Uputukilo 31:1-55
31 Ha kupalika cha mashimbu, Yakomba yevwa ana ja Lapane kanambe ngwo: “Yakomba hatambula yuma yeswe yize yapwile ya tata, yikumba ya tata ye yamupichisa.”
2 Mba muze Yakomba apwile ni kutala ku meso ja Lapane, yamona ngwenyi keshi ngwe chize apwile nenyi kunyima.
3 Yehova yamba kuli Yakomba ngwenyi: “Hiluka ku chifuchi cha yisemi je ni kuli asoko je, yami mungununga hamwe ni yena.”
4 Chocho, Yakomba yatuma kusanyika Rakele ni Liya eze mu yambu muze iye te akufungila yimuna jenyi,
5 yamba kuli ayo ngwenyi:
“Ngunamono ngwe tatenu keshi nawa ngwe chize apwile ni yami kunyima, alioze, Zambi ya tata kali hamwe ni yami.
6 Nunanyingika kanawa ngwenu nakalakalila tatenu ni tachi jami jeswe.
7 Tatenu keseka kungwonga ni kwalumuna fweto yami yisuho kumi, alioze Zambi kamutayijile hanga angulinge upi.
8 Muze te akwamba ngwenyi: ‘Yimuna a yipeka-yipeka e mapwa fweto ye,’ yimuna eswe te kakusema ana a yipeka-yipeka, alioze muze te akwamba ngwenyi: ‘Yimuna a yihesa-yihesa e mapwa fweto ye,’ yimuna eswe te kakusema ana a yihesa-yihesa.
9 Chocho, Zambi te kakuchiza yimuna ya tatenu ni kungwahayo.
10 Tangwa limwe, muze yimuna ahetele ha mashimbu a kumita, yinguhetula meso, yingumona mu chilota, kuji a pembe waze te ananyina hali yihwo, te kali a yihesa-yihesa, a yipeka-yipeka ni a mifunda-mifunda.
11 Mba mungelo wa Zambi wamwenemwene, yangusanyika mu chilota ngwenyi: ‘Yakomba!’ Yami yingukumbulula ngwami: ‘Yami uno.’
12 Yanunga ni kwamba ngwenyi: ‘Lisesa hetula meso, mumona ngwe kuji a pembe eswe waze ananyina hali yihwo kali a yihesa-yihesa, a yipeka-yipeka ni a mifunda-mifunda, mumu nakumona yuma yeswe yize Lapane akukulinga.
13 Yami nguli Zambi wamwenemwene yoze wasolokele kuli yena ku Mbetele, kuze wazujilile maji ha nguji, kuze walishingile kuli yami. Haliapwila, katuka mu chifuchi chino uhiluke ku chifuchi chenu kuze wasemukinyine.’”
14 Rakele ni Liya ha kuchivwa, yamba kuli iye ngwo: “Shina te mutuhinga nawa chimwe chuma ku zuwo lia tata?
15 Ngwami kakutumona ngwe yilambala, mumu hanatulanjisa ni kulia mbongo jeswe ja yihako jize amuhele hali yetu.
16 Upite weswe uze Zambi atambula kuli tata uli wa yetu ni ana jetu. Kashika, linga yeswe yize Zambi akulweza.”
17 Chocho, Yakomba yakatuka, yanyinyisa ana jenyi ni mapwo jenyi ha tumelu,
18 yanda yimuna jenyi eswe ni yuma yeswe yize apichile ku Panda-narame, yaya ku zuwo lia tato Izake, mu chifuchi cha Kanana.
19 Mba muze Lapane ayile ni kuteula mapanga, Rakele yeya tuponya* a mu zuwo lia tato Lapane.
20 Chikwo nawa, Yakomba yonga Lapane Ka-Arameu, mumu kayile chakuhona kumushika.
21 Iye yachina, yazauka lwiji Ufrateze ni yikumba yeswe yize apwile nayo, yatalikisa ku chifuchi cha milundu ku Ngiliate.
