1, 2. Akoz nou kapab dir ki Lerwa David ti konn byen ki savedir enfidelite?

 LERWA DAVID ti konnen ki savedir enfidelite. En letan, son renny ti ganny met an danze par bann dimoun dan son prop nasyon ki ti pe fer konplo anba anba kont li. Anplis ki sa, David ti ganny trai par serten ki nou ti pou’n ekspekte ti pros avek li. Pran par egzanp, Mikal, ki ti premye madanm David. Okonmansman i ti “anmoure avek David,” e san okenn dout i ti ed li dan son travay konman lerwa. Me plitar, Mikal “ti konmans pa kontan li dan son leker” e i ti menm konsider David konman “en dimoun ki napa lespri.”​—1 Samyel 18:20; 2 Samyel 6:16, 20.

² Apre, son konseye personnel, Aitofel ti trai li. Son bann konsey ti ganny byen apresye, ti konmsi bann parol ki sorti dan labous Zeova. (2 Samyel 16:23) Me avek letan, sa konseye ki David ti met konfyans ladan ti trai li e zwenn ansanm avek lezot dan en rebelyon ki ti ganny plàn kont David. Me lekel ki ti sef par deryer sa konplo? Son prop garson, Absalonm! I ti sezi sa loportinite pour “kontinyen vol leker bann Izraelit,” e etablir son lekor konman en oponan David. Rebelyon Absalonm ti sitan ganny en kantite sipor ki Lerwa David ti bezwen sove.​—2 Samyel 15:1-6, 12-17.

3. Ki konfyans David ti annan?

³ Eski ti napa personn ki ti reste fidel avek David? Toudilon son bann difikilte, David ti konnen ki ti annan enn ki ti reste fidel avek li. Lekel? Se pa lot ki Zeova. David ti dir sa lo Zeova: “Avek en dimoun fidel ou pou azir avek fidelite.” (2 Samyel 22:26) Ki savedir fidelite e konman Zeova i demontre pli gran legzanp sa kalite?

4, 5. (a) Kisisa “fidelite”? (b) Dan ki sans fidelite en dimoun ek fidelite en keksoz i diferan?

⁴ Dan Lekritir Ebre, “fidelite” i vedir sa labonte ki atas li avek en keksoz e i pa large ziska ki son bi an rapor avek sa keksoz in ganny realize. Fidelite i enplik plis ki zis gard en promes. Fidelite i sorti dan lanmour. a Psalmis David ti apel lalin “en temwen ki fidel dan lesyel,” parski i la tou le swar. (Psonm 89:37) Me i pa sa menm fidelite ki ganny servi an rapor avek en dimoun. Akoz? Parski fidelite i en mwayen pour eksprim lanmour. Alor, en keksoz pa kapab fer sa.

⁵ Lafason ki sa mo i ganny servi dan Labib, fidelite i enplik montre lafeksyon. Kan en dimoun i demontre sa kalite anver en lot dimoun, sa i endike ki zot annan en lanmitye antre zot de. Sa kalite fidelite pa aret dan semen. I pa parey laroul ki ganny pouse dan nenport direksyon avek divan. Okontrer, fidelite oubyen lanmour fidel i annan sa lafors pour sirmont bann pli gro difikilte.

6. (a) Kwa ki montre ki fidelite i rar parmi imen e ki mannyer Labib i fer resorti sa? (b) Ki sa pli bon fason pour aprann ki fidelite i enplike, e akoz?

 ⁶ I vre ki sa kalite fidelite i rar ozordi. Souvannfwa, bann zanmi pros i la “zis pour kraz enn a lot.” Deplizanpli nou antann konsernan bann msye ek madanm ki kit kanmarad. (Proverb 18:24; Malaki 2:14-16) Traizon i telman popiler ozordi ki nou osi nou kapab repet sa ki profet Mika ti dir: “Bann dimoun fidel in fini lo later.” (Mika 7:2) Kantmenm parler imen pa montre labonte leker, Zeova li i toultan azir avek fidelite. Annefe, pli bon fason pour aprann ki fidelite i enplike, se pour egzaminen ki mannyer Zeova i demontre sa gran laspe dan son lanmour.

7, 8. Akoz nou kapab dir ki Zeova tousel ki fidel?

⁷ Labib i dir sa lo Zeova: “Ou tousel ki fidel.” (Revelasyon 15:4, NW) Ki mannyer sa i posib? Pa plizyer fwa bann imen ek lanz in demontre en fidelite ki remarkab? (Zob 1:1; Revelasyon 4:8) Deplis, ki nou pou dir lo Zezi Kri? Pa i sa enn ki’n pli “fidel” avek Bondye? (Psonm 16:10) Me ki mannyer alor, nou kapab dir ki zis Zeova tousel ki fidel?

