Let pour bann Romen 2:1-29
2 Alor ou, nenport ki ki ou ete, ou napa okenn leskiz si ou ziz lezot, parski ler ou ziz ou kanmarad, ou pe kondann ou prop lekor parski ou pe pratik menm keksoz.
2 Nou konnen ki Bondye i ziz bann ki pratik sa bann keksoz e son zizman i an armoni avek laverite.
3 Me ou, ou ziz bann ki pratik sa bann keksoz kan ou menm ou pe fer parey, eski ou krwar ou pou sap zizman Bondye?
4 Eski ou mepriz gran labonte, tolerans ek pasyans Bondye akoz ou pa realize ki Bondye dan son labonte pe esey ed ou pour repantir?
5 Parski ou antete e ou pa oule repantir, ou pe provok lakoler Bondye. I pou montre son lakoler zour ki i pou ziz limanite dan en fason zis.
6 I pou fer sakenn peye pour sa ki i’n fer:
7 lavi eternel pour sa bann ki pe rod laglwar, loner ek imortalite par demontre landirans dan sa ki byen,
8 me pinisyon ek lakoler Bondye pour sa bann ki kontan dispit, bann ki pa fer sa ki annakor avek laverite me ki fer sa ki mal.
9 Tou dimoun ki fer bann move keksoz pou dan ladetres ek soufrans, premyerman bann Zwif e apre bann Grek osi,
10 me laglwar, loner ek lape i pour tou bann ki fer sa ki byen, bann Zwif premye e apre bann Grek osi.
11 Parski Bondye pa fer lapreferans.
12 Parski tou bann ki pa anba lalwa e ki fer pese pou mor menm si zot pa anba lalwa, me tou bann ki anba lalwa ki fer pese pou ganny zize par lalwa.
13 Parski i pa bann dimoun ki tann sa ki lalwa i dir ki drwat devan Bondye, me i sa bann ki fer sa ki lalwa i demande ki pou ganny aprouve konman drwat.
14 Parski ler bann dimoun lezot nasyon ki napa lalwa Bondye i fer bann keksoz ki dan lalwa lo zot menm, menm si zot napa lalwa, se konmsi i annan en lalwa dan zot menm.
15 Sa bann dimoun i demontre ki lalwa in ganny ekrir dan zot leker, zot konsyans osi i montre ki sa i leka, sanmenm zot prop panse i akiz zot oubyen menm eskiz zot.
16 Dapre sa bon nouvel ki mon pe anonse, sa pou arive ler Bondye atraver Kris Zezi pou ziz bann keksoz ki bann imen in gard sekre.
17 Aprezan, si ou dir ki ou en Zwif, ou depan lo lalwa, ou fyer akoz ou Bondye,
18 ou konn lavolonte Bondye, ou’n arive konpran sa ki vreman bon akoz ou’n ganny enstrir dapre Lalwa,
19 ou konvenki ki ou en gid pour bann aveg, ou en lalimyer pour sa bann ki dan fernwanr,
20 ou koriz bann ki pa rezonnab, ou ansenny bann zanfan e ou annan en konprenezon de baz lo konnesans ek laverite ki dan Lalwa . . .
21 Me ou ki pe ansenny lezot, akoz ou pa ansenny ou prop lekor? Ou ki pe ansennyen, “Pa vole,” eski ou vole?
22 Ou ki dir, “Pa komet adilter,” eski ou komet adilter? Ou ki deteste bann zidol, eski ou vole dan bann tanp?
23 Ou ki fyer akoz lalwa, eski ou dezonor Bondye par kas Lalwa?
24 Zis parey i’n ganny ekrir: “Bann nasyon pe koz an mal lo non Bondye akoz zot.”
25 Anfet, sirkonsizyon i anmenn byenfe selman si ou pe kontinyen obei lalwa, me si ou pe kas lalwa, i konmsi ou pa’n ganny sirkonsi.
26 Alor, si en dimoun ki pa sirkonsi i swiv bann standar drwat ki dan Lalwa, menm si i pa’n ganny sirkonsi, i pou konmsi i’n ganny sirkonsi, pa i vre?
27 En dimoun ki pa’n ganny sirkonsi ki fer sa ki Lalwa i demande i kondann ou parski ou kas lalwa menm si ou annan bann lalwa an ekri e ou’n ganny sirkonsi.
28 Parski i pa laparans en dimoun ki fer li vin en vre Zwif e vre sirkonsizyon i pa sa enn ki ganny fer lo lekor.
29 Me se sa ki dan leker ki fer en dimoun vin en vre Zwif e vre sirkonsizyon i sirkonsizyon leker par lespri sen e non pa par bann lalwa an ekri. Sa dimoun pou ganny onore* par Bondye me pa par zonm.
Bann not
^ Literalman, “loue.”
