1, 2. Mumu liaka twatamba kukanyama ha kusakula yiheho yetu?

ACHINYONGA ngwe unazange kulia umwe muhuko upema, alioze mumona chihanda chikwo chinapolo. Yika mulinga? Shina muulia muhuko weswe hamwe ni chihanda chapola? Shina mumbila muhuko wacho? Nyi muteta chihanda chize chinapolo hanga ulie chize chinapeme?

² Yiheho neyo yili ngwe muhuko wacho. Yiheho yimwe muyihasa kupwa yipema, alioze yikwo yili yipi,  yakusolola utanji, upupilo hanji yuma ya andemoniu. Kashika muze musakula yiheho, hanji muhasa kwamba ngwe: “Yami mwe ngunanyingika yize mungutala. Nawa munguhasa kusakula yiheho yeswayo munguzanga.” Hanji muwamba ngwe: “Shina yiheho yeswe yili yipi?” Nyi shina wakusakula kanawa yiheho yize muyikukwasa kwehuka yuma yipi, ni kukunehena uwahililo?

3. Yika twatamba kulihula ha kusakula yiheho yetu?

³ Yetu eswe twakuzanga kuheha, nawa tunazange hanga tusakule kanawa yiheho yetu. Kashika, twatamba kulihula ngwetu, kuchi yiheho yize twakusakula muyihasa kukwata ha uwayilo wetu kuli Yehova?

4. Shimbi yika ya mu Mbimbiliya yize muyihasa kutukwasa hanga tusakule kanawa yiheho yetu?

⁴ Muze twakulihana kuli Yehova, twakulakenya kumulingila ku mwono wetu weswe. (Tanga Chilumbununyi 5:4.) Yetu twakulakenya ngwetu, mutulinga “yuma yeswe ha uhenya wa Zambi.” (1 A-Korindu 10:31) Chino chinalumbunuka ngwo, twalihana kuli Zambi hi wika ko muze tuli ku kukunguluka hanji mu munda, alioze ni muze tunatwama ku zuwo, hanji tunatale yiheho.

5. Uwayilo wa mutapu uka twatamba kuhana kuli Yehova?

⁵ Yuma yeswe yize twakulinga ku mwono wetu yinatale ha uwayilo wetu ni Yehova. Paulu kalumbunwine yino muze ambile ngwenyi: “Nutumbikile mijimba yenu mulambu wa mwono, usandu, wa kupemena chikolo kuli Zambi.” (A-Roma 12:1) Yesu yamba ngwenyi: “Ukazange Mwene Zambi ye ni mbunge ye yeswe, ni  mwono we weswe, ni kunyonga che cheswe, ni ngolo je jeswe.” (Marku 12:30) Mashimbu eswe, twakuzanga kusa tachi hanga tulingile Yehova ni mbunge yeswe. Ku mashimbu akunyima, muze A-Izalele te akuhana yitapo, Yehova te kakweta hanga ahane tushitu apema. Alioze, nyi te mahana kashitu yoze unayiji hanji mupi ngwe chitapo, Zambi te keshi kutayiza chitapo chacho. (Ulevi 22:18-20) Chizechene nawa, uwayilo wetu muuhasa kupwa upi ku meso ja Yehova. Mumu liaka?

6, 7. Kuchi yiheho yetu muyihasa kukwata ha uwayilo wetu hali Yehova?

⁶ Yehova kanatulweze ngwenyi: “Pwenu asandu, mumu yami nguli musandu.” (1 Petulu 1:14-16; 2 Petulu 3:11) Yehova matayiza wika uwayilo wetu nyi uli usandu, hanji walinanga. (Shimbi Yamuchiali 15:21) Uwayilo wetu kuuchi kupwa walinanga nyi twalinga hanji twanunga ni kutala yiheho yize Yehova akuvwila lwaji, ngwe yuma ya utanji, ya upupilo, hanji ya andemoniu. (A-Roma 6:12-14; 8:13) Kashika, nyi twatala yiheho yacho, Yehova matuvwila kupiha. Chino muchihasa kupihisa uwayilo wetu, ni usepa wetu hali iye.

⁷ Mba kuchi mutuhasa kusakula yiheho yetu ni mana? Shimbi jika ja mu Mbimbiliya jize mujitukwasa kunyingika yiheho yipema ni yipi?

8, 9. Yiheho yika twatamba kwehuka? Mumu liaka?

⁸ Musono kuli yiheho yinji ya mutapu weswe. Akwa-Kristu kakutayiza yiheho yimwe, alioze kuli yiheho yikwo yize ayo keshi kutayiza. Chitangu, tunyingikenu yiheho yize twatamba kwehuka.