⁸ Premyerman, pa oubliye ki fidelite i en laspe dan lanmour. Vi ki ‘Bondye i lanmour,’ savedir i pli bon legzanp sa kalite. Alor, lekel ki kapab demontre fidelite pli byen ki Zeova? (1 Zan 4:8) I vre ki bann lanz ek imen i kapab reflekte bann kalite Bondye, me zis Zeova ki fidel dan lesans ki personn pa kapab demontre menm degre fidelite parey li. Konman “Ansyen bann Zour,” i’n demontre labonte leker pli lontan ki okenn imen oubyen lanz. (Danyel 7:9) Annefe, fidelite i dan Zeova. Napa personn ki kapab demontre sa kalite parey li. Konsider serten legzanp.

9. Ki mannyer Zeova i “fidel dan tou son travay”?

⁹ Zeova i “fidel dan tou son travay.” (Psonm 145:17) Dan  ki fason? Larepons i trouve dan Psonm 136. Sa psonm i mansyonn plizyer moman kot Zeova ti sov son pep, enkli sa delivrans remarkab bann Izraelit atraver Lanmer Rouz. Pour met lanfaz lo sa kalite, sak verse dan sa psonm i konmans koumsa: “Son labonte leker [oubyen, fidelite] i pour en letan endefini.” Sa psonm in ganny enkli dan Kestyon pour Refleksyon lo paz 289. Ler ou lir sa bann verse, ou pou enpresyonnen par sa kantite fason ki Zeova ti demontre son labonte leker anver son pep. Wi, Zeova i demontre labonte leker anver son bann serviter fidel par ekout zot kan zot kriy osekour e par fer aksyon dan letan apropriye. (Psonm 34:6) Osi lontan ki son serviter i reste fidel avek li, Zeova pou kontinyen demontre son lanmour fidel anver zot.

10. Ki mannyer Zeova i demontre fidelite an rapor avek son bann standar?

¹⁰ En lot fason ki Zeova i demontre son fidelite se par reste atase avek son bann standar. Kontrerman avek serten imen ki fer sa ki zot lespri i dir zot fer oubyen dapre sa ki zot santi enn zour pour en lot, Zeova pa zanmen sanz son pwennvi lo sa ki byen e sa ki mal. Pandan sa plizyer milener ki’n pase son pwennvi lo bann keksoz parey grigri, ador zidol ek krim in reste parey. I ti dir atraver son profet Izai: “Mon pou reste touzour parey menm kan zot in vye.” (Izai 46:4) Alor, nou kapab asire ki nou pou benefisye kan nou swiv bann gidans lo moralite ki trouve dan parol Bondye.​—Izai 48:17-19.

11. Donn legzanp pour montre ki Zeova i fidel avek son bann promes.

¹¹ Zeova i osi montre fidelite par gard son bann promes. Kan i predir en keksoz, i arive. Se pour sa rezon i ti dir: “Mon parol ki sorti dan mon labous . . . pa pou retourn  kot mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.” (Izai 55:11) Par gard son parol, Zeova i montre li fidel avek son pep. I pa fer zot esper en keksoz ki i napa okenn lentansyon fer. Zeova i sitan annan en bon repitasyon dan sa domenn ki son serviter Zozye ti kapab dir: “Napa en promes parmi tou sa bann bon promes ki Zeova in fer avek [zanfan] Izrael ki pa’n ganny akonpli; zot tou zot in vin vre.” (Zozye 21:45) Alor, nou kapab asire ki nou pa pou zanmen dezapwente, akoz Zeova pa’n kapab akonpli son bann promes.​—Izai 49:23; Romen 5:5.

12, 13. Dan ki fason labonte leker Zeova i pour “en letan endefini”?

¹² Parey i’n ganny fer resorti pli boner, Labib i dir nou ki labonte leker Zeova “i pour en letan endefini.” (Psonm 136:1) Ki mannyer sa? Dan en sans kan Zeova i pardonnen, i pardonn enn fwa pour tou. Parey nou ti vwar dan Sapit 26, Zeova pa relev ankor pese ki i’n pardonnen. Vi ki “tou dimoun in fer pese e pa’n arive ganny laglwar Bondye,” nou tou nou devret kontan ki labonte leker Zeova i pour en letan endefini.​—Romen 3:23.

