1. Met ekkewe popun Chón Kraist me Chón Pwáraatá Jiowa lón ei fansoun ra léllé wóón?

 RA TINIKKEN le afalafal. Ra tipetekison le etiwa ewe álillis me emmwen seni ewe ngún mi fel. Atun ra kúna riáfféúmwáál, rese úkútiw le afalafal. Me Kot a fókkun efeiéchúúr. Ina met a fis ngeni ekkewe popun Chón Kraist me a pwal ina ussun ren Chón Pwáraatá Jiowa lón ei fansoun.

2, 3. Menni pwóróus a fókkun aúchea lón ewe puken Féffér?

² Ese mwáál, ekkewe pwóróus mi ámmeseik lón ewe puken Féffér ra apéchékkúlok me alapaaló óm lúkú! A mmen aúchea pokiten ina chék ewe pwóróus mi feito seni Kot mi affata met ekkewe popun Chón Kraist ra féri mwirin án Jises feitá láng.

³ A pwá lón ewe puken Féffér iten 95 aramas seni 32 leeni, 54 telinimw, me 9 fénú. A apwóróusa ussun chókkewe mi tekisosson, ekkewe mi lamalamtekia nge ra fiti lamalam chofona, ekkewe néúwisin mwú mi paatá, me chókkewe mi ú ngeni néún Kot kewe aramas fán kirikiringaw. Nge a kon menlapei pwóróusen chienach kewe Chón Kraist lón fansoun ekkewe aposel mi likiitú fán weiresin manawer rán me rán nge ra afalafala ewe kapas allim fán tinikken.

4. Pwata ka meefi pwe ka ririéch ngeni ewe aposel Paul, Tapita, me ekkewe pwal ekkóch chón angang ngeni Jiowa lóóm?

⁴ A fen arapakkan 2,000 ier a ló seni fansoun ekkewe soufós mi tinikken Piter me Paul, ewe tokter mi áchengicheng Luk, ewe mwán mi kisáséú Parnapas, ewe mwán mi pwora Stifen, ewe fefin mi kirekiréch Tapita, ewe fefin mi awasélaéch Litia, me pwal chómmóng néún Jiowa kewe chón angang mi túppwél. Inaamwo iká iir chón lóóm, nge ussun itá sia pwal ririéch ngeniir. Pwata? Pokiten a taitap wisach le asukula aramas pwe repwe wiliiti chón tapweló mwirin Jises. (Mat. 28:19, 20) A ifa me feiéchúch le álisaatá ena angang!

5. Ia néún Jises kewe chón káé ra poputá le afalafal ie?

⁵ Ekieki ussun ewe wis Jises a ewisa ngeni chókkewe mi tapweló mwirin. A erá: “Oupwe angei manaman atun ewe ngún mi fel  epwe feito wóómi, me oupwe chón pwáraatá ussui lón Jerusalem, lón unusen Jutia me Sameria, me tori lesopwuchikin fénúfan.” (Féf. 1:8) Akkomw, ewe ngún mi fel a atufichi néún kewe chón káé ar repwe afalafal ussun i “lón Jerusalem.” (Féf. 1:1–8:3) Mwirin, fán emmwenien ewe ngún mi fel, ra afalafal “lón unusen Jutia me Sameria.” (Féf. 8:4–13:3) Iwe mwirin ena ra poputá le uwei ewe kapas allim “tori lesopwuchikin fénúfan.”—Féf. 13:4–28:31.

6, 7. Atun sia fiti ewe angangen afalafal, met sókkun mettóch a wor rech nge ese nóm ren chienach kewe lón fansoun ekkewe aposel?

