Te hikwapalika mwaka umuwika muze mandumbu ku Mbetele aputukile kutunga chisaji cha fuji WBBR mu mbonge ya Staten Island, mu Nova Iorque. Hanyima lia kululieka chihela, ayo yatunga zuwo linene lize akwa-kukalakala te matwama ni mazuwo akwo a kutulikila yikwata. Hanyima lia yino, mandumbu yaputuka kukunga yikwata yize te anafupu hanga aputuke kukalakala. Alioze kapalikile mu yipikalo yinji. Chimwe cha ku yipikalo yacho chapwile kutunga antena.

Chapwile chikalu chinji kuyitunga mumu yapwile ni metro 91 ya usuhwe, nawa te katamba kuyisa hakachi ka mapaya aali, hita paya liapwile ni metro 61 ya usuhwe. Ku uputukilo mandumbu kakahashile. Alioze ayo yajikijila ha ukwaso wa Yehova, mba yahasa kuyitunga. Calvin Prosser yoze wakalakalile ku mulimo wacho, yamba ngwenyi: “Nyi te twahashile kutunga kanawa antena yacho ha chisuho chitangu, kachi te mutuhasa kulizata ni kwamba ngwetu, ‘Talenu yize twalinga!’” Mandumbu kahanyine uhaliso weswe kuli Yehova, alioze kwapwile yipikalo yikwo nawa.

Kukalakalisa chisaji chacho te muchichiputuka, alioze kwakapwile yikwata yipema yize te mutulanda. Hachino, mandumbu yawana yimwe transmissor yikulu ya 500 watts, alioze kuyakapwile yipema chinji. Amu kwakapwile microfone, ayo yakalakalisa microfone ya telefone yize te yakusoloka chinji. Ha ufuku umwe ha Fevereiro, mandumbu yakwata chiyulo cha kweseka chisaji. Amu te anafupu sango jize mahanjika, mandumbu yakwata chiyulo cha kwimba yimwe miaso ya Wanangana. Ndumbu Ernest Lowe, keshi kuvulama yize yalingiwileko, iye yamba ngwenyi, muze te anembi miaso yaasanyika kuli Ngaji Rutherford, b yoze wevwile miaso yacho kupalikila ku chisaji cha Brooklyn, chize chapwile ha kilometro 25.

 Ndumbu Rutherford yahanjika ni liji lia miselo ngwenyi: “Echenu kuneha zungo, nuli ngwe ngato waze anatete.” Mandumbu yevwa sonyi, chocho yajima chisaji. Alioze o kanyingikine ngwo, kapwile akulilulieka kulu hanga ahanjike sango ku chisaji cho chitangu.

Ha 24 ya Fevereiro 1924, ha chisuho chitangu chize ahanjikile sango ku chisaji cha fuji, Ndumbu Rutherford yakunjika chisaji chacho kuli Zambi ni pande jize jambile ngwo: “Twakulinga Yeswe Mumu lia Wanangana wa Mesaya.” Iye kambile ngwenyi ulemu wa chisaji chacho, wapwile kukwasa atu chipwe ngwe te kakutayiza yuma yeka hanji kakuya mu yingeleja yeswayo, anyingikine ulumbunwiso wa mashimbu waze tuli kulita ni Mbimbiliya.

Sango jitangu jize ahanjikile jendele kanawa. Ha miaka 33 yize yakawileho, chisaji cha WBBR, chapwile chishina cha kwambulwila sango ja mu ululikiso.

Ha Julho ya 1924, Alongi a Mbimbiliya yalikungulula ha chimwe kukunguluka cha mambonge mu Columbus, Ohio. Ha kukunguluka chacho, hapwile mandumbu a ku yifuchi yeka ni yeka waze apanjikile pande mu Árabe, Inglês, Francês, Alemão, Grego, Húngaro, Italiano, Lituano, Polonês, Russo, Ucraniano ni malimi waze akuhanjika mu Escandinávia. Yihanda yimwe ya katalilo yapalikile ku chisaji. Chikwo nawa, mandumbu yeta kuli akwa-jornal avuluka ngwo Ohio hanga asoneke mitwe yimwe ya kukunguluka cha mambonge ya hita tangwa.

Liamawana 24 ya Julho, atu kuhiana 5,000 waze apwile ha kukunguluka chacho, yaya ni kwambujola mu mbonge yize alingilile kukunguluka. O kahanyine mikanda 30,000 ni kuputuka kusongwela tununu a tununu a malongeso a Mbimbiliya. Kaposhi wa Kutalila kambile ngwo, tangwa liacho liapwile “tangwa lia uwahililo unji.”

