Ha tangwa 3 lia Dezembro 2022, ndumbu Samuel Campos, wa mu Komite ya Mutango mu Angola, katuhwishile mukanda wa Mateu ni wa Yilinga mu Chokwe ni mu Ibinda. Mikanda yino kayituhwishile ha internet ha chimwe kukunguluka cha kukopa chize atalile kuli atu 2,000.

Lusango wa Yela ja Yehova mu limi lia Chokwe kaputukile ha 2007, muze aputukile chizavu chitangu mu limi lino. Haliapwila, mu Angola muli yikungulwila 10 mu limi lia Chokwe; República Democrática do Congo muli yikungulwila 23.

Umwe wa kuli mandumbu waze akulumbununa mu limi lia Chokwe, yamba ngwenyi: “Tuli ni Mbimbiliya jinji mu Chokwe. Yimwe yapwa yashi, alioze yakuteta-teta manyonga waze te atamba kupwa mu yisoneko. Yikwo kuyishi kuteta manyonga, alioze yakuzachisa maliji akalu. Muze ngunatange Mbimbiliya yino yaha, ngunevu ngwe Yehova kanahanjika pundu ni yami.”

Chikungulwila chitangu mu limi lia Ibinda chaputukile ha 2014. Haliapwila, kuli yikungulwila 13 mu limi lia Ibinda. Shimbu te kanda achituhwisa mukanda wa Mateu ni Yilinga, kukwakapwile Mbimbiliya niyimwe mu limi liacho. Hachino, mandumbu te kakuzachisa Tradução do Novo Mundo mu putu. Umwe ndumbu wa mu chizavu cha kulumbununa mu Ibinda, yamba ngwenyi: “Kuli versu jimwe ya Mbimbiliya jize haliapwila ngunawane kanawa ulumbunwiso. Chili chiwape kulinga chihanda mu chizavu chino. Chino chatakamisa ufulielo wami.”

Tunafuliela ngwetu, mikanda yino yapwa kutuhwisa mu Chokwe ni mu Ibinda muyikwasa mandumbu jetu akundame kuli Yehova.—Tiangu 4:8.