⁶ Atun chienach kewe lóóm ra afalafal, ese nóm rer unusen ewe Paipel. Esaamwo wor ewe puken Mattu tori ina epwe ewe ier 41. Paul a makkeei ekkóch néún kewe taropwe mwen wesin ewe puken Féffér lón ina epwe ewe ier 61. Ewer, ese wor néún ekkena popun Chón Kraist Paipel mi unus are ekkewe sókkopaten puk ra tongeni likiti ngeni chókkewe mi sani ar afalafal. Me mwen án ekkewe chón Jus iir Chón Kraist wiliiti néún Jises chón káé, ra rong álleaan ewe Tesin Ipru lón ewe sinakok. (2 Kor. 3:14-16) Inaamwo iká ra rong álleaan ewe Tesin Ipru lón ewe sinakok, nge a chúen lamot ar repwe káéfichi án Kot we Kapas pokiten eli ra chék ereni chókkewe ra fós ngeniir ekkewe wokisin ra kémwéchúnúk wóón.

⁷ Lón ei fansoun, lape ngenikich a wor pwisin néúch Paipel me chómmóng puk me tract mi lóngólóng wóón Paipel. Sia álisi aramas le wiliiti néún Jises chón káé ren ach afalafala ewe kapas allim lón 240 fénú me lón chómmóng fós.

8, 9. (a) Ewe ngún mi fel a atufichi néún Jises kewe chón káé le féri met? (b) Met ewe chón angang mi túppwél a akkawora ren álillisin ewe ngún mi fel?

⁸ Atun Jises a ereni néún kewe chón káé ar repwe pwáraatá ewe enlet ussun, iei met a ereniir: “Oupwe angei manaman atun ewe ngún mi fel epwe feito wóómi.” Fán emmwenien án Kot we ngún fel, chókkana mi tapweló mwirin Jises repwe fókkun pwáraatá ewe enlet wóón unusen fénúfan. Ren álillisin ewe ngún mi fel, Piter me Paul ra echikara ekkewe mi semmwen, atowu ekkewe timon, me pwal mwo nge amanawasefáli ekkewe mi máló! Iwe nge, ewe ngún mi fel a atufichi ekkewe popun Chón Kraist ar repwe féri pwal eú angang mi kon lamot. A atufichi ekkewe aposel me ekkewe pwal ekkóch chón káé le atoura pwóróus mi enlet me pwúng mi emmweni aramas ngeni manaw esemuch.—Jon 17:3.

⁹ Lón ewe Pentikos ier 33, néún Jises kewe chón káé ra kapas “lón sókkopaten fós, ewe manaman a atufichiir le kapas.” Iwe ra tufichin  afalafal ussun “ekkewe mettóchun Kot mi amwarar.” (Féf. 2:1-4, 11) Lón ach ei fansoun, sise kan mwittir sile eú mineféén fós. Iwe nge ren álillisin án Kot we ngún mi fel, ewe chón angang mi túppwél a awora chómmóng puk mi lóngólóng wóón Paipel lón sókkopaten fósun fénú. Áwewe chék, iteiten maram a print fite million puk itelapan Ewe Leenien Mas me Awake!, me wóón ach we website, jw.org, a kawor puk me video mi lóngólóng wóón ewe Paipel lón lap seni 1,000 fós. Meinisin ekkena minen álillis a atufichikich ach sipwe esilefeili “ekkewe mettóchun Kot mi amwarar” ngeni aramasen mwú, einang, me kapas meinisin.—Pwár. 7:9.

10. Seni ewe ier 1989, met a fis ren ewe angangen chiyakúún Paipel?

¹⁰ Seni ewe ier 1989 ewe chón angang mi túppwél a fókkun achocho le awora ewe New World Translation of the Holy Scriptures lón chómmóng fós. A fen chiyakú ewe Paipel lón lap seni 200 fósun fénúfan, me a fen print fite fite million Paipel me epwe chék pwal lallapoló. A chék tufich ekkena mettóch ren álillisin Kot me an we ngún mi fel.

