Agay 1:1-15
1 Lo premye zour, sizyenm mwan, dezyenm lannen ki Daryis ti lerwa, Zeova ti anvoy en mesaz atraver profet Agay* pour gouverner Zida, Zorobabel ki garson Sealtyel e pour Granpret Zozye ki garson Zeozadak. I ti dir:
2 “La sa ki Zeova Sef larme i dir, ‘Sa bann dimoun i dir, “Letan pa ankor arive pour lakaz* Zeova ganny konstrir.”’”*
3 Ankor en fwa, Zeova ti koz avek profet Agay. I ti dir:
4 “Eski la i en ler pour zot reste dan zot bann zoli lakaz, kan sa lakaz in ganny abandonnen?
5 La sa ki Zeova Sef larme i dir, ‘Reflesi byen* lo zot fason viv.
6 Zot in senm en kantite lagrenn, me zot in rekolte en ptigin. Zot manze, me zot ankor lafen. Zot bwar, me zot ankor swaf. Zot in met lenz lo zot, me zot ankor ganny fre. Sa labourer ki ganny peye i met son larzan dan en sak ki ranpli avek trou.’”
7 “La sa ki Zeova Sef larme i dir, ‘Reflesi byen* lo zot fason viv.’
8 “Zeova i dir, ‘Al lo montanny e rod dibwa. Konstri mon lakaz, pour ki mon ganny glorifye e ki sa lakaz i fer mwan plezir.’”
9 “La sa ki Zeova Sef larme i dir, ‘Zot ti pe ekspekte en bon rekolt me zot ti ganny en ptigin e ler zot ti anmenn li dan zot lakaz, mon ti soufle li e fer li disparet. Pour ki rezon? Parski mon lakaz in vin en ta debri, tandis ki zot tou zot okipe pe pran swen avek zot prop lakaz.
10 Pour sa rezon, lesyel pa’n donn zot son laroze e later pa’n donn zot son rekolt.
11 Mon ti fer lasesres vin lo later ek lo bann montanny, sa ti fer ki i ti napa dible, nouvo diven, delwil ek plant. Bann imen ek troupo ti soufer e tou zot travay ti anven.’”
12 Zorobabel ki garson Sealtyel ek Granpret Zozye ki garson Zeozadak ek tou lezot dimoun ti ekout Zeova zot Bondye ek profet Agay, parski Zeova zot Bondye ti’n anvoy li e bann dimoun ti konmans annan en gran respe pour Zeova.
13 Apre sa, dapre misyon ki i ti’n gannyen avek Zeova, Agay, mesaze Zeova ti dir bann dimoun: “La sa ki Zeova i dir, ‘Mon avek zot.’”
14 Alor Zeova ti motiv* gouverner Zida, Zorobabel ki garson Sealtyel ek Granpret Zozye ki garson Zeozadak ek tou bann dimoun. Zot ti vin travay lo lakaz Zeova Sef larme, zot Bondye.
15 Zot ti konmans sa travay vennkatriyenm zour, sizyenm mwan dan dezyenm lannen ki Daryis ti lerwa.
Bann not
^ Oubyen “Agze.” Sa non i vedir “Ne zour en lafet.”
^ Oubyen “tanp.”
^ Oubyen “rekonstri.”
^ Literalman, “Fikse ou leker lo ou semen.”
^ Literalman, “Fikse ou leker lo ou semen.”
^ Literalman, “lev lespri.”