¹³ Me labonte leker Zeova i pour en letan endefini dan en lot sans osi. Son Parol i dir ki bann dimoun drwat “pou vin parey en pye dibwa ki’n ganny plante obor bann larivyer, ki raport son fri pandan son sezon e ki son fey pa fletri. Tou sa ki i fer pou reisi.” (Psonm 1:3) Imazin en pye dibwa ki son fey pa fletri! Alor, si nou osi nou pran plezir dan Parol Bondye, nou pou kapab viv lontan, anpe e nou pou prospere. Bann benediksyon ki Zeova i fidelman donn son bann serviter fidel i pour leternite. Wi, dan sa nouvo lemonn drwat ki Zeova pou anmennen, bann imen obeisan pou eksperyans son labonte leker pour en letan endefini.​—Revelasyon 21:3, 4.

14. Ki mannyer Zeova i montre lapresyasyon pour fidelite son bann serviter?

¹⁴ Plizyer fwa Zeova in demontre son fidelite. Vi ki Zeova i toultan demontre son fidelite dan en fason parfe anver son bann serviter fidel, son fidelite pa zanmen diminyen. Psalmis ti ekrir: “Mon ti en zennonm, mon’n menm vin vye, e pourtan mon pa’n vwar okenn dimoun drwat ganny abandonnen konpletman, ni menm son desandans pe rod dipen. Parski Zeova i kontan lazistis, e i pa pou kit son bann fidel.” (Psonm 37:25, 28) I vre, konman nou Kreater, Zeova i merit nou ladorasyon. (Revelasyon 4:11) Kantmenm sa, vi ki i fidel, Zeova i apresye sa ki nou fer pour montre nou fidel.​—Malaki 3:16, 17.

15. Eksplike ki mannyer lafason ki Zeova ti azir avek bann Izraelit i met lanfaz lo Son fidelite.

¹⁵ Gras a son labonte leker, Zeova ti kontinyen ed son pep kan zot ti dan difikilte. Sa psalmis i dir nou: “I pe vey bann ki fidel avek li; e i delivre zot dan lanmen bann mesan.” (Psonm 97:10) Annou egzamin lafason ki i ti azir avek bann Izraelit. Apre ki Zeova ti fer mirak pour delivre zot kot Lanmer Rouz, bann Izraelit ti dir sa bann parol dan en kantik ki zot ti sante pour Zeova: “Dan ou labonte leker [oubyen, “lanmour fidel,” not anba lo paz] ou’n gid sa pep ki ou’n delivre.” (Egzod 15:13) Ler Zeova ti delivre bann Izraelit kot Lanmer Rouz, sirman sa ti demontre son lanmour fidel. Alor, Moiz ti dir bann Izraelit: “Pa akoz zot ti pli bokou parmi tou lezot pep ki Zeova ti demontre lafeksyon pour zot, ki i’n swazir zot, se parski zot ti pli pti parmi tou lezot pep. Me i akoz lanmour ki Zeova i annan pour zot e akoz i ti gard sa serman ki i ti fer avek zot zanset. Avek en lanmen for Zeova ti fer zot sorti, pour ki i kapab delivre zot dan lesklavaz, dan lanmen Faraon lerwa Lezip.”​—Deterononm 7:7, 8.

16, 17. (a) Ki mannyer bann Izraelit ti montre ki zot ti mank lapresyasyon, me ki mannyer Zeova ti montre konpasyon anver zot? (b) Ki mannyer laplipar Izraelit ti montre ki “napa okenn gerizon” pour zot, e ki lavertisman sa i donn nou?

 ¹⁶ Byensir, konman en nasyon bann Izraelit pa ti montre lapresyasyon pour labonte leker Zeova. Parski apre ki Zeova ti’n delivre zot, “zot ti kontinyen fer plis pese kont [Zeova] par rebele . . . kont sa enn Tre O.” (Psonm 78:17) Pour plizyer lannen zot ti kontinyen rebele. Zot ti kit Zeova e al ver bann fo bondye ek bann pratik payen ki ti sali zot devan Zeova. Kantmenm sa, Zeova pa ti kas son lalyans. Okontrer, atraver profet Zeremi, Zeova ti sipliy son pep: “Retournen O Izrael enfidel . . . Mon pa pou ankoler avek zot parski mon fidel.” (Zeremi 3:12) Me parey nou’n vwar dan Sapit 25, laplipar Izraelit pa ti ganny motive pour sanze. Annefe, “zot ti kontinyen gognard bann mesazer sa vre Bondye, zot ti rezet son bann parol e monk son bann profet.” Avek ki rezilta? Finalman, “Zeova ti ankoler avek son pep, ziska ti napa okenn gerizon.”​—2 Kronik 36:15, 16.

