Ler Kongregasyon Ronm ti tande ki Pol pe vini, en group frer ti vwayaz apepre 64 kilomet pour al zwenn li. Ki lefe zot lanmour ki pa egois ti annan lo Pol? “Ler i ti vwar zot, Pol ti remersye Bondye e pran kouraz.” (Akt 28:15) Menm si dimoun ti konn Pol konman sa enn ki ankouraz bann kongregasyon ki i ti vizite, ler i ti dan prizon, i ti son tour pour ganny ankouraze.​—2Ko 13:10.

Ozordi, bann sirveyan rezyonal i vizit bann kongregasyon pour ankouraz bann frer ek ser. Parey tou pep Bondye, par ler sa bann sirveyan i santi zot fatige, trakase e dekouraze. Laprosenn fwa ki sirveyan rezyonal ek son madanm i vizit ou kongregasyon, ki ou kapab fer pour ed zot pran kouraz pour ki nou tou nou “kapab ankouraz kanmarad”?​—Ro 1:11, 12.

• Asiste renyon predikasyon. Sirveyan rezyonal i ganny ankouraze ler bann proklanmater i fer bann sakrifis pour ganny bokou byenfe atraver bann aktivite ki ganny fer dan semenn spesyal. (1Tesa 1:2, 3; 2:20). Akoz ou pa fer pionye asistan pandan sa mwan ki i pe vizit ou kongregasyon? Eski ou kapab ofer pour travay avek li ek son madanm dan predikasyon oubyen anmenn zot lo ou letid Labib? Zot kontan travay avek diferan proklanmater enkli bann nouvo oubyen bann ki santi ki zot pa tro konn prese.

• Demontre lospitalite. Eski ou kapab ofer zot en landrwa reste oubyen en repa? Sa i montre sa sirveyan ek son madanm ki ou kontan zot. Zot pa ekspekte okenn keksoz konplike.​—Li 10:38-42.

• Ekout konsey ek gidans ki i donnen e aplike. Avek lanmour, sirveyan i ed nou vwar ki mannyer nou kapab amelyor nou servis pour Zeova. Par ler, i vwar li neseser pour donn bann konsey ferm. (1Ko 5:1-5) I fer li kontan ler nou obei e soumet.​—Ebr 13:17.

• Demontre lapresyasyon. Dir avek sirveyan rezyonal ek son madanm ki mannyer zot zefor in benefisye ou. Ou kapab dir zot avek ou labous ouswa atraver en not oubyen kart.​—Kol 3:15.