Premye liv Samyel 29:1-11
-
Bann Filisten pa fye David (1-11)
29 Bann Filisten ti rasanble zot larme e etabli zot kan Afek, tandis ki bann Izraelit zot, zot ti etabli zot kan Zezreel o bor en sours delo.
2 Bann sef Filisten ti pe pase avek zot bann group san solda ek mil solda e David ek son bann zonm ti pe mars deryer avek Akis.
3 Me bann prens Filisten ti dir: “Akoz sa bann Ebre i la?” Akis ti reponn zot: “Sa David, ki serviter Sail, lerwa Izrael. I’n kit son kan e i fer plis ki enn an ki i avek mwan. Depi zour ki i’n vin kot mwan ziska ozordi, mon pa’n vwar nanryen mal avek li.”
4 Me bann prens Filisten ti ankoler avek li e zot ti dir li: “Fer sa zonm retournen. Fer li retourn dan sa landrwa ki ou’n donn li. Pa bezwen les li desann avek nou pour al lager, koumsa i pa pou kapab vir kont nou pandan lager. Parski pli bon fason pour li reganny laprouvasyon son senyer se par donn latet nou bann zonm.
5 Pa li menm li sa David ki zot ti sant lo la ler zot ti danse e dir:
‘Sail in touy plizyer milye lennmi,E David li, plizyer dizenn milye lennmi’?”
6 Alor Akis ti fer kriy David e i ti dir li: “Mon fer serman o non Zeova sa Bondye vivan, ki ou en zonm drwat. Mon ti pou’n kontan pour ou form parti mon larme pandan sa kanpanny militer, parski mon pa’n vwar nanryen mal avek ou depi zour ki ou’n vin kot mwan ziska ozordi. Me lezot sef napa konfyans dan ou.
7 Alor retourn anpe e pa bezwen fer nanryen ki kapab fer bann sef Filisten mekontan.”
8 Me David ti dir Akis: “Akoz, ki mon’n fer? Konman ou serviter, ki mon’n fer mal depi zour ki mon’n vin kot ou ziska ozordi? Akoz mon pa devret vin avek ou e lager kont bann lennmi mon senyer lerwa?”
9 Akis ti reponn David: “Mwan, mon vwar ou konman en bon dimoun, parey en lanz Bondye. Me bann prens Filisten in dir, ‘Pa bezwen les li mont avek nou pour al lager.’
10 Aprezan, ou ek bann serviter ou lerwa ki’n vin avek ou, lev boner, met zot pare e ale konman lizour i fer.”
11 Alor David ek son bann zonm ti lev granmaten pour retourn dan pei bann Filisten. Bann Filisten zot, zot ti mont Zezreel.