 ⁹ Yinema yinji ni site, ni yiheho ya ha TV, ni video games, ni miaso, yakusolola yuma ya sonyi, ni ya upupilo ni ya andemoniu. Yuma yipi kanji-kanji kakuyisolola ngwe yili yipema. Alioze akwa-Kristu kakwehuka kusakula yiheho yize kuyishi kulita ni shimbi ja Yehova. (Yilinga 15:28, 29; 1 A-Korindu 6:9, 10) Nyi twehuka yiheho yino yipi, mutusolola kuli Yehova ngwetu, twakwivwila lwaji yuma yipi.—Samu 34:14; A-Roma 12:9.

10. Kapinda muka mutupwa nenyi nyi twasakula yiheho yipi?

¹⁰ Alioze amwe kakumona ngwe hi chipiko kutala yiheho ya upupilo, ya utanji hanji ya andemoniu. Ayo kakunyonga ngwo: ‘Upi hali uli? Munguhasa kutala wika yuma yacho, alioze chichi keza kayilinga.’ Nyi twapwa ni nyonga lia mutapwau tunaliongo yetu ene. Mbimbiliya yinambe ngwo: “Mbunge yakwonga kuhiana yuma yeswe ni kupiha chikolo.” (Jeremia 17:9) Nyi twatala yiheho yize Yehova keshi kuzanga, kuchi mutuhasa kwamba ngwetu, twakwivwila lwaji yuma yacho? Nyi twanunga ni kutala yuma yacho, mutuputuka kuyimona ngwe yinapeme. Hakupalika cha mashimbu, mbunge yetu muyikala, nawa kuyichi kututoweza muze mutulinga chuma chipi.—Samu 119:70; 1 Timoteu 4:1, 2.

11. Kuchi mukanda wa A-Ngalashia 6:7 muuhasa kutukwasa kusakula kanawa yiheho yetu?

¹¹ Liji lia Zambi linatulweze ngwo: “Cheswacho mutu makuwa, chenacho makacha nawa.” (A-Ngalashia 6:7) Che kwamba, nyi twanunga ni kutala yiheho yipi, kulutwe lia matangwa ni yetu mutulinga yuma yipi. Chakutalilaho, atu amwe ha kutala chinji yiheho ya utanji, ayo yalinga utanji. Alioze, Yehova kakutwaha ukwaso uze tunafupu hanga tusakule kanawa yiheho yetu.

12. Yika muyitukwasa hanga tukwate yiyulo yipema hakutwala ku yiheho yetu?

¹² Yiheho yimwe Yehova keshi kuyitayiza, kashika, twatambile kuyitala. Mba yika mutulinga nyi kutushi ni shindakenyo hakutwala ku chimwe chiheho? Yehova keshi kutwaha katalilo wa yize mutuhasa kutala ni yize kutwatambile kutala, hanji kupanjika, chipwe kutanga. Alioze, iye kanazange hanga tukaule mbunge yetu ya kufumba ni shimbi ja mu Mbimbiliya. (Tanga A-Ngalashia 6:5.) Yehova kakutwaha shimbi, hanji umwenemwene uze wakutulongesa chize iye akunyonga ha hita chikuma. Shimbi jacho jakutukwasa kufumba mbunge yetu. Jakutukwasa kunyingika ‘upale wa Yehova’ hanga tuhase kukwata yiyulo yize muyimupemena.—A-Efwesu 5:17.

13. Mumu liaka akwa-Kristu akukwata yiyulo yalisa hakutwala ku yiheho? Alioze yika akwa-Kristu eswe atamba kulinga?

¹³ Kanji-kanji, yiheho yize umwe mukwa-Kristu masakula, muyihasa kulisa ni yize mukwo masakula. Mumu liaka? Mumu yetu eswe twakuzanga yuma yalisa. Nawa mutu umwe mahasa kutayiza yuma yize mukwo keshi kutayiza. Chipwe chocho, mba akwate yiyulo yipema, akwa-Kristu eswe katamba kukaula shimbi ja mu Mbimbiliya. (A-Fwilipu 1:9) Shimbi ja mu Mbimbiliya, jakutukwasa kusakula yiheho yize Zambi akutayiza.—Samu 119:11, 129; 1 Petulu 2:16.

14. (a) Mumu liaka chili chilemu kutesa mashimbu waze mutupalikisa ha yiheho? (b) Chiyulo chika Paulu ahanyine kuli akwa-Kristu?

