Asonekene Luka 20:1-47
20 Tangwa limwe, muze iye te analongesa atu mu tembele ni kwambujola sango jipema, asasendote a lutwe, alongeshi a shimbi ni makulwana yeza,
2 yamuhula ngwo: “Tulweze, ni ulite uka unalingi yuma yino? Iya wakuhele ulite wa kulinga yuma yino?”
3 Iye yaakumbulula ngwenyi: “Ni yami nawa mungunuhula chimwe chuma, ni yenu ndo nungukumbulule:
4 Shina upapachiso wa Yoano wakatukile mu malilu nyi kuli atu?”
5 O yaputuka kuhanjika hakachi ko ngwo: “Nyi twamba ngwetu: ‘Wakatukile mu malilu,’ iye mamba ngwenyi: ‘Mba mumu liaka kunwafulielele muli iye?’
6 Alioze nyi twamba ngwetu: ‘Wakatukile kuli atu,’ atu eswe matwasa mawe, mumu eswe kakutayiza ngwo, Yoano kapwile profeta.”
7 Mba ayo yamukumbulula ngwo, kutwanyingikine kuze unakakatuka.
8 Yesu yamba kuli ayo ngwenyi: “Nyi chocho, ni yami chichi kunulweza ulite waya ngunalingi nawo yuma yino.”
9 Yesu yatela atu chishima chino ngwenyi: “Umwe mutu yatumba munda wenyi wa vinyu, yauhana kuli njimi, yaya mu wenyi ku chifuchi cheka ha matangwa anji.
10 Muze mwaka wa kuhela mbuto wahetele, yatuma ndungo yenyi kuli njimi hanga amwehe yimwe mihuko ya mu munda. Alioze muze njimi jacho halamba ndungo wacho, yamuhuma mokomoko.
11 Alioze, iye yaatumina ndungo mukwo, yono nawa yamulamba, yamuhungumiona, yamuhilwisa mokomoko.
12 Cheka nawa, yatuma wamuchitatu, neye yamulemeka, yamumbila haze.
13 Mba mwenya-munda yamba ngwenyi: ‘Yika mungulinga? Mungutuma mwanami yoze nazanga. Hanji ayo mamuvumbika.’
14 Muze njimi amumwene yamba hakachi ko ngwo: ‘Au mwe swana. Tumushihenu hanga chihinga chipwe nichetu.’
15 Chocho, ayo yamumbila haze lia munda, yamushiha. Yika mwenya-munda makalinga kuli njimi wano?
16 Makahiluka ashihe e njimi, ni kuhana munda wa vinyu kuli njimi eka.”
Muze ayo hachivwa, yamba ngwo: “Chino kuchatambile kulingiwa!”
17 Alioze, iye yahulikila meso jenyi hali ayo, yaamba ngwenyi: “Mba maliji wano anasonewa yika analumbunuka, anambe ngwo: ‘Liwe lize alitunyine tungi lienalio hiliapwa liwe litangu lia ha mbango?’
18 Mweswawo maholokela ha liwe lino, kumakamakuka. Alioze yoze liwe lino muliholokela, kumakafwenyoka.”
19 Alongeshi a shimbi ni asasendote a lutwe yazanga kumukwata ha shimbu lizeliene, mumu te hanyingika ngwo, chishima chize anate ayo anachitela, alioze yevwa woma wa atu.
20 Muze halihulikila kanawa hali iye, ayo yatuma malunga waze alitesele no ku tenga, alisolole ngwe akwa-ululi, hanga amukwate ha yize mamba, mba amukunjike kuli nguvulu ni kuli akwa-kuyula.
21 Ayo yamuhula ngwo: “Longeshi, tunanyingika ngwetu, wakuhanjika ni kulongesa kanawa, kushi kusolola katonde, alioze wakulongesa jila ya Zambi kulita ni umwenemwene:
22 Shina chinalite kufweta lijimu kuli Sesare, nyi ka?”
23 Alioze muze iye hamona ulembekese wo, yaalweza ngwenyi:
24 “Achi ngusolwelenu ndenariu* yimuwika. Chizulie chino ni chisoneko chiliho yaya?” Ayo yamukukumbulula ngwo: “Ya Sesare.”