22 Ha tangwa liamuchitatu yalweza Lapane ngwo, Yakomba hachina.
23 Chocho, Lapane yanda mandumbu* jenyi, yakaula Yakomba, mba muze henda matangwa shimbiali, yawana Yakomba ku chifuchi cha milundu ku Ngiliate.
24 Mba Zambi yasoloka kuli Lapane, Ka-Arameu ha ufuku mu chilota, yamba kuli iye ngwenyi: “Watamba kukeya ha yize muwamba kuli Yakomba, yipwe yipema, yipwe yipi.”
25 Chocho, Lapane yakundama kuli Yakomba, mumu Yakomba katungile mbalaka ku chifuchi cha milundu, mba Lapane ni mandumbu jenyi no yatunga mbalaka yo ku chifuchi cha milundu ku Ngiliate.
26 Lapane yamba kuli Yakomba ngwenyi: “Yika walinga ayi? Mumu liaka wangwonga ni kuya ni ana jami ngwe funge waze wakwata mu jita?
27 Mumu liaka wanguchina ni kuseunuka ni kungwonga, chakuhona kungutoweza? Nyi te wangulwezele, kachi nakushikile ni chiseke ni miaso ni ngoma ni tulialia.
28 Alioze kuwanguhele kama chipwe uhashi wa kuhana mbeju kuli ajikulu* jami ni kuli ana jami a mapwo. Walinga yuma ni uhepuke.
29 Nguli ni ndundo ja kunulinga upi, alioze Zambi ya tatenu kahanjikanga ni yami ufuku ni kwamba ngwenyi: ‘Watamba kukeya ha yize muwamba kuli Yakomba, yipwe yipema, yipwe yipi.’
30 Ngunanyingika ngwami, unayi mumu hiwevwa usona wa kuhiluka ku zuwo lia tatenu, mba mumu liaka weya tuzambi twami?”
31 Yakomba yakumbulula Lapane ngwenyi: “Naseunukanga mumu te ngunevu woma, nanyonganga ngwe mungutambula ana je ku tachi.
32 Mutu yoze muwana ni tuzambi twe katambile kununga ni mwono. Hengwola yikumba yami kulutwe lia mandumbu jetu, wande yize ni ye.” Alioze, Yakomba te kanyingikine ngwenyi Rakele mwe weyile tuzambi twacho.
33 Chocho, Lapane yanjila mu mbalaka ya Yakomba, ya Liya ni ya ngamba jenyi aali, alioze kawanyine tuzambi twacho. Mba yakatuka mu mbalaka ya Liya, yanjila mu mbalaka ya Rakele.
34 Kumana Rakele te hasweka tuponya twacho kushi lia chitwamo chize pwo te akutwama helu lia kamelu, chocho yatwamaho. Mba Lapane yafupa mu mbalaka yeswe, alioze kahashile kuwana tuzambi twacho.
35 Chocho, Rakele yamba kuli tato ngwenyi: “Lisesa mwene wami, kanda utenuka kama, chahashile kukatuka kumeso jenu mumu nguli ku chijila.” Chocho iye yanunga ni kufupa chinji, alioze kahashile kuwana tuponya.
36 Mba Yakomba yevwa uli unji, yaputuka kupajila Lapane. Yamba kuli Lapane ngwenyi: “Upi uka nalinga? Mumu liaka unangukaula ni ufwatulo upwahaha ngwe navulumuna?
37 Haliapwila muze wafupa mu yikumba yami, yika wawanamo ya ku zuwo lie? Yise hano, kumeso ja mandumbu jami ni mandumbu je hanga ayo atupatwile yetu eswe aali.
38 Ha miaka yino 20 nalinga ni yena, mapanga ni pembe je kanda aselumuna kama, yami kanda ngulia kama kuji wa panga wa ku limba lie.
39 Chakakunehenene kama kashitu yoze hasuma kuli kashitu wa mu yambu, yami mwe napwile ni kutokesa, nyi umwe kashitu mamwiya mu mwalwa hanji ufuku, yenu nwapwile ni kungufwetesaye.
