Asonekene Yoano 9:1-41
9 Muze Yesu te anapalika, yamona mutu yoze wasemukine kapuputa.
2 Chocho tumbaji twenyi yamuhula ngwo: “Longeshi, iya wavulumwine mba mutu yono asemuke kapuputa, shina mwene, nyi yisemi jenyi?”
3 Yesu yakumbulula ngwenyi: “Lunga yono kakavulumwine chipwe yisemi jenyi kakavulumwine, alioze chinakalingiwa hanga milimo ya Zambi yisoloke hatoma muli iye.
4 Twatamba kulinga milimo ya Yoze wangutumine shimbu kuchili mwalwa; mumu ufuku uneza, muze mutu niumwe kechi kuhasa kukalakala.
5 Shimbu nguchili hano hashi, nguli pangu lia hashi.”
6 Muze hamba chino, yafwila mate hashi, yaachinga ni mavu, mba yakwita mavu* jacho mu meso ja kapuputa,
7 yamba kuli iye ngwenyi: “Yako usane mu chitende cha Sailome” (linalumbunuka ngwo, “Yoze Atumine”). Chocho kapuputa yaya, yasana, yafuna kanamono.
8 Mba enyembo ni atu waze apwile ni kumumona kanete* yuma, yaputuka kuhula ngwo: “Mutu yono hi yoze ko te wakutwama ni kwitata yuma?”
9 Amwe yamba ngwo: “Iye lume.” Eka ngwo: “Hi iye ko, alioze kalifwa nenyi.” Lunga yamba ngwenyi: “Yami lume.”
10 Chocho yamuhula ngwo: “Mba kuchi meso je alaula?”
11 Iye yakumbulula ngwenyi: “Mutu yoze avuluka ngwo Yesu, mwe wachinganga mate ni mavu, yangukwitawo mu meso, yangulweza ngwenyi: ‘Yako usane ku Sailome.’ Chocho yinguya, yingusana mba yinguputuka kumona.”
12 Hachino, o yamuhula ngwo: “Mutu wacho kulihi ali?” Iye yaakumbulula ngwenyi: “Chanyingikine kuze ali.”
13 Mba ayo yatwala mutu yoze wapwile kapuputa kuli A-Fwariseu.
14 Tangwa lize Yesu achingile mate ni mavu ni kumulawisa meso, liapwile lia Sambata.
15 Kashika, A-Fwariseu no yaputuka kuhula mutu wacho chize meso jenyi alawile. Iye yaakumbulula ngwenyi: “Iye kachinganga mate ni mavu, yangukwitawo mu meso, yinguya ni kusana, haliapwila ngunahase kumona.”
16 Mba amwe a kuli A-Fwariseu yamba ngwo: “Lunga yono hi wa kuli Zambi ko, mumu keshi kufunga tangwa lia Sambata.” Akwo yamba ngwo: “Kuchi mutu yoze uli chivulumunyi, mahasa kulinga yuma ya mutapu au?” Chocho yikupwa kulihandununa hakachi ko.
17 Mba yahula cheka kuli kapuputa ngwo: “Amu alawisanga meso je, yika muwamba hakutwala kuli iye?” Mutu wacho yakumbulula ngwenyi: “Iye kali profeta.”
18 Alioze, A-Yunda kakatayijile ngwo kapwile kapuputa haliapwila haputuka kumona, ndo muze asanyikine yisemi ja mutu yoze alawishile meso.
19 Yaahula ngwo: “Shina yono kali mwanenu yoze wasemukine kapuputa? Kuchi mba haliapwila haputuka kumona?”
20 Yisemi jenyi yakumbulula ngwo: “Tunanyingika ngwetu yono kali mwanetu, chikwo nawa, kanakasemuka kapuputa.
21 Alioze kutwanyingikine chize chapwanga mba aputuke kumona haliapwila, kutwanyingikine chipwe yoze walawisanga meso jenyi. Muhulenu. Ngwami hakola. Mahasa kuhanjika mwene.”
22 Yisemi jenyi kambile chocho mumu te kanevu woma wa A-Yunda, mumu A-Yunda kalitesele ngwo mahuma mu sunangonga, mutu mweswawo mafuliela ngwenyi iye kali Kristu.
23 Kashika yisemi jenyi ambile ngwo: “Hakola. Muhulenu mwene.”
24 Chocho, yasanyika chisuho chamuchaali mutu yoze wapwile kapuputa, yamwamba ngwo: “Halisa Zambi, tunanyingika ngwetu lunga yono kali chivulumunyi.”
25 Iye yamba ngwenyi: “Nyi kali chivulumunyi chanyingikine. Chuma ngunanyingika wika chili ngwo, napwile kapuputa, haliapwila ngunamono.”
26 Mba ayo yamba kuli iye ngwo: “Yika kevwe akulinganga? Kuchi alawisanga meso je?”
27 Iye yaakumbulula ngwenyi: “Hinanulweza kulu, alioze kunwangupanjikile. Mumu liaka nunazange kwivwa cheka? Shina ni yenu nunazange kupwa tumbaji twenyi?”
28 Chocho, yamutuka ni kumwamba ngwo: “Yena mwe kambaji wa lunga wacho, alioze yetu tuli tumbaji twa Mose.
29 Tunanyingika ngwetu Zambi kahanjikile ni Mose, alioze lunga yono kutwanyingikine kuze anakatuka.”
30 Mutu wacho yaakumbulula ngwenyi: “Achi kukomoka! Kunwanyingikine kuze lunga wacho anakatuka, chipwe chocho iye kalawisa meso jami.
31 Tunanyingika ngwetu, Zambi keshi kupanjika yivulumunyi, alioze nyi mutu umwe mevwila Zambi woma ni kulinga upale wenyi, iye mamupanjika.
32 Chize ku shakulu, kanda tuchivwa kama nyi limwe tangwa ngwo, umwe walawishile meso ja mutu yoze wasemukine kapuputa.
33 Nyi mutu yono hi wa kuli Zambi ko, kachi kahashile kulinga nichimwe.”
34 Ayo yamukumbulula ngwo: “Yena wasemukine pundu mu shili, chipwe chocho unazanga kutulongesa nyi?” Mba yamuhanga!
35 Yesu yevwa ngwo ayo kahangile mutu wacho, mba muze iye amuwanyine, yamuhula ngwenyi: “Unafuliela muli Mwana-mutu nyi?”
36 Lunga wacho yakumbulula ngwenyi: “Mwene, iye iya, hanga ngumufuliele?”
37 Yesu yamba kuli iye ngwenyi: “Yena unamumono, kwamba pundu, mwe unahanjika ni yena.”
38 Lunga yamba ngwenyi: “Mwene, ngunafuliela muli iye.” Mba yafulamana kumeso jenyi.
39 Yesu yamba ngwenyi: “Hinguneza hano hashi mumu lia umwe usopeso, hanga waze keshi kumona amone ni waze akumona apwe tupuputa.”
40 Amwe A-Fwariseu waze apwile nenyi yevwa yuma yino, mba yamba ngwo: “Shina ni yetu, tuli tupuputa nyi?”
41 Yesu yaamba ngwenyi: “Nyi te nuli tupuputa, kachi te kunuchi kupwa ni mulonga wa shili. Alioze, amu nwakwamba ngwenu: ‘Yetu twakumona,’ shili yenu yinanungu.”
