Asonekene Luka 23:1-56
23 Hohene mbunga yeswe yakatuka, yamutwala kuli Pilatu.
2 Yaputuka kumusuma mulonga ni kwamba ngwo: “Twawana lunga yono kanapiangula vungu lietu, ni kukanjisa kufweta lijimu kuli Sesare ni kwamba ngwenyi iye mwe Kristu mwanangana.”
3 Pilatu yamuhula ngwenyi: “Yena uli Mwanangana wa A-Yunda nyi?” Yesu yamukumbulula ngwenyi: “Yena mwene unachambe.”
4 Mba Pilatu yalweza asasendote a lutwe ni mbunga ngwenyi: “Chawanyine upi niumwe muli lunga yono.”
5 Alioze, ayo yanunga ni kwamba ngwo: “Iye kakuvundula atu ha kulongesa mu Yundeya yeswe, katu ku Ngalileya ndo kuno.”
6 Muze Pilatu hachivwa, yahula hanga anyingike nyi lunga wacho kali Ka-Ngalileya.
7 Muze hanyingika ngwenyi wa ku chifuchi chize Heronde akuyula, yamutuma kuli Heronde, yoze te uli mu Yerusaleme ha matangwa jacho.
8 Muze Heronde amwene Yesu, yawahilila chinji. Ha mashimbu anji iye te kakuzanga kumumona, mumu kapwile ni kwivwa sango jinji hakutwala kuli iye, chikwo nawa te kakushimbwila hanga amone chimwe chilayi chize Yesu te malinga.
9 Yaputuka kumuhula yihula yinji, alioze iye kamukumbulwile nichimwe.
10 Chocho, asasendote a lutwe ni alongeshi a shimbi, yakatukila Yesu ni kumulamikiza chikolo.
11 Hazehene, Heronde hamwe ni maswalale jenyi, yamulelesa ni kumukekuna, yamujika hina lipema, mba yamuhilwisa kuli Pilatu.
12 Ha tangwa lizeliene, Heronde ni Pilatu waze te akulivwila kole, yapwa masepa.
13 Pilatu yakungulula asasendote a lutwe, akwa-kuyula ni atu,
14 yaalweza ngwenyi: “Nwangunehenanga lunga yono ngwenu kakuvundula atu. Alioze, talenu! Namuhula kumeso jenu, alioze chawanyine muli lunga yono chuma chipi nichimwe ha yeswe yize nunamulamikiza.
15 Pundu lume, chipwe Heronde kamwene upi niumwe muli iye, kashika amuhilwisa kuli yetu, ngwe chize nunamono, iye kalingile chuma nichimwe chize anatela kufwa.
16 Kashika, mungumulamba ni shikote mba mungumutusula.”
17 * ——
18 Alioze, mbunga yeswe yiyikololoka hamuwika ngwo: “Shiha lunga yono, tusula Mbarapa!”
19 (Mbarapa kamusele mu zuwo lia ususu mumu lia kukwasa vunda yize yapwile mu mbonge ni mumu lia kushiha atu.)
20 Pilatu yahanjika no cheka, mumu te kanazange kutusula Yesu.
21 Alioze, ayo yaputuka kukololoka ngwo: “Muhatenu ha mutondo wa lamba! Muhatenu ha mutondo wa lamba!”
22 Iye yamba kuli ayo chisuho chamuchitatu ngwenyi: “Mumu liaka? Upi uka lunga yono alinga? Chawanyine chuma nichimwe muli iye chize anatela kufwa; alioze mungumulamba ni kumutusula.”
23 Chipwe chocho, ayo yanunga ni kukololoka chikolo hanga amushihe, maliji jo yakumba.
24 Mba Pilatu yatayiza kulinga yize atu te anamwichi.
25 Iye yatusula lunga yoze te anechi, yoze asele mu zuwo lia ususu mumu lia vunda ni kushiha atu, alioze yaaha Yesu kulita ni upale wo.
26 Muze te anayi nenyi, yakwata Semone wa ku Serene, yoze te unakatuka ku munda, yamutwika mutondo wa lamba hanga aumbate kunyima lia Yesu.
27 Chizavu chinene cha atu te chinamukaula, ni mapwo waze te analilamba ha pambo ni kulila mbimbi ni kulinyenga mumu lia iye.
28 Yesu yateuluka yatala mapwo, yamba ngwenyi: “Ana-mapwo a Yerusaleme, kanda nungulilila. Alioze, lililenu yenu ene ni ana jenu;
29 mumu nyingikenu ngwenu matangwa kumakeza muze atu makamba ngwo: ‘Kawaha mapwo waze keshi kusema, ni majimo waze kashichile ni mele waze kapapishile!’