¹⁴ Chuma chikwo chize twatamba kunyonga chili mashimbu waze twakupalikisa ha kutala yiheho.  Mumu mashimbu waze mutupalikisa masolola nyi twakulemesa chinji yiheho nyi ka. Yetu akwa-Kristu, kulingila Yehova chili chuma chilemu chinji ku mwono wetu. (Tanga Mateu 6:33.) Alioze nyi kutwakanyamine, mutuhasa kukisa mashimbu anji ha kutala yiheho. Paulu katowezele akwa-Kristu ngwenyi: “Talenu kanawa ku kwenda chenu. Kanda nwenda ngwe waze keshi mana, alioze endenu ni mana. Kuulenu we mwaka.” (A-Efwesu 5:15, 16) Kashika, twatamba kutesa mashimbu waze mutupalikisa ha yiheho, ni kusa shindakenyo ngwetu, kulingila Zambi chili chuma chilemu chinji ku mwono wetu.—A-Fwilipu 1:10.

15. Kuchi mutuhasa kulifunga ku yiheho yize muyihasa kupihisa usepa wetu ni Yehova?

 ¹⁵ Kwamba pundu, twatamba kwehuka yiheho yize Yehova akwivwila lwaji. Mba yika mutwamba ha yiheho yize twakumona ngwe kuyapihile chinji? Shina twatamba kukeya, nyi ka? Achinyonga ha chino. Nyi unende mu tapalo lize lili ni chimbongo kusesa, shina mununga ni kukundama kusesa? Ka. Nyi wakulemesa mwono we, uchi kukundama ku chimbongo chacho. Chino chinalite ni kusakula chetu cha yiheho. Liji lia Zambi linambe ngwo: “Chiza kulu lie ku yipi.” (Yishima 4:25-27) Kashika, kutushi kwehuka wika yiheho yize tunanyingika ngwetu yili yipi, alioze twatamba kwehuka nawa yiheho yeswe yize twakumona ngwe muyihasa kupwa yipi, nawa muyihasa kupihisa usepa wetu ni Yehova.

16. (a) Yuma yika yize Yehova akuvwila lwaji? (b) Kuchi mutuhasa kusolola ngwetu twakuvwila kole yize Yehova akuvwila lwaji?

¹⁶ Mukwa-kwimba masamu kasonekene ngwenyi: “Yenu eswe nwakuzanga Yehova vwilenu lwaji yuma yipi.” (Samu 97:10) Mbimbiliya yinatulongesa chize Yehova akunyonga ni chize akwivwa. Lihule ngwe, kuchi yuma nakutanga muyihasa kungukwasa kumona yuma ngwe chize Yehova akuyimona? Chakutalilaho, twakulilongesa ngwo, Yehova lwaji akuvwila “kanwa lia mahuza; moko akushiha mutu chitela chakuhi; mbunge ya kutaka manyonga a uhenge; molu akutambukila mu yuma yipi.” (Yishima 6:16-19) Twakulilongesa nawa ngwo, twatamba kwehuka “utanji, . . . kukombelela mahamba, kupanda, . . . ukwa [chipululu], ufwatulo, . . . lufwachinda,  ungalwe, kuzengewa, . . . ni yuma yeswe ya kulifwa ni yino.” (A-Ngalashia 5:19-21) Wamona chize shimbi jino ja mu Mbimbiliya mujihasa kukukwasa hanga usakule kanawa yiheho ye? Tunazange kukaula shimbi ja Yehova ha yuma yeswe yize mutulinga ku mwono wetu, chipwe muze tuli ni akwetu chipwe ukawetu. (2 A-Korindu 3:18) Chochene, yuma yize twakusakula muze tuli ukawetu yakusolola chize yetu twapwa mu mbunge.—Samu 11:4; 16:8.

17. Shimbu kanda tuchisakula yiheho, yihula yika twatamba kulihula?

¹⁷ Muze muzanga kusakula yiheho yize mutala, lihule ngwe: Kuchi yiheho yino muyihasa kukwata ha usepa wami ni Yehova? Nawa kuchi muyikwata ku mbunge yami? Tutalenu shimbi jikwo jize mujihasa kutukwasa kusakula kanawa yiheho yetu.

18, 19. (a) Utowezo uka Paulu ahanyine kuli akwa-Kristu? (b) Shimbi jika mujitukwasa kusakula yiheho yipema?

¹⁸ Muze twakusakula yiheho yetu, twakusakula yuma yize muyinjila mu manyonga jetu. Paulu kasonekene ngwenyi: “Yeswayo yamwenemwene, yeswayo kuyishi lwelia, yeswayo ya ululi, yeswayo yitoma, yeswayo yatela kufwila, yeswayo ya lufuma mupema; nyi kuhiana chimwe chiliko, ni uhaliso umwe uliko, nyongenu ha yino yuma.” (A-Fwilipu 4:8) Nyi twapwa ni manyonga apema, mutuhasa kwamba ngwetu: “Maliji a mu kanwa liami, ni kupukuna cha mbunge yami chikapeme kumeso je, yena Yehova.”—Samu 19:14.

