Romanos 10:1-21
10 Ãbarã, mʉʉba sõɗeeba kʉ̃ria ɓuu Dachi Akõreba israelɗebenarã karibai. Mauɗeeba mʉʉba ichimaa ʉtaa iɗi ɓuabarii.
2 Mʉʉba jaraaruu ãchiba Dachi Akõre biawãra kuitaa kʉ̃ria panuu. Maamina Dachi Akõreba kʉ̃ria ɓuu ʉ̃rʉbena biꞌiwãe kʉ̃risia panuu.
3 Ãchiba unuɗakau saka Dachi Akõreba ẽbẽrarã ichi jipa nuree baara duanui, ichiba beɗea deaɗa kĩra. Maumaarã mau ida ɓuɗapeɗa ara ãchiba wau panuuba jʉrʉ panuu Dachi Akõre puuru jipa ɓuu baɗai baita.
4 Maamina maka nureaɗai baita, ãchi ley waubachiɗau audeara, Cristoba joma wausii. Chi Cristoɗe ijãaduu Dachi Akõreba jipa nuree unubarii.
5 Moisesba ɓʉsii saka ẽbẽrarã poyaa jipa nureaɗai, chi Dachi Akõreba ichimaa ɓʉbisiiɗeeba. Naka ɓʉsii: «Chi Moisesba ɓʉɗa wau ɓuu, mauba nibai».*
6 Maamina chi Cristoɗe ijãa ɓuu Dachi Akõre daaɗe jipa nuree baarabena bai baita naka jara ɓuu: «Bichi sõɗeeba jararã́se: “¿Kai bajãaɗaa wãi ɓuma?”* (Cristo nau iujãaɗaa neebii baita).
7 Mauɗe kʉ̃risiarã́se: “¿Kai biuɗarã panabadaumaa wãi ɓuma?” (Cristo chokae jiradubii baita)».
8 Maamina Dachi Akõre beɗeaɗe naka ɓʉ kuɓuu: «Bichiba Dachi Akõre beɗea kuitaai aude chaareawẽa ɓuu.* Bichi iiba ichi beɗea jarai ɓuu mauɗe bichi sõɗeeba ijãai ɓuu».* Ichi beɗea daiba naka jaradea panuu jomaurãba ijãaɗamera:
9 Bichi iiba Jesús jomaurã Mechiu aaruubʉrã, mauɗe Dachi Akõreba ichi chokae jiradubiɗa bichi sõɗeeba ijãaruubʉrã, ichiba karibai.
10 Biawãra chi mauba sõɗeeba ijãaruubʉrã, chi Dachi Akõre daaɗe jipa nuree baara ɓuai. Iiba Jesús jomaurã Mechiu aaruubʉrã Dachi Akõreba karibai.
11 Dachi Akõre beɗeaɗe naka ɓʉ kuɓuu: «Chi ichiɗe ijãa ɓuuba bari ijãa ɓuabai».*
12 Dachi Akõre jomaurã Mechiuɗeeba judiorã mauɗe judiowãerã siɗa araɓauɗe waubarii. Ichimaa chi chuburia iɗiiduu joma karibabarii.
13 Dachi Akõre beɗeaɗe naka ɓʉ kuɓuu: «Chi Dachi Mechiumaa chi chuburia iɗiiduu joma karibai».*
14 Maamina ẽbẽrarãba wabiɗa Dachi Mechiu Jesucristoɗe ijãaɗawẽa panuuɗe ¿saka ichimaa chi chuburia ʉtaa iɗiɗaima? Ichi ʉ̃rʉbena wabiɗa ũriɗawẽa panuuɗe ¿saka ijãaɗaima? Mauɗe aɓau biɗa ãchimaa jaradeaɗe wãwẽebʉrã ¿saka ichi ʉ̃rʉbena ũriɗaima?
15 Dachi Akõreba aɓa biɗa bʉiwẽebʉrã, ¿saka jaradeaɗe wãɗaima? Dachi Akõre beɗeaɗe naka ɓʉ kuɓuu: «Chi beɗea bia jaraɗe needuu ãrea biꞌia nuree».*
16 Maamina joma judiorãba chi beɗea bia Cristo ʉ̃rʉbena ijãaɗaabasii. Isaías kartaɗe naka ɓʉ kuɓuu: «Dai Mechiu, daiba jarapeɗaaɗa ¿kaiba ijãasma?»*
17 Biawãra ẽbẽrarãba Cristo ʉ̃rʉbena naa ũriɗai panuu, poyaa ijãaɗai baita.*
18 Maamina mʉʉba iɗiiruu: ¿Judiorãba mau beɗea ũriɗaabaska? Biawãra ũrisiɗau. Dachi Akõre beɗeaɗe naka ɓʉ kuɓuu:
«Ichi ʉ̃rʉbena joma nau iujãaɗe jarasiɗau. Mau beɗea kaitawẽ jaraɗe wãsiɗau».*
19 Mʉʉba waya iɗiiruu: ¿Judiorãba mau beɗea kuitaaɗaka baska? Maerã, kuitaasiɗau judiowãerãba kuitaapeɗaaɗa kĩra. Mauɗeeba Moisesba Dachi Akõreɗeeba judiorãmaa naa jarasii:
«Chi mʉʉba jʉrʉ adauɗawãe puuru kariba ɓuuɗeeba mʉʉba machimaa jiwaabiai mʉ kʉ̃riaɗamera.Chi kĩrabawẽa ɓuu puuru kariba ɓuuɗeeba mʉʉba machi kĩrubikabiai mʉ kʉ̃riaɗamera».*
20 Mauɗe Isaiasba Dachi Akõreɗeeba wapeawẽa naka jarasii:
«Chi mʉ jʉrʉɗawẽa panaɗaba mʉ unusiɗau. Chi mʉ ʉ̃rʉbena iɗiɗawẽa panaɗarãmaa mʉ ʉ̃rʉbena kuitaabiasii».*
21 Maamina israelɗebenarã ʉ̃rʉbena Isaiasba naka jarasii:
«Ewaricha mʉ jua deabachii ẽbẽrarã sõ chaarea nuree mauɗe mʉʉɗe ijãaɗakaurã mʉʉmaa neeɗamera».*
Notas
^ Levítico 18:5.
^ Deuteronomio 30:12.
^ 10:8 Bichiba Dachi Akõre beɗea kuitaai aude chaareawẽa ɓuu. Griego beɗeaɗe naka ɓʉ kuɓuu: Ichi beɗea bichi kaita ɓuu.
^ Deuteronomio 30:11-14.
^ 10:11 Bari ijãa ɓuabai. Griego beɗeaɗe naka ɓʉ kuɓuu: Nejasiawẽma. Isaías 28:16; 1 Pedro 2:6.
^ Joel 2:32.
^ 10:15 Griego beɗeaɗe naka ɓʉ kuɓuu: Chi beɗea bia jaraɗe needuu jʉ̃rʉ ãrea biꞌia nuree. Isaías 52:7. Griego beɗeaɗe chi ɓee kartaɗe ɓʉ kuɓuu: chi jirukaraayuwãe ɓuabibarii beɗea jaraɗe needuu.
^ Isaías 53:1.
^ 10:17 Cristo ʉ̃rʉbena. Griego beɗeaɗe chi ɓee kartaɗe ɓʉ kuɓuu: Dachi Akõre beɗea.
^ Salmos 19:4.
^ Deuteronomio 32:21.
^ Isaías 65:1.
^ Isaías 65:2.