¹⁷ Ki nou aprann atraver sa? Nou aprann ki fidelite Zeova pa ni aveg e i pa kapab ganny anbete. I vre ki Zeova i annan “en kantite labonte leker,” e i en plezir pour li pran pitye kan i annan en bon rezon pour fer li. Me ki i arive ler en dimoun ki’n fer pese i montre ki i vreman mesan? Dan sa ka, Zeova i reste atase avek son standar drwat e pas en zizman sever lo sa dimoun. Parey Moiz ti ganny dir, “dan okenn ka [Zeova] pa pou akord gras pour pinisyon.”​—Egzod 34:6, 7

18, 19. (a) Lefe ki Zeova i pini bann mesan ki mannyer sa i montre ki i fidel? (b) Ki mannyer Zeova pou demontre son fidelite anver son bann serviter ki’n ganny persekite ziska lanmor?

¹⁸ Menm ler Zeova i pini bann mesan i pe demontre ki i fidel. Ki mannyer? Nou kapab vwar sa dan liv Revelasyon,  ler Zeova ti dir bann lanz: “Ale, vid lo later sa set lakoup lakoler Bondye.” Kan sa trwazyenm lanz ti vid son lakoup “dan bann larivyer ek tou bann sours delo,” delo ti vin disan. Apre sa lanz ti dir avek Zeova: “Ou zis [fidel, NW] dan ou bann zizman, . . . ou ki egziste e ki ti egziste. Annefe, zonm in vers disan bann sen ek bann profet, e ou, ou’n donn zot disan pour bwar. Zot merite.”​—Revelasyon 16:1-6.

¹⁹ Remarke ki ler sa lanz ti anons sa mesaz zizman, i ti dir ki Zeova i sa enn ki ‘fidel.’ Akoz? Parski kan Zeova i detrir bann dimoun mesan, I pe demontre son fidelite anver son bann serviter, ki bokou parmi in ganny persekite ziska ki zot in mor. Fidelman, Zeova i gard zot vivan dan son memwar. I vreman anvi vwar ankor sa bann ki’n mor fidel e Labib i asir nou ki Zeova pou resisit zot. (Zob 14:14, 15) Menm si zot in mor, Zeova pa oubliy son bann serviter fidel. Okontrer, “pour li tou i vivan.” (Lik 20:37, 38) Plan Zeova pour resisit sa bann ki dan son memwar i en gran laprev son fidelite.

20. Lekel sa bann ki Zeova “i’n montre pitye,” e ki mannyer Zeova i montre son fidelite anver zot?

²⁰ Toudilon listwar, Zeova in montre en fidelite remarkab anver bann imen fidel. Annefe, pour plizyer lannen Zeova “in siport avek pasyans bann ki merit son lakoler e pare pour destriksyon.” Akoz? “I’n oule fer sa pour fer konn larises son laglwar pour bann a ki i’n montre pitye, ki i’n prepare davans pour son laglwar.” (Romen 9:22, 23) Sa “bann a ki i’n montre pitye” i bann ki annan sa bon kondisyon leker, ki’n ganny swazir par lespri sen pour zwenn ansanm avek Kris dan son Rwayonm. (Matye 19:28) Par ouver semen delivrans pour sa bann ki i’n  montre pitye, Zeova ti reste fidel anver Abraam, sa enn avek ki i ti fer sa promes: “Atraver ou desandans tou nasyon lo later pou sirman ganny beni, parski ou’n ekout mwan.”​—Zenez 22:18.

21. (a) Ki mannyer Zeova i montre fidelite anver “en gran lafoul” ki annan lespwar pour sirviv ‘gran ladetres’? (b) Ki fidelite Zeova i pous ou pour fer?

²¹ Zeova i montre sa menm fidelite anver “en gran lafoul” ki annan lespwar pour sirviv ‘gran ladetres’ e viv pour touzour dan en paradi lo later. (Revelasyon 7:9, 10, 14) Kantmenm son bann serviter i enparfe, akoz son fidelite Zeova i donn zot sa loportinite pour viv pour touzour dan en paradi lo later. Ki mannyer i fer sa? Par mwayen sa ranson ki pli gran akt fidelite sorti kot Zeova. (Zan 3:16; Romen 5:8) Fidelite Zeova i atir sa bann ki dan zot leker zot pe rod ladrwatir. (Zeremi 31:3) Eski ou pa santi ou pli pros avek Zeova pour son gran fidelite ki i’n demontre e ki i pou kontinyen demontre? Vi ki nou dezir se pour vin pros avek Bondye, annou azir anver son lanmour par fortifye nou determinasyon pour servi li avek fidelite.