Chuma chikwo chilemu ha kukunguluka chacho, chalingiwile Liamatano 25 ya Julho. Ndumbu Rutherford yahanjika ni hamu hakutwala ku yuma yipi yize apwile ni kulinga mangana a mayingeleja. Iye yamba ngwenyi, akwa-mafwefwe, mangana a mayingeleja ni akwa-mingoso “kakukwika atu ahone kwivwa hakutwala ku Wanangana wa Zambi uze muukanehena atu yiwape.” Yamba nawa ngwenyi: “Malunga jacho kanangamishine Kulinunga cha Mavungu (Liga das Nações) ha kwamba ngwo, yili yimwe jila yize Wanangana wa Zambi unayulilamo atu hano hashi.’” Alongi a Mbimbiliya te mafupiwa hamu ni kunyongonona mba ambujole lusango wacho kuli atu.

 Kaposhi wa Kutalila kambile hakutwala ku kukunguluka chacho ngwo: “Chizavu chino chikehe cha tujita twa Mwene chize chapwile ha kukunguluka cha mambonge mu Columbus, chatakamine ku ufulielo ni kupwa akulilulieka hanga ahase kupalika mu kapinda mweswawo te maakokela kuli akwa-kole jo.” Leo Claus, yoze wapwile ha kukunguluka chacho, yamba ngwenyi: “Twayile ni chiseke hanga twambujole mutambi wacho mu njiza yetu.”

Ha Outubro, Alongi a Mbimbiliya yaputuka kuhana tununu twa tumikanda twambile ngwo, Acusados os Eclesiásticos, kopia ja pande jize ndumbu Rutherford alingile ha kukunguluka cha mambonge. Mu yimwe mbonge yikehe avuluka ngwo, Cleveland, Oklahoma, Frank Johnson yahwisa kuhana tumikanda ha minutu 20 muze te kanda achiheta ha ola yize alitesele kuliwana ni akwo. Malunga amwe mu mbonge yacho, yevwa uli unji mumu lia kwambujola cha Frank, chocho yaputuka kumufupa. Kashika, iye kakamanyine ni kushimbwila mandumbu akwo mumu kayile ni kuswama mu yimwe yingeleja yize yapwile hakamwihi. Amu mu yingeleja kumwakapwile mutu, iye yahichika tumikanda Acusados os Eclesiásticos muchima lia Mbimbiliya ya pastore ni ha yitwamo yeswe ta mu yingeleja. Kachilingile kafuji-fuji. Chikwo nawa, amu te achili ni mashimbu anji, yaya ni kulinga chizechene mu mayingeleja akwo aali.

Frank yahiluka fuji-fuji ha chihela chize alitesele kuliwana ni mandumbu. Iye yaswama kunyima lia bomba ya gasolina ni kutala atu waze te anamufupu. Atu jacho yapalika kulutwe lia bomba ya gasolina, alioze kamumwene. Hanyima, mandumbu waze apwile ni kwambujola hakamwihi yamuwana, chocho yaya kwo.

Umwe wa kuli mandumbu jacho kanalumbununa yize yalingiwileko, ngwenyi: “Muze te tunatuhuka mu mbonge, twapalikile kulutwe lia mayingeleja atatu. Kulutwe lia hita yingeleja kwapwile atu amwe 50. Amwe te kanatange kamukanda, akwo te kanasolola kamukanda kacho kuli pastore. Kwasalile hakehe hanga atukwate, kashika twasakwililile Yehova ha kutufunga ni kutukwasa kuchina akwa-kole jacho a Wanangana.”

Mu yifuchi yikwo, Alongi a Mbimbiliya katambile kwambujola nawa ni hamu. Ku norte ya França, Józef Krett yambujola kuli akwa-kukalakala ku mina waze akatukile ku Polônia. Chikwo nawa, mandumbu yasanyika atu a mu mbonge yacho hanga eze ni kupanjika pande jize ndumbu Krett alingile jakwamba ngwo: “Kwasala Hakehe Afu Maahindwisa.” Chocho, umwe ngana wa yingeleja yakanjisa atu hanga ahone kuya ni kwivwa pande jacho, alioze yino kuyakalingiwile. Hachino, atu kuhiana 5,000 yaya ni kwivwa pande ja ndumbu Krett, kuchingako pastore wacho. Ndumbu Krett yasanyika pastore wacho hanga alumbunune yize iye afuliela, alioze pastore yalituna. Hanyima lia kuhanjika pande, ndumbu Krett yahana mikanda yeswe yize apwile nayo kuli atu mumu kamwene ngwenyi, atu kapwile ni pwila yakwivwa umwenemwene wa Liji lia Zambi.—Amo. 8:11.

