Asonekene Luka 19:1-48
19 Yesu yanjila mu mbonge ya Yeriku, te kanapalika.
2 Mwapwile umwe lunga avuluka ngwo Zakeu; mwata wa akwa-kufwetesa lijimu, chikwo nawa, te pichi.
3 Iye yazanga kumona Yesu chize apwa, alioze kahashile mumu lia mbunga, mumu iye te mwihi.
4 Kashika, yazombokela kulutwe, yanyina ku mutondo wa musuwa hanga amumone, mumu kwe Yesu te mapalikila.
5 Muze Yesu ahetele ha chihela chacho, yatala kwilu yamulweza ngwenyi: “Zakeu, sunuka kawashi, mumu musono mungutwama ku zuwo lie.”
6 Chocho, iye yasunuka kawashi-washi, ni uwahililo weswe yamutambula ku zuwo lienyi.
7 Muze atu eswe hachimona, yaputuka kulinyenyeta ngwo: “Haya ni kutwama ku zuwo lia umwe lunga chivulumunyi.”
8 Alioze, Zakeu yakatuka, yalweza Mwene ngwenyi: “Tala! Mwene, munguhana kuli yiswale chihanda cha hakachi cha yikumba yami, chikwo nawa, cheswacho neyile kuli umwe mutu, mungumuhilwisacho yisuho yiwana kuhiana.”
9 Chocho Yesu yamulweza ngwenyi: “Musono, ku zuwo lino kwanjila ulamwino, mumu neye kali mwana wa Apalahama.
10 Mumu Mwana-mutu keza ni kufupa ni kulamwina waze hanatoko.”
11 Muze ayo te anapanjika yuma yino, Yesu yaatela nawa chishima chikwo, mumu te kali hakamwihi ni Yerusaleme, chikwo nawa, ayo te kakunyonga ngwo, Wanangana wa Zambi muusoloka susumuku.
12 Yamba ngwenyi: “Umwe mutu wa lufuma, yaya wenyi ku chimwe chifuchi kusuku hanga apwe mwanangana, mba afune.
13 Yasanyika ndungo jenyi kumi, yaaha kumi lia mbongo.* Yaalweza ngwenyi: ‘Lingenu mingoso ni mbongo jino ndo ni haze mungukahilukila.’
14 Alioze, akwa-chifuchi chenyi te kakumuvwila kole, yatuma tunganda kunyima lienyi hanga amulweze ngwo: ‘Twazangile lunga yono hanga apwe mwata wetu.’
15 “Muze hapwa mwanangana yahiluka, yakungulula ndungo waze iye ahele mbongo, hanga anyingike yize azuka ha mingoso yize ayo alingile.
16 Mutangu yeza, yamba ngwenyi: ‘Mwene, ha mbongo jenu natuhwisa mbongo jikwo kumi.’
17 Iye yamba ngwenyi: ‘Walinga kanawa, ndungo mupema! Amu washishika ha chikuma chikehe, ngunakwehe mambonge kumi hanga waayule.’
18 Mba wamuchiali yeza, yamba ngwenyi: ‘Mwene, mbongo jenu jatuhwisa mbongo jikwo jitano.’
19 Iye yamba nawa kuli yono ngwenyi: ‘Ni yena yula mambonge atano.’
20 Alioze mukwo yeza, yamba ngwenyi: ‘Mwene, lumbongo we au, namuvungile ni kumusweka ha hina.
21 Nevwile woma wa yena, mumu uli mutu mukalu; wakwanda haze kuwasele, wakuhela haze kuwatumbile.’
22 Iye yamwamba ngwenyi: ‘Ndungo mupi, mungukupatwila kulita ni maliji je, kuma unanyingika ngwe nguli mutu mukalu, nakwanda haze chasele ni kuhela haze chatumbile?
23 Mba mumu liaka kuwatwalile mbongo jami ku chimangu?* Muze te mungwiza ngujitambule ni mbwezo.’
24 “Chocho, iye yamba kuli waze apwileho ngwenyi: ‘Mutambulenu lumbongo hanga numuhane kuli yoze uli ni kumi lia mbongo.’
