Premye liv Samyel 21:1-15
21 Pli tar, David ti ariv Nob kot pret Aimelek ti reste. Ler Aimelek ti vwar David, i ti konmans tranble avek lafreyer e i ti dir li: “Akoz ou ou tousel e akoz napa personn avek ou?”
2 David ti reponn pret Aimelek: “Lerwa ti demann mwan pour fer en keksoz, me i ti dir, ‘Pa les personn konn okenn keksoz konsernan sa misyon ki mon pe anvoy ou pour fer e ni menm konsernan bann lenstriksyon ki mon’n donn ou.’ Mon’n fer laranzman pour zwenn mon bann zonm en landrwa.
3 Alor si ou annan senk dipen, silvouple donn mwan. Si non, donn mwan sa ki ou annan.”
4 Me sa pret ti reponn David: “Napa dipen normal isi, me i annan dipen sakre. Bann zonm i kapab manze si zot pa’n annan relasyon seksyel avek bann madanm resaman.”
5 David ti reponn sa pret: “Zis parey lezot fwa ler mon ti al lo en kanpanny militer, nou pa’n annan okenn relasyon seksyel avek bann madanm. Alor si lekor sa bann zonm i sen menm ler zot al lo en misyon ordiner, pa zot pou pli sen ankor ozordi!”
6 Alor pret ti donn li sa dipen sakre parski se tou ki i ti annan. I ti donn li dipen sakre* ki ti’n ganny tire devan Zeova e ki ti’n ganny ranplase menm zour avek dipen ki ti’n fek ganny fer.
7 Enn bann serviter Sail ti laba sa zour. I ti’n oblize reste devan Zeova. I ti apel Doeg, i ti sorti Edonm e i ti sef bann berze Sail.
8 Apre sa, David ti demann Aimelek: “Eski ou annan en lans oubyen en lepe isi? Mon pa ti pran mon lepe ni mon bann zarm, parski misyon lerwa ti irzan.”
9 Pret ti reponn li: “Lepe Golyat sa Filisten ki ou ti touye dan Vale Ela, i la, anvlope dan en latwal par deryer efod.* Si ou anvi pran, pran, parski se tou ki annan la.” David ti dir: “Napa en lot lepe ki parey sa enn. Donn mwan.”
10 Sa zour, David ti leve e kontiny son larout pour sov lwen avek Sail. Finalman i ti ariv kot Akis ki ti lerwa Gat.
11 Bann serviter Akis ti demann li: “Pa David sa, ki lerwa son pei? Pa li menm li sa enn ki zot ti sant lo la ler zot ti danse e dir,‘Sail in touy plizyer milye lennmiE David li, plizyer dizenn milye lennmi’?”
12 David ti reflesi lo sa bann parol e i ti konmans per Akis lerwa Gat.
13 Alor ler i ti avek zot, i ti fer krwar ki i’n perdi lespri e i ti azir parey en dimoun fou parmi zot.* I ti pe fer mark lo bann baro e i ti pe les son labav koul dan son labarb.
14 Finalman, Akis ti dir son bann serviter: “Zot vwar ki sa zonm i fou! Akfer zot bezwen anmenn li kot mwan?
15 Eski napa ase dimoun fou isi pour zot anmenn ankor enn devan mwan? Akfer mon devret les sa zonm antre kot mwan?”
Bann not
^ Oubyen “dipen prezantasyon.”
^ Vwar Leksplikasyon bann mo.
^ Literalman, “dan zot lanmen.”
