Yehova Zambi kanazange hanga atu eswe, chipwe ngwe kakwete mwono weswawo alilongese hakutwala kuli iye ni ku Wanangana wenyi. (1 Timoteu 2:3, 4) Ha mukunda wa chino, Yela ja Yehova kakutwihwisa Mbimbiliya ni yikwata yikwo yakulilongesa nayo Mbimbiliya hanga yikwase atu anji, kuchingako ni tunaye. Ululikiso wa Yehova wakutwihwisa mikanda ni yinema a mu unji wa malimi a tunaye kuhiana 100. Mba kuchi twakuhasa kulinga mikanda yacho kuyihana kuli atu? Yika tunalulieka ha kupalika cha mashimbu?

 Mikanda mu malimi a tunaye kakuyilumbununa kuli mandumbu hashi heswe. Hita ndumbu mu chizavu kakuhengwola kanawa mikanda yize anambe kulumbununa. Hanyima, mba matesa chize mahasa kulumbununa sango jacho mu mulimi lia tunaye. Muze mahwisa kuchilinga, ayo kakukopa mikanda yacho mu yinema. Ha mashimbu wano, tuli ni yizavu 60 ya mandumbu waze akulumbununa mikanda mu malimi a tunaye ha shimbu lieswe, yikwo 40 yakukalakala ha amwe mashimbu.

 Kunyima, kulinga yinema mu limi lia tunaye chapwile ni kufwika mbongo jinji. Mumu ma camera ni yikwata yikwo te yikwete ndando yinji kuhiana musono. Chikwo nawa, yinema yacho te kakuyikopela mu studio, yize yapwile ni kufupiwa kuyitunga ni kutungulula mazuwo waze tukwete. Hachino, te mutungastala mbongo kuhiana 30.000 b ya ndolar mba tuse yuma yeswe yize akwa-kulumbununa mu malimi a tunaye mafupiwa.

 Mba tuzachise kanawa milambu, ululikiso wetu wakufupa majila hanga alulieke mulimo wacho aku nawa mashiwisa mutapu wa kulumbunwinamo. Kashika, twakuzachisa yikwata yaha yize yakukalakala kanawa nawa yikwete ndando yashi. Hachino, shimbu alinge studio, yizavu ya akwa-kulumbununa mahasa kululieka chimwe chihela ha kuchiza ulombo wa mafwo a matamba ni kukopa yinema yacho mu chihela muze anakalakalila. Nyi mu chinema muli atu anji, mandumbu mahasa kukopela ku chihela kuze ali chakuhona kuya ku studio.

 Twakulinga nawa ma programa a computador waze akukwasa mandumbu mu mulimo wo. Yino yakwasa kutepulula mashimbu anji waze te mandumbu malinga mba alumbunune mukanda mu limi lia tunaye. Mandumbu jetu kakuzanga chinji kwalumuka chino. Umwe ndumbu yoze avuluka ngwo, Alexander yamba ngwenyi: “Yinema ya mu malimi a tunaye yinatuhuka chinji kuhiana kunyima. Ngunawahilila chinji ha chino. Yami nakutala yinema yacho hita tangwa.”

 Musono, mba tululieke chizavu cha akwa-kulumbununa chakufwika wika mbongo 5.000 ya ndolar. Chino chinatukwase kulinga yinema mu malimi anji a tunaye.

 Muze akwa-kulumbununa akuhwisa kulumbununa umwe mukanda mu limi lia tunaye, yinema yacho yatamba kuheta kuli waze anayifupu. Kunyima, te twakutuhwisa yinema yacho mu kasete ni mu DVD, alioze yino te yakufwika mbongo jinji, ni kumbata mashimbu ni mulimo unji. Yuma yize twapwile ni kukopa te twakuyituma ku yimwe impreza hanga ayilulieke. Hanyima, mba mutuyituma mu yikungulwila. Hachino, ha 2013, tunakangastala mbongo kuhiana 2.000.000 ya ndolar hanga tutuhwise ma DVD mu malimi a tunaye.