25 Alioze ayo yamulweza ngwo: ‘Mwene, iye kali ni kumi lia mbongo!’
26 Iye yaakumbulula ngwenyi: ‘Ngunanulweze ngwami, yoze ulinacho, kumakamuweza nawa, alioze yoze keshi nacho, chipwe chize alinacho kumakamuchizacho.
27 Chikwo nawa, nehenu kuno akwa-kole jami waze kakazangile hanga ngupwe mwanangana wo, ashihilenu kumeso jami.’”
28 Muze Yesu hamanyisa kwalweza yuma yino, yatetekela kulutwe lio, yakanduka ku Yerusaleme.
29 Muze te anakundama ku Mbetefweje ni Mbetaniya, kuze avuluka ngwo Mulundu wa Olevwe, yatuma tumbaji aali,
30 yaalweza ngwenyi: “Yeenu mu chihunda chize nunamono, muze mununjilamo, munuwana mwana chimbulu wa kukasa, yoze kanda achimunyina kama kuli mutu niumwe. Mukasululenu numunehe kuno.
31 Alioze, nyi umwe manuhula ngwenyi: ‘Mumu liaka nunamukasulula?’ mulwezenu ngwenu: ‘Mwene kanamufupu.’”
32 Muze waze atumine ayile, yawana ngwe chizechene iye ambile kuli ayo.
33 Alioze, muze te anakasulula mwana chimbulu, ene yaahula ngwo: “Mumu liaka nunamukasulula?”
34 Tumbaji yakumbulula ngwo: “Mwene kanamufupu.”
35 Mba yamuneha kuli Yesu, yala mazalo jo hali mwana chimbulu, yanyinyisaho Yesu.
36 Muze iye te anayi, ayo yaputuka kwala mahina jo mu jila.
37 Muze te anakundama ku tapalo yinapalumuka ku Mulundu wa Olevwe, mbunga yeswe ya tumbaji yaputuka kuwahilila ni kuhalisa Zambi ni liji mwilu mumu lia yikomokeso yeswe ya ndundo yize amwene,
38 ni kwamba ngwo: “Kawaha yoze uneza ngwe Mwanangana mu jina lia Yehova!* Sambukila mwilu ni uhenya mwilu mwahiana!”
39 Alioze, amwe A-Fwariseu waze apwile mukachi ka mbunga yamba kuli iye ngwo: “Longeshi, lweza tumbaji twe hanga ahole.”
40 Alioze, iye yaakumbulula ngwenyi: “Ngunanulweze ngwami, nyi ayo te mahola, mawe te makololoka.”
41 Muze iye hakundama, yatala mbonge yayililila,
42 ni kwamba ngwenyi: “Nyi yena, ewa, yena, kachi ha tangwa lino wanyingika yuma yize yakuneha sambukila. . . Alioze, haliapwila kuuchi kuhasa kumona yuma yacho.
43 Mumu matangwa kumakeza hali yena muze akwa-kole je makatunga yipanga ya manguji asongoloka, makakujingilika ni kukupinjisa sali ni sali.
44 Ayo makakunyasa hashi ni kunongesa ana je, kechi kahichika muli yena liwe helu lia liwe, mumu kuwanyingikine mwaka wa kukuhengwola.”
45 Mba Yesu yanjila mu tembele, yaputuka kuhanga atu waze apwile ni kulanjishilamo,
46 ni kwamba ngwenyi: “Chinasonewa ngwo: ‘Zuwo liami makalivuluka ngwo zuwo lia kulembela,’ alioze yenu hinwalitenga chiswamo cha eji.”
47 Iye yanunga ni kulongesa tangwa ha tangwa mu tembele. Alioze asasendote a lutwe, ni alongeshi a shimbi ni akwa-lutwe ja atu te kakufupa kumushiha,
48 alioze, kakamwene chize mahasa kuchilinga, mumu atu eswe te kakumupanjika ni mbunge yeswe.
