Kuli A-Ngalashia 3:1-29
-
Kalisa hakachi ka yitanga ya Shimbi ni ufulielo (1-14)
-
Mukwa-ululi kumakapwa ni mwono ku ufulielo wenyi (11)
-
-
Chilakenyo cha Apalahama kuchakatukile ha Shimbi (15-18)
-
Munyachi wa Apalahama, Kristu (16)
-
-
Chishina ni ulemu wa Shimbi (19-25)
-
Ana ja Zambi kupalikila mu ufulielo (26-29)
-
Munyachi wa Apalahama, waze apwa ambala a Kristu (29)
-
3 Yenu A-Ngalashia yihepuke! Iya yoze wanupiangwile ku ndako yino yipi chipwe ngwe nwatambwile pundu ulumbunwiso hakutwala ku kufwa cha Yesu Kristu ha mutondo?
2 Kuli chuma chimwe chize ngunazange kunuhula:* Shina yenu nwatambwile spiritu kupalikila mu yitanga ya shimbi nyi mumu lia kufuliela ha yize nwevwile?
3 Kuchi nunahepuka chize? Yenu nwaputukile ha kufuliela ku spiritu, haliapwila nunamanununa mu jila ya musunya nyi?
4 Shina lamba lieswe lize nwamwene liapwile liamokomoko nyi? Nguli ni shindakenyo ngwami kuliapwile liamokomoko.
5 Shina yoze wanuhele spiritu ni kulinga yikomokeso mukachi kenu, kachilingile kupalikila mu yitanga yenyi ya shimbi nyi mumu ha kufuliela chenu ha yuma yize nwevwile?
6 Chino chili ngwe chize chalingiwile kuli Apalahama, “iye wafulielele muli Yehova,* mba achalwile kuli iye ngwe ululi.”
7 Kwamba pundu nunanyingika ngwenu, waze akufuliela e ana ja Apalahama.
8 Chisoneko chimwe chaliangile kwamba ngwo, Zambi makapwisa akwa-ululi atu a ku mavungu kupalikila mu ufulielo. Chaliangile nawa kwambujola sango jipema kuli Apalahama ngwo: “Kupalikila muli yena, akwa-mavungu eswe kumakaawahisa.”
9 Kashika, waze ali ni ufulielo kakwawahisa hamwe ni Apalahama, yoze wapwile ni ufulielo.
10 Eswe waze akufuliela ku yitanga ya shimbi, kali kushi lia shingo, mumu chinasonewa ngwo: “Mweswawo yoze kanyongonwene mukulinga yuma yeswe yinasonewa mu mukanda wa Shimbi, kashingiwa.”
11 Chinasoloka pundu ngwo, Zambi keshi kupwisa mutu niumwe mukwa-ululi ku shimbi, mumu “mukwa-ululi kumakatwama ni mwono mumu lia ufulielo wenyi.”
12 Kashika, Shimbi kuyishi kukatuka ku ufulielo. Mumu chinasonewa ngwo, “mutu yoze wakulinga yuma yipema kulita ni yize shimbi yinambe kumakapwa ni mwono.”
13 Kristu watulanjile ni kututusula ku shingo lia Shimbi ha kupwa shingo mu chihela chetu, mumu chinasonewa ngwo: “Kashingiwa mweswe yoze mamuzezeleka ha mutondo.”
14 Chino chalingiwile hanga chiwape cha Apalahama chikeze kuli akwa-mavungu kupalikila muli Kristu Yesu, tukatambule spiritu yize atulakenyene kupalikila mu ufulielo wetu.
15 Mandumbu, ngunahanjika kuli yenu kulita ni chilweza cha atu ngwami: Nyi usendo maukolesa chipwe kuli mutu umuwika, niumwe yoze mahasa kuushiha hanji kuwezaho chuma chimwe, wakuhi.
16 Yilakenyo kayilingile kuli Apalahama ni kuli munyachi* wenyi. Yisoneko kuyishi kwamba ngwo, “kuli minyachi* ye,” ngwe kali anji. Alioze ngwo, “kuli munyachi* we,” ni kusolola ngwo kali umuwika, iye Kristu.
17 Chikwo nawa, ngunambe chino: Shimbi yize yejile hakupalika cha miaka 430, kuyahashile kushiha usendo uze Zambi alingile ni kupwisa chilakenyo chenyi chamokomoko.
18 Mumu nyi chihinga chakukatuka ku shimbi, kachi chichi kukatuka nawa ku chilakenyo; alioze, Zambi wachihanyine ni zango lieswe kuli Apalahama kupalikila mu chilakenyo.
19 Mba mumu liaka atuhele Shimbi? Shimbi katuheleyo ha kupalika cha mashimbu hanga yisolole utanguke ndo kukuheta cha munyachi yoze alakenyene; chikwo nawa, angelo kahanyine shimbi kuli atu kupalikila muli chitakanyishi.
20 Kashika, kwakufupiwa chitakanyishi nyi usendo muupwa kulinga kuli atu anji, alioze, Zambi iye umuwika.
21 Shina Shimbi yakulimika ni yilakenyo ya Zambi? Ka, hi chocho ko! Mumu nyi te kahanyine yimwe shimbi yize muyihasa kuhana mwono, kachi ululi wejile kupalikila mu shimbi.
22 Alioze Liji lia Zambi liasele yuma yeswe mu chiyulo cha shili. Kashika, waze ali ni ufulielo mahasa kupwa ni yuma yipema yize alakenyene waze akufuliela muli Yesu Kristu.
23 Alioze shimbu ufulielo te kanda wiza, shimbi yatufungile. Chocho yitupwa mushi liayo ni kushimbwila ufulielo uze te masolola.
24 Shimbi yapwile kafunga* ketu ni kutusongwela ndo kuli Kristu, hanga akatupwise akwa-ululi kupalikila mu ufulielo.
25 Alioze, amu ufulielo hiweza, kutushi nawa kushi lia umwe kafunga.*
26 Kwamba pundu, yenu eswe nuli ana ja Zambi kupalikila mu ufulielo wenu muli Kristu Yesu.
27 Yenu eswe waze hananupapachisa mukulinunga ni Kristu, hinunazale yitanga ya Kristu.
28 Kukushi chipwe Ka-Yunda, chipwe Ka-Ngresia, chipwe ndungo, chipwe mutu yoze uli ni utuswilo, chipwe lunga, chipwe pwo, mumu yenu eswe nuli amuwika mukulinunga ni Kristu Yesu.
29 Chikwo nawa, nyi nuli a Kristu, kwamba pundu nuli munyachi* wa Apalahama, maswana kulita ni chilakenyo.
Footnotes
^ Chize Alisonekene, “ngunazange kulilongesa hali yenu.”
^ Tala Apendice A5.
^ Chize Alisonekene, “mbuto yenyi.”
^ Chize Alisonekene, “mbuto yenyi.”
^ Chize Alisonekene, “mbuto yenyi.”
^ Hanji “ndeji.”
^ Hanji “ndeji.”
^ Chize Alisonekene, “mbuto.”
