Mukanda Wamuchiali wa A-Korindu 12:1-21
12 Changutamba kulisamba. Kashika, munguhanjika hakutwala ku usolwelo uze Mwene angulwezele ni ha sango jize anguhele, chipwe ngwe kulinga chino kuchishi kunguyukisa.
2 Ngunanyingika umwe lunga mukulinunga ni Kristu, ha miaka 14 kunyima—iye amupindumwine ndo mwilu mwamuchitatu. Nyi kamupindumwine mu mujimba, chanyingikine, nyi kamupindumwine haze lia mujimba, chanyingikine, alioze Zambi kananyingika.
3 Ewa, ngunanyingika mutu wacho—nyi mu mujimba hanji haze lia mujimba, chanyingikine; alioze Zambi kananyingika—
4 amupindumwine ndo mu paraisu muze evwile maliji waze kaatambile kwamba, maliji waze mutu niumwe keshi ni ulite wa kwalweza kuli mutu mukwo.
5 Mungulisamba hali lunga wacho, alioze hali yami mwene chichi kulisamba, shina wika ha ulelu wami.
6 Mumu chipwe ngwe te mungulisamba, nihindu chichi kupwa chihepuke, mumu munguhanjika umwenemwene. Alioze, chichi kuchilinga hanga niumwe kanda anguchichimieka kuhiana, ha yuma yize akumona ni kwivwa hakutwala kuli yami,
7 mumu ngwo nakutambula usolwelo wakukomwesa.
Kashika anguhele umwe lumbambo ku musunya, umwe mungelo wa Satana, hanga angumbufule* mashimbu eswe, nguchine kulinangamisa chinji.
8 Ha yisuho yitatu, naliumbile kuli Mwene ni kumwita hanga anguchize lumbambo wacho.
9 Alioze iye wangukumbulwile ngwenyi: “Chawana chami cha keke chinate hali yena, mumu ndundo jami kanajipwisa jingunu mu ulelu.” Kashika, ni uwahililo unji, mungulisamba mu ulelu wami hanga ndundo ja Kristu jikanunge hali yami ngwe mbalaka.
10 Kashika, nakuwahilila mu ulelu, ni sau, ni lamba, ni yihungumiona, ni kapinda mumu hali Kristu. Mumu muze ngunalele, mwe nakupwa ni tachi.
11 Ngunahanjika ngwe chihepuke, mumu yenu nwangushinjila kuchilinga. Nyi te nwahanjikile yuma yipema hali yami, kachi chahanjikile chocho. Ami hi nguli mukepe ko ha chuma nichimwe ha kulitesa ni apostolo jenu waze nwakumona ngwe kali alemu.
12 Kwamba umwenemwene, nasolwele shindakenyo ya upostolo wami ni kunyongonona, hamwe ni yilayi, ni yikomokeso, ni yuma yikwo yakukomwesa.
13 Ha chikuma chika yenu nwapwile alelu kuhiana yikungulwila yikwo? Hanji wika ha chikuma cha yami kuhona kupwa yilemu kuli yenu. Lisesa, ngukonekenenu kama ha uhenge uno wa kuhona kupwa yilemu kuli yenu.
14 Talenu, chino chili chisuho chamuchitatu chize nalilulieka hanga ngwize ni kunumeneka. Alioze, chalipwishile yilemu kuli yenu. Mumu ngunazange yenu atu, hi yikumba yenu ko. Mumu hi ana ko atamba kusweka yikumba hanga akwase nayo yisemi jo, alioze yisemi e atamba kuchilinga hali ana.
15 Kashika, ku zango liami mwene, munguhana yeswe yize nguli nayo, chipwe yami mwene mungulihana hali yenu.* Nyi yami nakunuzanga chinji, shina yenu nwatamba kunguzanga hakepe nyi?
16 Chipwe ngwe chakapwile yilemu kuli yenu, nihindu yenu nwakwamba ngwenu, “nanwongele” ni kunwoza mu “miheto.”
17 Shina nanwongele kupalikila muli umwe wa kuli waze natumine kuli yenu?
18 Naliumbile kuli Titu hanga anumeneke, yingumutuma hamwe ni ndumbu mukwo. Shina Titu kanwongele? Shina kutwendele mu spiritu yimuwika ni mu ngano jimuwika nyi?
19 Shina mashimbu wano eswe nwakunyonga ngwenu, twakulisambisa kuli yenu nyi? Twakuhanjika kumeso ja Zambi ngwe tumbaji a Kristu. Alioze, mandumbu, yeswe yize twakulinga, twakuyilinga ha kunukolesa.
20 Mumu ngunevu woma ngwami, muze mungwiza kuli yenu, chichi kanuwana ngwe chize ngunazange, ni yenu kunuchi kangumona ngwe chize nunazange. Alioze, hanji mungukawana vunda, ni ukwa, ni ufwatulo, ni kuzwela, ni saki, ni kulinyenyeta,* ni kulifuza, ni chizungo-zungo.
21 Kuchina cheka nawa muze mungwiza, Zambi yami mangulelesa kumeso jenu, mungunenganyana hali anji waze hanavulumuna kunyima, alioze kalikonyekene ha luchisa, ni utanji,* ni yitanga ya sonyi* yize alingile.