Mu África, Claude Brown yaputuka kwambujola sango jipema ku Costa ya Ouro yize musono ananyingika ngwo Gana. Pande jize alingile ni mikanda yize ahanyine yakwashile hanga umwenemwene ulitande ni kawashi mu chifuchi chacho. John Blankson, umwe wa kuli waze apanjikile pande jenyi, kapwile ni kulilongesa yuma yinatale ha yitumbo ku shikola yinene. Iye yanyingika ngwenyi, te hawana umwenemwene, mba yamba ngwenyi: “Umwenemwene wangunehenene uwahililo unji, nawa te nakuuhanjika mashimbu eswe ku shikola yinene kuze napwile ni kulilongesela.”

 John yalilongesa ngwenyi, Mbimbiliya kuyishi kuhanjika hakutwala ku tuzambi atatu. Hachino, limwe tangwa iye yaya ku yingeleja Anglicana hanga ahule chikuma chino kuli pastore. Pastore yamuhuma ni kumutenukina, ngwenyi: “Yena ushi Mukwa-Kristu, uli mwana wa Ndiapu. Katuka kuno!”

Muze ahetele ku zuwo, John yasonekena pastore wacho mukanda ni kumwita hanga ahanjike nenyi ha mbunga hakutwala ku longeso lia tuzambi atatu. Pastore yakumbulula mukanda wacho, mba yasanyika John hanga aye mu escritório ya mwata wa alongeshi ku shikola yinene kuze te akulilongesela. Mba longeshi yahula John nyi chamwenemwene iye lume wasonekenene pastore mukanda wacho.

John yakumbulula ngwenyi, “Ewa, yami nausonekene.”

Longeshi yashinjila John hanga asoneke mukanda ukwo ni kwita ukonekeno kuli pastore. Chocho, John yasoneka ngwenyi:

“Longeshi kangwita hanga ngukusonekene mukanda wa ukonekeno, natayiza kuchilinga. Alioze, watamba kutayiza ngwe, yuma yize wakulongesa yili ya mahuza.”

Chakuhona kutayiza, longeshi yamuhula ngwenyi, “John uli lume ni shindakenyo ngwe yino ye unazange kusoneka?”

“Ewa, chatambile kusoneka yuma yeka.”

“Makuhuma kuno. Yena kuuchi kuhasa kulilongesa ku shikola yino nyi mununga ni kwamba yuma yipi hali pastore wa yingeleja yize nguvulu akukwasa.”

“Longeshi, . . . muze wakutulongesa nyi ngwe kutwakwachile chimwe chuma, ngwami hi chipi ko kuhula?”

“Chochene hi chipi ko.”

“Longeshi, yino ye nalinganga. Pastore te kanatulongesa hakutwala ku Mbimbiliya, mba yingumuhula. Nyi kahashile kukumbulula chihula chami, mumu liaka natamba kumwita ukonekeno?”

Blankson kakamuhumine. Chikwo nawa, kakafupiwile kusoneka mukanda wa wa kwita ukonekeno.

Kaposhi wa Kutalila kahanjikile mu maliji akehe hakutwala ku mulimo wa mwaka wacho ngwo: “Mutuhasa kwamba maliji waze ene Ndawichi ambile ngwenyi: ‘Hiwangujichika muya wa tachi ja kwasa jita.’ (Samu 18:39) Uno wapwile mwaka upema chinji mumu twamwene kwoko lia Mwene . . . Tuvumbi twenyi kawahililile chinji ha kwambujola umwenemwene.”

Kusongo lia mwaka wacho, mandumbu yalilulieka hanga akalakale chinji ni chisaji cha fuji mu mulimo wa kwambujola. Mandumbu yatunga chisaji chikwo cha fuji hakamwihi ni Chicago. Chisaji chacho, kachivulukile ngwo WORD. WORD yinalumbunuka liji mu chokwe, mumu mandumbu kapwile ni kwambujola Liji lia Zambi ku chisaji cha fuji. Ha chisuho chacho, ayo yalanda yikwata yipema ya kukalakalisa nayo chisaji, yimwe transmissor ya 5,000 watts. Chocho, yahasa kuhetesa sango ja Wanangana kusuku ndo mu Canadá.

Ha mwaka 1925, Yehova kakwashile Alongi a Mbimbiliya anyingikine kanawa ulumbunwiso wa Usolwelo kapitulu 12. Kuli amwe, ulumbunwiso wacho te muupwa chitalingiso. Alioze akwo te mawahilila ha kunyingika yuma yize muyilingiwa mu malilu, ni chize yuma yacho te muyikwata hali tuvumbi twa Zambi hano hashi.