Yilinga ya Apostolo 4:1-37
4 Shimbu Petulu ni Yoano te machihanjika ni mbunga, asasendote, ni kapitau wa tembele ni A-Satuseu yaakundama kuli ayo.
2 Ayo te kanapihilila mumu apostolo apwile ni kulongesa atu ni kuhanjika zwalala hakutwala ku uhindukilo wa Yesu hakachi ka afu.
3 Chocho yaakwata* yaasa mu zuwo lia ususu ndo muze kwachile, mumu te hikwatoka.
4 Alioze anji a kuli waze evwile liji afulielele, ha kwalula malunga ahetele ku 5,000.
5 Akwa-kuyula, makulwana ni alongeshi a shimbi yalikungulwila mu Yerusaleme,
6 hamwe ni Anase yoze wapwile sasendote wa lutwe, ni Kayafwa, ni Yoano, ni Alexandre, ni eswe a ku munyachi wa sasendote wa lutwe.
7 Ayo yatumbika Petulu ni Yoano mukachi ko yaahula ngwo: “Ni tachi jika hanji mu jina liaya nwalinga yuma yino?”
8 Hohene Petulu yazala too ni spiritu yisandu mba yamba kuli ayo ngwenyi:
“Akwa-kuyula ja atu, ni makulwana,
9 nyi musono nunatusopesa hakutwala ku chitanga chipema chize chalingiwa hali lunga yono chilema, chikwo nawa nunazange kunyingika yoze wamuuka,
10 yenu eswe ni A-Izalele eswe chanutamba kunyingika ngwenu, mutu yono unamana kumeso jenu kahinduka mu jina lia Yesu Kristu Ka-Nazare, yoze nwahachile ha mutondo wa lamba alioze Zambi yamuhindwisa mukachi ka afu.
11 Yono Yesu kali ‘liwe lize yenu tungi nwalitunyine, haliapwila hapwa liwe litangu lia ha mbango.’*
12 Chikwo nawa kukushi ulamwino muli mukwo niumwe, mumu Zambi kahanyine jina lia mutu mukwo kuli atu hano hashi lize mutuhasa kulilamwina nalio.”
13 Ha kumona hamu lia Petulu ni Yoano, akwa-lutwe yaalishimwoka mumu te kananyingika ngwo, kali atu waze kajamine ha kulilongesa.* Mba o yaanyingika ngwo, kapwile hamwe ni Yesu.
14 Alioze ha kumona mutu yoze aukile kanamana mukachi ko, o kahashile nawa kwamba nichimwe.
15 Chocho o yaatuhwisa mu Chota cha Usopelo, mba yaputuka kulihanjikisa umwe ni mukwo,
16 ngwo: “Atu wano kuchi mutwalinga? Mumu atu eswe a mu Yerusaleme kananyingika ngwo, o halinga chikomokeso chinene mukachi ko ni yetu kutwahashile kulikalacho.
17 Alioze mba sango jino jichine kulimwanga hakachi ka atu, twakanjisenu hanga achine kuhanjika nawa kuli mutu niumwe mu jina lino.”
18 Chocho yaasanyika ni kwakanjisa hanga ahone kwamba nichimwe, chipwe kulongesa mu jina lia Yesu.
19 Alioze Petulu ni Yoano yaakumbulula ngwo: “Patulenu yenwene nyi chinalite kumeso ja Zambi kwononokena yenu kuhiana Zambi.
20 Mumu yetu kutwahashile kulitwamina kwambujola yuma yize twamwene ni yize twevwile.”
21 Muze te haakanjisa nawa, yaatusula, se kawanyine chitela mba te aamwese lamba, ni hamukunda wa atu mumu eswe achichimiekene Zambi ha yize yalingiwile.
22 Lunga yoze aukile kupalikila mu chikomokeso* chacho, kapwile ni miaka kuhiana 40.
23 Muze te haatusula, o yaya ni kuliwana ni tumbaji* akwo, mba yalweza yuma yeswe yize asasendote a lutwe ni makulwana ambile.
24 Ha kwivwa liji lino, yaalemba kuli Zambi ni mbunge yimuwika ngwo:
“Mwene, yenu nwatangile malilu ni hashi, ni kalunga-lwiji ni yeswe yize yatwamamo.
25 Yenu nwambile kuli kavumbi kenu Ndawichi kanda kalamba ketu kupalikila mu spiritu yenu yisandu ngwenu: ‘Kuchi te akwa-mavungu analikungulula ni chizungo-zungo, ni e atu anapukuna yuma yamokomoko?
26 Mianangana a hashi halilulieka ni manguvulu hakungulukila hamuwika alimike ni Yehova* ni yoze iye asakwile akapwe Kristu.’
27 Kwamba pundu, mu mbonge yino mwe Heronde ni Poshu Pilatu hamwe ni akwa-mavungu ni A-Izalele akungulukile ni kulimika ni kavumbi kenu musandu Yesu, yoze nwawayishile.
28 Yuma yacho yalingiwile mumu ukwete ndundo, chikwo nawa te yinalite ni upale wenu.
29 Haliapwila Yehova,* tala kama ku kukanjisa cho, hana kama hamu kuli tuvumbi twe hanga anunge ni kwambujola liji lie,
30 shimbu mwolola kwoko lie hanga uuke, ulinge yilayi ni yikomokeso kupalikila mu jina lia kavumbi ke musandu, Yesu.”
31 Muze te halemba* zuwo lize te analikungulwila lianyikine, chocho eswe azalile too ni spiritu yisandu, mba yaputuka kwambujola liji lia Zambi ni hamu.
32 Atu waze afulielele apwile ni mbunge yimuwika ni alma yimuwika.* Niumwe wa kuli ayo wambile ngwenyi, yuma ngulinayo ya yami wika wakuhi, alioze yuma yeswe apwile nayo kapwile ni kulianyinayo umwe ni mukwo.
33 Mba apostolo anungine ni kwambujola ni tachi jinji hakutwala ku uhindukilo wa Mwene Yesu, chocho aawahishile chinji ni chawana cha keke.
34 Kashika, mutu niumwe hakachi ko wahonene chuma wakuhi, mumu eswe waze apwile ni minda hanji mazuwo yayilanjisa yaneha mbongo ja yuma yize alanjishile,
35 ni kujihana kuli apostolo. O yajanyina kuli mutu ni mutu kulita ni kuhona chenyi.
36 Chino che alingile Yosefwe, yoze apostolo alukile jina likwo ngwo, Mbarnabe, (lize linalumbunuka ngwo, “Mukwa-Kutakamisa Akwo”), Ka-Levi, yoze wasemukinyine ku Shipre,
37 neye kapwile ni munda wenyi, chocho yaulanjisa yaneha mbongo ni kujihana kuli apostolo.
Footnotes
^ Hanji “yaakasa.”
^ Chize Alisonekene, “mutwe wa mu mbango lia zuwo.”
^ Hanji “kalongolokele ha sona,” che kwamba ayo kakalilongesele ku mashikola ja A-Yunda. Alioze chino kuchalumbunukine ngwo ayo kapwile mbulutu.
^ Hanji “chilayi.”
^ Hanji “ni atu jo.”
^ Tala Apendice A5.
^ Tala Apendice A5.
^ Hanji “haliumba.”