30 Hohene, ayo makaputuka kwamba kuli milundu ngwo: ‘Lundumukinenu hali yetu!’ ni kuli mindundena ngwo: ‘Tufukenu!’
31 Nyi ayo kakulinga chocho muze mutondo uchili wa wisu, mba yika makalinga muze mutondo muukoma?”
32 Yaya ni malunga akwo aali, waze te yingulungulu hanga aashihile hamuwika ni iye.
33 Muze ahetele ku chihela kuze avuluka ngwo, Kola lia mutwe, yamuhata ha mutondo wa lamba mukachi ka yingulungulu, umuwika sali lienyi lia utata, mukwo sali lienyi lia umama.
34 Alioze, Yesu yaputuka kwamba ngwenyi: “Tata, akonekene, mumu kanyingikine yize analingi.” Chikwo nawa, yata chela hanga alitetele mazalo jenyi.
35 Atu yamana ni kumutala. Alioze akwa-kuyula yamukekuna ni kwamba ngwo: “Walamwinyine akwo; alilamwine mwene, nyi iye kali lume Kristu wa Zambi, yoze Hanatongola.”
36 Chipwe maswalale yamukekuna, yakundama kuli iye, yamwaha vinyu yapangaminya
37 ni kwamba ngwo: “Nyi yena uli Mwanangana wa A-Yunda, lilamwine yena mwene.”
38 Helu lia mutwe wenyi hapwile chisoneko chakwamba ngwo: “Yono mwe Mwanangana wa A-Yunda.”
39 Mba umwe wa kuli yingulungulu waze ahachile ha mutondo, yaputuka kumwihia ni kwamba ngwenyi: “Ngwami yena uli Kristu? Lilamwine yena mwene ni yetu nawa!”
40 Mukwo yamukumbulula ni kumukumika ngwenyi: “Yena kuushi kuvwila Zambi woma nyi, amu watambula upatwilo umuwika ni iye?
41 Kuli yetu upatwilo wetu unalite, mumu tunatambula fweto kulita ni yize tunakalinga; alioze lunga yono kalingile upi niumwe.”
42 Chocho iye yamba ngwenyi: “Yesu, ungwiwuluka kama muze munjila mu Wanangana we.”
43 Yesu yamulweza ngwenyi: “Pundu, ngunakulweze musono ngwami, mukapwa hamwe ni yami mu Paraisu.”
44 Yapwile ngwe ola yamuchisambano,* mu chifuchi cheswe yimupwa milima pwi, ndo ha ola yamuchilivwa,
45 mumu tangwa kuliatemwine nawa mwalwa; hina lia muma musandu yilipulika hakachi.
46 Yesu yakololoka chikolo ni liji mwilu ngwenyi: “Tata, ngunakunjika spiritu yami mu moko je.” Muze hamba maliji wano, yafwa.
47 Hakumona yize te yinalingiwako, mwata wa maswalale yaputuka kuhalisa Zambi, yamba ngwenyi: “Chamwenemwene, lunga yono te mukwa-ululi.”
48 Mbunga yeswe yize yalikungulwile ku chihela chacho, yamona yize te yinalingiwako, yafuna ku mazuwo jo ni kulilamba-lamba ha pambo mumu lia yinyengo.
49 Atu eswe waze te anamunyingika, te kanamanyina kusuku. Chikwo nawa, mapwo waze amukawile chize ku Ngalileya te hwali, yamona yuma yacho.
50 Kwapwile umwe lunga avuluka ngwo, Yosefwe, chilolo wa mu Chota Chinene cha A-Yunda, te lunga mupema, mukwa-ululi.
51 (Lunga yono, kakatayijile kukwasa chizavu cha waze atwamine Yesu punga hanga amushihe.) Iye te wa ku Arimatea, yimwe mbonge ya Yundeya, te kakushimbwila Wanangana wa Zambi.
52 Lunga yono, yaya kuli Pilatu ni kumwita mujimba wa Yesu.
53 Kashika, yausunwisa ku mutondo wa lamba, yauvunga ha hina lipema lia linyu, yausa mu fuka lia kutota mu liwe, muze te kanda achifundamo mutu niumwe.
54 Liapwile tangwa lia Kulilulieka yuma, chikwo nawa, Sambata te yinakundama.
55 Alioze, mapwo waze akawile Yesu chize ku Ngalileya, no yaya ni kutala fuka, yamona chize asele mujimba wenyi mu fuka,
56 yafuna hanga alulieke yitumbo ni maji a vumba lipema. Alioze, yahwima ha Sambata, kulita ni shimbi.
