Yilinga ya Apostolo 3:1-26
3 Petulu ni Yoano akandukile hamuwika ku tembele ha ola ya kulemba, ye ola* yamuchilivwa,
2 shimbu atu amwe te anambata umwe lunga chilema chize ku kusemuka chenyi. Tangwa ha tangwa lunga wacho te kakumusa hakamwihi ni chikolo cha tembele chize te avuluka ngwo Chikolo Chipema, hanga ete yawana* kuli waze apwile ni kunjila mu tembele.
3 Iye ha kumona Petulu ni Yoano kananjila mu tembele, yeeta yawana.
4 Chocho Petulu ni Yoano yahulikila meso jo hali iye, mba Petulu yamba ngwenyi: “Tala kuli yetu.”
5 Iye yaatala ni kunyonga ngwenyi kota mamwaha chimwe chuma.
6 Chocho Petulu yamba kuli iye ngwenyi: “Prata ni oru chishi nayo, alioze mungukwaha yize nguli nayo. Mu jina lia Yesu Kristu Ka-Nazare, katuka wende!”
7 Mba yamukwata ku kwoko lia chindume yamukatwisa. Hazehene yiliato yenyi ni tunguli-nguli twenyi yiyijikiza.
8 Chocho aye yanyangumuka yakatuka yaputuka kwenda, mba yanjila hamwe no mu tembele ni kwenda ni kutumbwoka ni kuhalisa Zambi.
9 Atu eswe amumwene kanende ni kuhalisa Zambi.
10 Yamusa chinyingi ngwo, yono mwe yoze te wakutwaminyina yawana ku Chikolo Chipema cha ku tembele. Chocho o yaakomoka ha kumona yize yalingiwile.
11 Shimbu mutu wacho te machilikwachilila kuli Petulu ni Yoano, atu eswe yalishimwoka, yazomboka kuli ayo mu chihela chize avuluka ngwo, Mbalanda ya Solomone.
12 Petulu ha kuchimona yamba kuli mbunga ngwenyi: “Yenu A-Izalele mumu liaka nunakomoka ha chikuma chino? Chikwo nawa, mumu liaka nunahulikila meso jenu hali yetu, shina ku tachi ja yetu ene hanji mumu ngwetu twakuwayila Zambi kashika lunga yono enda?
13 Zambi ya Apalahama, ya Izake, ya Yakomba, ni Zambi ya tulamba twetu hanahane uhenya kuli Kavumbi kenyi Yesu, yoze yenu nwakunjikile, nwalitunyineye kumeso ja Pilatu chipwe ngwe iye kazangile kumutusula.
14 Alioze yenu nwalitunyine mwe musandu kanda mukwa-ululi, nwechile akanwehe chingalwe.
15 Chocho yenu nwashihile Kasongo wa Ufulielo Wetu. Alioze Zambi yamuhindwisa hakachi ka afu, yetu tuli yela ha chikuma chino.
16 Lunga yono nunamono yoze nawa nunanyingika, kenda kupalikila mu jina lia Yesu ni ha ufulielo wetu mu jina liacho. Ufulielo uze wakwiza kupalikila muli Yesu wapwisa lunga yono mungunu kumeso jenu.
17 Haliapwila mandumbu ngunanyingika ngwami, nwachilingile mumu ha kwalajala chenu, ngwe chize alingile tusongo twenu.
18 Alioze, Zambi hanamanununa chize aliangile kwamba kupalikila muli aprofeta eswe ngwenyi: Kristu wenyi kumakamona lamba.
19 “Kashika, likonyekenu ni kuhiluka kuli Zambi mba shili yenu akayijimune, hanga miaka ya kuhuzuluka ya kuli Yehova yikeze*
20 ni kunutumina Kristu yoze anutongwelele, Yesu.
21 Yesu mashimbwila mwilu ndo muze Zambi malulieka yuma yeswe yize ahanjikile kupalikila muli aprofeta jenyi asandu a ku shakulu.
22 Mumu Mose wambile ngwenyi: ‘Yehova* Zambi yenu, makanusakwila mukachi ka mandumbu jenu umwe profeta walifwa ni yami. Kashika, nukapanjika ku yeswe yize makanwamba.
23 Ewa, mweswawo* yoze kechi kapanjika Profeta yono, kumakamwonwona hakachi ka atu.’
24 Aprofeta eswe ahanjikile chize kuli Samuele ndo kuli waze asulileko ambujolwele yuma ya matangwa wano.
25 Yenu eswe nuli ana ja profeta ni ja usendo uze Zambi akolesele ni tulamba twenu muze iye ambile kuli Apalahama ngwenyi: ‘Mavungu eswe a hashi kumakawaha kupalikila mu munyachi* we.’
26 Kashika, muze Zambi te hatongola Kavumbi kenyi, yalianga kumutuma kuli yenu hanga anuwahise ni kukondolola mutu mweswe mu jila yenyi ya ungulungulu.”
Footnotes
^ Ha ola 15:00.
^ Chize Alisonekene, “ya kumeso ja Yehova.” Tala Apendice A5.
^ Tala Apendice A5.
^ Hanji “alma yeswe.”
^ Chize Alisonekene, “mbuto.”
