Imazin sa senaryo: Tim pe zwe avek son bann zanmi, i tap boul e kas vit loto en vwazen.

Si ou ti Tim, ki ou ti pou fer?

OU ANNAN TRWA OPSYON:

1. Taye.

2. Blanm en lot dimoun.

3. Dir sa vwazen sa ki’n arive e ofer pour pey domaz.

Ou kapab anvi swazir Opsyon A, me i toultan bon pour aksepte ou fot, ki swa i annan pour fer avek en vit kase oubyen en lot keksoz.

1. I sa pli bon keksoz pour fer.

   Labib i dir: “Nou anvi konport nou onnetman dan tou keksoz.”​—Ebre 13:18, NW.

2. I pli fasil pour pardonn en dimoun ki’n aksepte son fot.

   Labib i dir: “Sa enn ki kasyet son bann fot pa pou prospere. Me sa enn ki avoue son fot e renonse pou ganny pardonnen.”​—Proverb 28:13.

3. Sa ki pli enportan, i fer plezir Bondye.

   Labib i dir: “Zeova i deteste en dimoun ki rize, me i en bon zanmi avek dimoun ki drwat.”​—Proverb 3:32, NW.

Karina pa ti oule ki son papa i konnen ki i ti’n ganny en tiket avek lapolis akoz i ti pe dray tro vit. Me i ti konnen ki en zour, son papa ti pou bezwen konnen. Karina i dir, “Apepre enn an pli tar, mon papa ti aprann ki ti’n arive. Mon ti ganny en ta problenm akoz sa.”

Ki leson Karina ti aprann? I dir: “Ler ou kasyet ou fot i fer keksoz pli pir. Ou pou bezwen rann kont pli tar.”

Labib i dir: “Nou tou nou souvan fer fot.” (Zak 3:2, NW) Parey nou’n vwar, letan ou aksepte ou fot deswit, sa i montre ki ou annan limilite e ki ou en dimoun responsab.

Apre ki ou’n aksepte ou fot, ou bezwen aprann avek ou fot. En zenn fiy ki apel Vera i dir: “Mon esey tir en leson avek sak fot ki mon fer e sa in ed mwan pour vin en pli bon dimoun. Si mon pas dan menm sityasyon en lot fwa, mon pou azir dan en lot fason.” Annou vwar ki mannyer ou kapab fer sa.

Ou papa in pret ou son moter e ou’n andomaz li. Ki ou pou fer?

• Reste trankil e swete ki ou papa pa pou remarke.

• Dir ou papa sa ki’n vreman arive.

• Dir ou papa ki’n arive me blanm en lot dimoun.

Ou’n fel en tes akoz ou pa’n etidye. Ki ou pou fer?

• Dir ki sa tes ti tro difisil.

• Aksepte ou responsabilite.

• Dir ki sa ansenyan i annan en problenm avek ou.

 Aprezan, revwar bann senaryo ki nou’n vwar avan e esey met ou dan plas (1) ou papa e (2) dan plas ou ansenyan. Ki ou papa ek ou ansenyan ti pou mazinen lo ou si ou aksepte ou fot deswit? Ki zot ti pou mazinen lo ou si ou kasyet ou fot?

Aprezan mazin en fot ki ou’n fer pandan sa dernyen lannen e reponn sa bann kestyon swivan.

Ki fot ou ti fer? Ki ou ti fer dan sa sityasyon?

• Mon ti kasyet mon fot.

• Mon ti blanm en lot dimoun.

• Mon ti deswit aksepte mon fot.

Si ou pa ti aksepte ou fot, ki mannyer ou ti santi apre?

• Gran mersi, personn pa’n konnen.

• Koupab, mon ti’n devret dir laverite.

Ki ou ti’n kapab fer dan sa sityasyon?

Ki ou’n aprann avek ou fot?

Akoz serten dimoun pa oule aksepte zot fot?

Ki dimoun pou mazinen lo ou si ou pe toultan kasyet ou fot, me ki zot pou mazinen si ou aksepte ou fot?​—Lik 16:10.