40 Mumu, mwalwa napwile ni kupinda ni chivukuminya, ufuku napwile ni kupinda ni chishika, chakapwile ni kumona tulo.
41 Nalinga miaka 20 ku zuwo lie. Nakukalakalila miaka 14 mumu lia ana je aali a mapwo, nafunga yimuna ye miaka yisambano, alioze yena walumuna fweto yami yisuho kumi.
42 Nyi Zambi ya tata, Zambi ya Apalahama, yoze Izake akuvwila woma* kapwile sali liami kachi wanguhanga mokomoko. Zambi kamona lamba liami ni mulimo ukalu uze nalinga, kashika Zambi akukumikanga zau ufuku.”
43 Chocho, Lapane yakumbulula Yakomba ngwenyi: “Wano kali ana jami a mapwo, wano kali ajikulu jami, wano kali yimuna jami, yeswe yize unamono hano yili ya yami ni ana jami a mapwo. Upi uka mungulinga musono kuli ana jami a mapwo hanji kuli ajikulu jami?
44 Haliapwila tweya tulinge usendo yami ni yena, usendo uze muupwa uchela hakachi ketu.”
45 Chocho, Yakomba yanda liwe ni kulimanyisa ngwe nguji.
46 Yakomba yamba kuli mandumbu jenyi ngwenyi: “Tongonenu mawe!” Mba ayo yatongona mawe yaalumbika homa hamuwika. Chocho yalila ha mulumba wacho.
47 Lapane yalukako jina ngwenyi, Yeka-sahanduta,* alioze Yakomba yalukako jina ngwenyi, Ngalite.*
48 Lapane yamba ngwenyi: “Musono, mulumba uno wa mawe uli chela hakachi ka yami ni yena.” Kashika aulukile jina ngwo, Ngalite
49 jina likwo ngwo, Kaposhi wa Kutalila, mumu yamba ngwenyi: “Yehova apwe ni kututala yena ni yami muze mutuhona kulimona umwe ni mukwo.
50 Nyi mumwesa ana jami a mapwo lamba ni kumbata mapwo akwo, chipwe ngwe kukushi mutu niumwe yoze makumona, iwuluka ngwe, Zambi makapwa chela hakachi ka yami ni yena.”
51 Lapane yamba kuli Yakomba ngwenyi: “Mulumba wa mawe au, ni nguji lize twamanyisa hakachi ka yena ni yami ali.
52 Mulumba uno wa mawe uli chela, nguji lino lili chuma chize chakuhana uchela ngwo, yami chichi kapalika mulumba uno wa mawe hanga ngukulinge upi, ni yena kuchi kapalika mulumba uno wa mawe ni nguji lino hanga ungulinge upi.
53 Zambi ya Apalahama ni Zambi ya Nehore, Zambi ya a tato, apwe sopi hakachi ketu.” Yakomba yalishinga mu jina lia Zambi yoze tato Izake akuvwila woma.*
54 Mba Yakomba yahana chitapo ha mulumba wa mawe, yasanyika mandumbu jenyi hanga alie mbolo. Chocho ayo yalia, yapomba ku mulundu.
55 Lapane yahinduka chimenemene, yahana mbeju kuli ajikulu* jenyi ni kuli ana jenyi a mapwo, yaawahisa. Mba Lapane yaya, yahiluka ku zuwo lienyi.
Footnotes
^ Hanji “tuzambi a mu usoko.” Chize Alisonekene, “Terafwime.”
^ Hanji “asoko jenyi.”
^ Chize Alisonekene, “ana.”
^ Chize Alisonekene, “woma wa Izake.”
^ Lize linalumbunuka mu limi lia Arame ngwo, “Mulumba wa Uchela.”
^ Lize linalumbunuka mu limi lia Hepreu ngwo, “Mulumba wa Uchela.”
^ Chize Alisonekene, “woma wa tato Izake.”
^ Chize Alisonekene, “ana.”
