LONGESO 17

Yesu Kuchi Apwa?

KWAZULULA

Yesu Kuchi Apwa?

Muze twakulilongesa hakutwala ku yuma yize Yesu ambile ni yize alingile hano hashi, twakunyingika yitanga yenyi yipema yize yakutukundamisa kuli Tato, Yehova. Yitanga yika yenayo? Chikwo nawa, kuchi mutuhasa kwimbulula Yesu ku mwono wetu?

1. Mu jila yika Yesu alifwa ni Tato?

Muze apwile mu malilu, Yesu katwamine tununu a tununu a miaka ni Tato ni kulilongesa yuma yinji kuli iye. Kashika Yesu akuhasa kunyonga ni kulinga yuma ngwe Tato. (Tanga Yoano 5:19.) Kwamba pundu, Yesu kakwimbulula yitanga ya Tato ni ungunu weswe, kashika ambile ngwenyi: “Yoze wangumona, hamona mwe Tata.” (Yoano 14:9) Muze munyingika utu wa Yesu, munyingika kanawa Yehova. Chakutalilaho, keke yize Yesu evwilile atu, yakusolola chize Yehova akwivwa hali yena.

2. Kuchi Yesu asolwele ngwenyi kakuzanga Yehova?

Yesu yamba ngwenyi: “Alioze hanga akwa hashi akanyingike ngwe nakuzanga Tata; chizechene ngwe Tata wanguhele shimbi, chocho nakulinga.” (Yoano 14:31) Muze Yesu apwile hano hashi, kasolwele ngwenyi kakuzanga Tato ha kumwononokena chipwe ha mashimbu akalu. Chikwo nawa, Yesu te kakuzanga chinji kuhanjika hakutwala kuli Tato ni kukwasa akwo hanga apwe masepa ja Yehova.—Yoano 14:23.

3. Kuchi Yesu asolwele ngwenyi kakuzanga atu?

Mbimbiliya yinambe hali Yesu ngwo, ‘kuwahilila chenyi chapwile kuli ana ja atu.’ (Yishima 8:31) Iye kasolwele zango liacho ha kukolweza atu ni kwakwasa. Yikomokeso yize iye alingile, kuyasolwele wika ndundo jenyi, alioze yasolwele nawa keke yenyi. (Marku 1:40-42) Iye kapwile ni kuzanga atu chakuhona katonde. Maliji jenyi kapwile ni kutakamisa ni kuhana kutalatala kuli atu waze apwile ni kumupanjika. Yesu yatayiza kumona lamba ni kufwa mumu lia zango lienyi hali atu. Alioze iye kakuzanga chinji atu waze akukaula malongeso jenyi.—Tanga Yoano 15:13, 14.

NYINGIKA NAWA

Nyingika nawa yuma yikwo hakutwala ku utu wa Yesu. Tala nawa chize muhasa kwimbulula zango ni utu wenyi.

4. Yesu kakuzanga Tato

Chilweza cha Yesu chinatulongesa chize mutuhasa kusolola zango lietu hali Zambi. Tanga Luka 6:12 ni Yoano 15:10; 17:26. Muze munutanga yisoneko yino mba munushimutwina chihula chino:

Kuchi mutuhasa kwimbulula Yesu ni kusolola zango lietu hali Yehova?

Yesu te kakuzanga Tato wa mu malilu kashika apwile ni kulemba kuli iye mashimbu eswe

5. Yesu kakulihulumba hali atu waze anamono lamba

Yesu kapwile ni kusa upale wa akwo kulutwe kuhiana upale wenyi mwene. Chipwe muze te hijamuhwa, nihindu te kakusa tachi hanga akwase akwo. Tanga Marku 6:30-44, mba nushimutwine yihula yino:

Kulita ni lusango yono, mu milali yika Yesu alihulumbile hali akwo?—Tala versu 31, 34, 41, ni 42.
Yika yalingishile Yesu mba akwase atu?—Tala versu 34.
Yesu kakwimbulula yitanga ya Yehova, yika chino chinakulongesa hali Yehova?
Mu mulali uka mutuhasa kwimbulula kulihulumba cha Yesu hali atu?

6. Yesu kapwa chihanyi

Chipwe ngwe Yesu kakapwile ni yikumba yinji, nihindu kapwile ni kulianyina ni akwo yuma yize apwile nayo. Kashika, Yesu kanatukolweza hanga ni yetu tupwe yihanyi. Tanga Yilinga 20:35, mba nushimutwine chihula chino:

Kulita ni maliji a Yesu, kuchi mutuhasa kupwa ni uwahililo?

Tala CHINEMA, mba nushimutwine chihula chinahateho.

CHINEMA: “Shinaho Kuhana”—Chinema Chikehe (4:00)

Mu mulali uka mutuhasa kupwa yihanyi, chipwe ngwe kutushi ni yikumba yinji?

Unachinyingika nyi?

Mbimbiliya yinatukolweza kulemba kuli Yehova mu jina lia Yesu. (Tanga Yoano 16:23, 24.) Muze twakulemba chocho, twakusolola ngwetu tunasakwilila Yesu ha yize alingile hanga atukwase kupwa masepa ja Yehova.

ATU AMWE KAKWAMBA NGWO: “Zambi keshi kulihulumba ha lamba lietu.”