Asonekene Luka 15:1-32
15 Akwa-kufwetesa lijimu eswe ni yivulumunyi, kapwile ni kukundama kuli iye hanga amupanjike.
2 A-Fwariseu ni alongeshi a shimbi kapwile ni kulinyenyeta ngwo: “Lunga yono kakutambula yivulumunyi ni kulia no hamuwika.”
3 Chocho Yesu yaatela chishima chino ngwenyi:
4 “Mutu muka hakachi kenu, nyi kali ni mapanga 100, muze matokesa panga umuwika kechi kuhichika mapanga 99 mu puya hanga aye ni kufupa umuwika yoze watoka ndo haze mamuwana?
5 Muze mamuwana, mamusa ha yipaya ni kuwahilila.
6 Mba muze maheta ku zuwo, makungulula masepa ni enyembo jenyi, ni kwalweza ngwenyi: ‘Wahililenu hamwe ni yami mumu hinawana panga wami yoze watokanga.’
7 Chizechene nawa, ngunanwambulwila ngwami, mukukapwa uwahililo unene mwilu, mumu lia chivulumunyi umuwika yoze walikonyeka, kuhiana akwa-ululi 99 waze kafupiwile kulikonyeka.
8 “Hanji pwo muka yoze uli ni mbongo* kumi, nyi matokesaho lumbongo* umuwika, kechi kukwachisa ndeya ni kukomba mu zuwo hanga ahengwole kanawa ndo muze mamuwana?
9 Mba muze mamuwana, makunga masepa jenyi ni enyembo ni kwalweza ngwenyi: ‘Wahililenu hamwe ni yami, mumu hinawana lumbongo* wami yoze watokanga.’
10 Chizechene nawa, ngunanulweze ngwami, kwakupwa uwahililo hakachi ka angelo ja Zambi, mumu lia chivulumunyi umuwika yoze wakulikonyeka.”
11 Mba yamba nawa ngwenyi: “Umwe mutu kapwile ni ana aali.
12 Mwe kanuke yamba kuli tato ngwenyi: ‘Tata, ngwehe chihanda chami cha chihinga.’ Chocho iye yaatetela yikumba.
13 Ha kupalika cha matangwa, mwe mwana wa kanuke, yakunga yuma yenyi yeswe, yaya ku chimwe chifuchi kusuku, kuzekwene, yakisa yikumba yenyi yeswe ha kumbata mwono upi.
14 Muze te hakisa yikumba yenyi yeswe, yikupwa zala yinji mu chifuchi chacho cheswe, chocho iye yaputuka kumona lamba.
15 Iye yalihana hanga akalakalile umwe mutu wa mu chifuchi chacho, chocho mutu wacho, yamutuma ku minda yenyi hanga afunge ngulu.
16 Iye yevwa zala, yazanga kulia, kulia cha ngulu, alioze niumwe wamuhelecho wakuhi.
17 “Muze haputuka kunyonga kanawa, yamba ngwenyi: ‘Ngamba anji ja tata kali ni kulia chinji, alioze yami kuno ngunafu ni zala!
18 Munguya kwami, ngufune ku zuwo lia tata, mungumulweza ngwami: “Tata, hinavulumuna kuli Zambi mwilu ni kuli yenu.
19 Kuchatelele nunguvuluke nawa ngwenu mwanami. Ngupwise kama ngwe umwe wa kuli ngamba jenu.”’
20 Chocho yakatuka, yaya kuli tato. Muze iye te uchili kusuku, tato yamumona, yamuvwila keke, yazomboka, yamukangayika ni kumumbejala chinji.
21 Mba mwana yamulweza ngwenyi: ‘Tata, hinavulumuna kuli Zambi mwilu ni kuli yenu, kuchatelele nunguvuluke nawa ngwenu mwanami.’
22 Alioze, tato yalweza ngamba jenyi ngwenyi: ‘Tambukenu, nehenu hina lipema hanga numujike, musenu kazeya ku kwoko ni sapato ku molu.
23 Nehenu nawa mwana-ngombe wa kuji wa maji, mushihenu, tulienu, tuwahililenu,
24 mumu yono mwanami kafwile, alioze hapwa cheka ni mwono, katokele, mba hitwamuwana.’ Chocho ayo yaputuka kuwahilila.
25 “Mwanenyi wa mukulwana kapwile ku munda, muze te anahiluka, ha kukundama ku zuwo, yevwa zungo lia miaso ni lundunjila wa kuhangana.
26 Hachino, yasanyika umwe wa kuli ngamba, yamuhula yize te yinalingiwako.
27 Iye yamulweza ngwenyi: ‘Mwana-kwenu heza, tatenu kamushihila mwana-ngombe wa maji, mumu kahiluka mungunu.’
28 Alioze, iye yevwa uli, yalituna kunjila mu zuwo. Hachino, tato yatuhuka yaputuka kumulembejeka hanga anjile.
29 Iye yakumbulula tato ngwenyi: ‘Nakalakala miaka yinji ngwe ndungo ye, chehukile shimbi ye nilimwe tangwa, chipwe chocho, kanda uchingushihila kama pembe nilimwe tangwa hanga nguwahilile ni masepa jami.
30 Alioze, muze mwane au heza, yoze wakisa yikumba yenyi ni yikoyi, wamushihila mwana-ngombe wa maji.’
31 Iye yamukumbulula ngwenyi: ‘Mwanami, yena mashimbu eswe watwama ni yami, yuma yeswe yize ngulinayo niye.
32 Alioze, echa hanga tuwahilile, mumu mwana-kwenu yono kanakafwa, mba hapwa cheka ni mwono, katokele, mba hitwamuwana.’”