25 Iye yaalweza ngwenyi: “Fwetenu kuli Sesare yuma ya Sesare, alioze kuli Zambi, yuma ya Zambi.”
26 Kashika, kahashile kumukwata ha yize ambile kumeso ja atu, alioze ayo yakomoka ni kumbululo lienyi, eswe yahola kuluu.
27 Alioze, amwe A-Satuseu waze akwamba ngwo, uhindukilo wa afu watwamineko, yeza kuli Yesu, yamuhula ngwo:
28 “Longeshi, Mose katusonekenene ngwenyi: ‘Nyi lunga umwe mafwa mahichika pwo, alioze kasemene nenyi ana, mwana-kwo hanji yayo katamba kulimbata ni tuliwa hanga amusemene ana.’
29 Kwapwile malunga shimbiali a mu jimo limuwika. Mutangu yambata pwo, alioze yafwa kahichikile ana.
30 Ni wamuchiali
31 ni wamuchitatu yaambata tuliwa. Eswe shimbiali yalimbata ni pwo wacho, alioze ayo yafwa kahichikile ana.
32 Kulutwe mwe pwo neye yafwa.
33 Ha tangwa lia uhindukilo, pwo wacho makapwa waya? Mumu eswe shimbiali kalimbachile nenyi.”
34 Yesu yamba kuli ayo ngwenyi: “Ana a miaka yino kakumbata ni kwahangisa ku malo,
35 alioze waze anatela kuzuka mwono mu Wanangana wa Zambi ni uhindukilo hakachi ka afu, kechi kambata chipwe kwahangisa ku malo.
36 Kwamba pundu, ayo kechi kafwa nawa, mumu makapwa ngwe angelo, kali ana ja Zambi ha kupwa ana ja uhindukilo.
37 Alioze, ha chikuma cha uhindukilo wa afu, chipwe Mose kachisolwele ha lusango wa ku chiputa cha mungonga, muze avulukile Yehova* ngwenyi, ‘Zambi ya Apalahama, Zambi ya Izake ni Zambi ya Yakomba.’
38 Iye kali Zambi, hi wa afu ko, alioze wa waze ali ni mwono, mumu kuli iye, ayo eswe kali ni mwono.”
39 Amwe alongeshi a shimbi yamukumbulula ngwo: “Longeshi, wamba kanawa.”
40 Mumu ayo te keshi nawa ni hamu lia kumuhula chihula nichimwe.
41 Yesu neye yaahula ngwenyi: “Mba mumu liaka nwakwamba ngwenu, Kristu kali mwana wa Ndawichi?
42 Mumu Ndawichi mwene kambile mu mukanda wa Masamu ngwenyi, ‘Yehova* yamba kuli Mwene wami ngwenyi: “Twama ku kwoko liami lia utata,
43 ndo muze mungukasa akwa-kole je kushi lia yiliato ye.”’
44 Alioze, Ndawichi kanamuvuluka ngwenyi, Mwene. Mba kuchi iye ali mwanenyi?”
45 Muze atu eswe te anapanjika, iye yamba kuli tumbaji twenyi ngwenyi:
46 “Kanyamenu ni alongeshi a shimbi waze akuzanga kwendangana ni kuzala mazalo asuku-asuku, akuzanga chinji hanga aameneke ha yitanda, kutwama ha yitwamo ya kulutwe mu masunangonga ni ha yihela yilemu ha yiwanyino ya kulia cha chingoloshi,
47 waze akwiya yuma ya mapwo waze ali tuliwa, ni kulinga yilemba yisuku-yisuku hanga akomwese atu. Alongeshi a shimbi wano, usopeso wo muukapwa ukalu chinji.”
