ou. (Proverb 11:25; Eklezyast 3:12, 13) Ou kapab envit zot pour vin pas letan avek ou dan lezot moman.

²⁴ Si ou fanmir i anvi konpran akoz ou nepli selebre serten lafet, ou kapab rod lenformasyon dan nou bann piblikasyon e lo jw.org ki pou ed ou kapab donn zot en leksplikasyon. Pa bezwen esey argimant avek zot oubyen donn zot lenpresyon ki ou pe fors zot pour annan menm pwennvi avek ou. Ed ou fanmir konpran ki ou’n reflesir lo en kantite keksoz avan ou fer sa desizyon. Reste kalm e fer sir ki ou ‘parol i touzour agreab, konmsi i asezonnen avek disel.’​—Kolosyen 4:6.

25, 26. Ki mannyer paran i kapab ed zot zanfan pour kontan standar Zeova?

²⁵ I enportan ki nou tou nou konpran byen akoz nou deside pour pa selebre serten lafet. (Ebre 5:14) Nou lobzektif i pour fer plezir Zeova. Si nou en paran, nou devret ed nou zanfan konpran e kontan bann prensip Labib. Ler nou zanfan i vwar Zeova konman en Bondye reel, zot osi zot pou anvi fer li plezir.​—Izai 48:17, 18, NWT; 1 Pyer 3:15.

²⁶ Zeova i kontan ler i vwar nou pe fer tou sa ki nou kapab pour ador li dan en fason ki pir e onnet. (Zan 4:23) Me en kantite dimoun i krwar ki en dimoun pa kapab vreman onnet dan sa lemonn malonnet. Eski i vre sa? Annou diskit lo la dan sa lot sapit.