¹⁹ Achilihule ngwe: ‛Yuma yika nakwecha hanga yinjile mu mbunge yami? Muze hinahwisa kutala chinema hanji chiheho, shina nakwivwa kuwaha ni  kuhuzuluka mu mbunge? Shina nakupwa ni sambukila, ni mbunge yipema ku meso ja Zambi? (A-Efwesu 5:5; 1 Timoteu 1:5, 19) Shina nakuhasa kulemba kuli Zambi ni mbunge yitoma? Nyi nakwivwa yikola ku mbunge? Shina yiheho yami yakungwaha usolo wa kulinga ungulungulu hanji utanji? (Mateu 12:33; Marku 7:20-23) Ha yiheho yize nakusakula, shina nakwenda kulita “ni ndako ja mwakono”? (A-Roma 12:2) Kumbululo lingunu ha yihula yino mulitukwasa kumona yize twatamba kulinga hanga tukolese usepa wetu ni Yehova. Tunazange kulemba ngwe chize mukwa-kwimba masamu alembele ngwenyi: “Tewulula kama meso jami, kanda atala yuma yamokomoko.” *—Samu 119:37.

20, 21. Mumu liaka twatamba kunyonga hali akwetu muze mutusakula yiheho yetu?

²⁰ Shimbi yikwo yilemu yize twatamba kunyonga yili yino: “Kuli yami yuma yeswe yinalite ni shimbi; alioze hi yuma yeswe ko yinatambe. Yuma yeswe yinalite ni shimbi; alioze yuma yeswe kuyishi kukolesa. Niumwe kanda afupa kufumbuka chenyi mwene, alioze mutu mweswe akafupe kufumbuka cha mukwo.” (1 A-Korindu 10:23, 24) Chipwe ngwe tuli ni utuswilo wa kulinga chimwe chuma kuchalumbunukine ngwo twatamba kuchilinga. Twatamba kunyonga kanawa ha chize yiyulo yetu muyikwata hali mandumbu jetu.

²¹ Mbunge jalisa. Chakutalilaho, mbunge ye hanji  muyihasa kukwecha hanga utale chimwe chinema. Alioze yena munyingika ngwo chinema chacho chakupinjisa mbunge ya umwe ndumbu. Yika mulinga? Chipwe ngwe uli ni utuswilo wakutala chinema chacho, yena muhasa kwecha kuchitala. Mumu liaka? Mumu yena kuwazangile “kuvulumuna mandumbu”—hanji ‘kuvulumuna Kristu.’ (1 A-Korindu 8:12) Yetu kutwazangile kulinga yuma yize muyitalingisa mandumbu jetu akwa-Kristu.—A-Roma 14:1; 15:1; 1 A-Korindu 10:32.

22. Kuchi mutuhasa kusolola ngwetu twakuvumbika nyonga lia akwetu hakutwala ku yize akusakula?

²² Chikwo nawa, yika mulinga nyi mbunge ye kuyichi kukwecha kutala, kutanga hanji kulinga yuma yize akwenu akumona ngwe yili yipema? Ha mukunda wa zango lie ni vumbi hali mandumbu je, kuuchi kwashinjila hanga alinge yuma yize yena wakuzanga hanji wakusakula. Mutu yoze wakwendesa mashinyi kananyingika ngwenyi, akwo mahasa kwendesa kafuji-fuji hanji hakehe-hakehe kuhiana iye, alioze iye nihindu kanendesa kanawa. Chizechene nawa, yena ni mandumbu je munuhasa kukaula usongwelo wa mu Mbimbiliya, chipwe ngwe munuhasa kupwa ni manyonga alisa hakutwala ku yiheho yize nwatamba kusakula.—Chilumbununyi 7:16; A-Fwilipu 4:5.

23. Yika muyitukwasa hanga tusakule kanawa yiheho yetu?

²³ Mba yika muyitukwasa hanga tusakule kanawa yiheho yetu? Muze mutuzachisa kanawa mbunge yetu yakufumba ni shimbi ja mu Mbimbiliya, ni kunyonga hali mandumbu jetu, yino muyitukwasa hanga tusakule kanawa yiheho yetu. Mba nyi twalinga chino, mutuwahilila hakunyingika ngwetu, tunalingi “yuma yeswe ha uhenya wa Zambi.”