 Tunaye te kakuzanga chinji yinema yacho. Alioze, kuchakapwile chashi kuyizachisa, chipi-chipi muze te kwakufupiwa tusete ni ma DVD anji. Ha mashimbu amwe, te kwakufupiwa ma DVD anji hanga akope mukanda umuwika wa Mbimbiliya. Umwe ndumbu mu Brasil avuluka ngwo, Gilnei kanevuluka ngwenyi: “Muze te twakuzanga kutanga chimwe chisoneko, te twakufupa mu kasete yize chili mba tuchiwane. Chapwile ni kukaliwa chinji.” Pangi avuluka ngwo, Rafayane yoze wazachishile ma DVD mu limi lia tunaye, yamba ngwenyi: “Yino te yakuhongesa ha kulinga longeso lia wika. Te twakupalikisa mashimbu anji akufupa wika yisoneko.” Nawa muze mandumbu jetu te akupwa mu munda, ayo kanji-kanji te kakumbata ma DVD hanji tusete aze te mahasa kusolwela atu waze mazanga umwenemwene mu ma TV jo. Mandumbu amwe te kakumbata yisaji yo-ene yize yakwimbisa DVD. Alioze, kulutwe muze yisaji yikehe-yikehe yakwimbishila DVD yatuhukile, mandumbu anji yayilanda hanga apwe ni kuyizachisa. Bobby, yoze watwama mu Estados Unidos, yamba ngwenyi: “Nyi hiwasolola chimwe chisoneko mba himuzanga kusolola nawa chikwo, kanji-kanji te twakwalumuna DVD. Yino te yakumbata mashimbu, nawa te yakukwika uhashi wetu wakuzachisa Mbimbiliya.”

 Ha 2013, Yela ja Yehova katuhwishile aplicativo JW Library Sign Language app, yoze wakukwasa mandumbu kuchiza yinema mu malimi a tunaye ha kuzachisa ma telefone ni ma tablet. Aplicativo wacho kaliangile kuyituhwisa mu limi lia tunaye lia mu America. Kusulaho, ha 2017, yayilulieka hanga munjile malimi anji a tunaye. Mandumbu a hashi heswe kanakawahilila chinji. Juscelino, ndumbu yoze watwama mu Brasil yamba ngwenyi: “Nakomokene chinji! Nanyongene ha chize Chizavu cha Tusongo anasolola zango hali yetu tunaye ni kutukwasa hanga tukole ku ufulielo ngwe chizechene akulinga hali mandumbu waze akuhanjika. Ngunakawahilila chinji, nawa aplicativo yino yakungukwasa kulilongesa chinji Mbimbiliya.”

 Musono twakutuhwisa yinema mu malimi a tunaye ni kuyitetela atu kupalikila mu site yetu ni mu aplicativo JW Library Sign Language. Chino chakukwasa kulumbununa mikanda, kukopa yinema ni kuyihetesa kuli atu ha matangwa wika, hi ha tukweji hanji miaka ko.

 Tala maliji waze akatuka kuli mandumbu ni mapangi jetu tunaye. Pangi yoze avuluka ngwo Klízia, yamba ngwenyi: “Ululikiso wakutuzanga chinji, kashika unatwehe kulia cha ku spiritu mu jila yashi hanga tukole ku ufulielo. Kukushi nichimwe hano hashi chize mututesa ni yize ululikiso wa Yehova unatulingila.” Vladimir yamba ngwenyi: “Yinema yetu yakungukwasa kunyingika ngwo, Yehova kakuzanga tunaye ngwe chizechene akuzanga atu waze akuhanjika.”

 Yinema yetu ya mu malimi a tunaye, kanji-kanji yakuputuka ni maliji wano ngwo: “Mukanda uno hi wakulanjisa ko. Uli wakuzachisa mu mulimo analingi hashi heswe wa kulongesa atu Mbimbiliya, uze akukwasa ni mulambu.” Twakusakwilila chinji ha milambu yize wakuhana, yize yinji anayihanyina ha site donate.jw.org. Milambu yino yakutukwasa kutuhwisa Mbimbiliya ni mikanda yakulumbununa Mbimbiliya yize yakukwasa atu anji, kuchingako tunaye.