11. Ifa ussun a chiyakú néúch kewe puk mi lóngólóng wóón Paipel?

¹¹ Fitengéréú Chón Kraist lón lap seni 150 fénú me leeni ra álillis lón ewe angangen chiyakú nge ese wor peioffur. Itá sisap máirú ren ena, pokiten ese wor pwal eú mwicheich wóón fénúfan a nóm fán emmwenien ewe ngún mi fel mi “unusen pwáraatá” ewe enlet ussun Jiowa Kot, néún we King ewe Messaia, me ewe Mwú mi fen nemenem lón láng!—Féf. 28:23.

12. Ifa ussun Paul me ekkewe pwal ekkóch Chón Kraist ra tufichin féri ewe angangen afalafal?

¹² Atun Paul a afalafal ngeni ekkewe chón Jus me ekkewe chón lúkún Israel lón Antiok lón Pisitia, “chókkewe letiper a páengeni ar repwe etiwa ewe enlet mi awora manaw esemuch, ra wiliiti chón lúkú.” (Féf. 13:48) Lemuchún ewe puken Féffér, Luk a makkeei pwe Paul a ‘afalafala ewe Mwúún Kot . . . fán watteen pwora nge ese wor met a pinei.’ (Féf. 28:31) Paul a afalafal ia? A nóm Rom, ewe iolapen nemenem mi kon péchékkúl lap seni meinisin! Ese lifilifil iká ekkewe popun Chón Kraist ra esilefeili ewe enlet lón ar eáni eú afalafal are lón pwal eú napanap, nge ra féri ren álillisin me emmwenien ewe ngún mi fel.

13. Pwata a lamot ach sipwe iótek atun sia kúna riáfféúmwáál?

¹³ Atun néún Jises kewe chón káé ra kúna riáfféúmwáál, ra tingorei Jiowa an epwe apworaar. Met mwirilóón? Ra uroló ren ngún mi fel me ra pwora le afalafala án Kot we Kapas. (Féf. 4:18-31) Sia pwal  ióteki án Kot tipáchem me ewe péchékkúl le sópweeló ach afalafal inaamwo iká aramas ra eriáfféúkich. (Jem. 1:2-8) Pokiten sia angei álillis seni án Kot we ngún mi fel, sia tongeni sópweeló le afalafal. Ese wor met a tongeni akaúlóói ewe angangen afalafal, áwewe chék ren án aramas ú ngenikich are luluulóón ar eriáfféúkich. Atun aramas ra ú ngenikich, a lamot ach sipwe tingorei álillisin án Kot we ngún mi fel me an we tipáchem me pwora pwe sipwe tongeni esilefeili ewe kapas allim.—Luk 11:13.

14, 15. (a) Met a fis pokiten “ewe angangen eriáfféú mi tori Stifen”? (b) Lón ach ei fansoun, ifa ussun chómmóng aramas seni Siberia ra káé ewe enlet?

¹⁴ Stifen a afalafal fán pwora me mwen an ninniiló lepéún ekkewe chón oput. (Féf. 6:5; 7:54-60) Atun “a fis watteen eriáfféú” lón na fansoun, meinisin ekkewe chón káé ra parasfetál chilóón chék ekkewe aposel lón unusen Jutia me Sameria. Nge rese úkútiw le afalafal. Filip a ló ngeni Sameria pwe epwe “afalafala ngeniir ussun ewe Kraist” me a wor ekkóch ra wiliiti chón káé. (Féf. 8:1-8, 14, 15, 25) Pwal och, sia silei pwe “chókkewe mi toropasfeil pokiten ewe angangen eriáfféú mi tori Stifen, ra fetálfeil tori lón Finisia, Saipros, me Antiok. Nge ra afalafala ewe kapas ngeni chék ekkewe chón Jus. Iwe nge, ekkóch me lein ekkewe mwán mi etiir, iir seni Saipros me Sairine, ra feiló Antiok me poputá le fós ngeni ekkewe aramas mi fós lón kapasen Krik, ra afalafala ewe kapas allim ussun ewe Samol Jises.” (Féf. 11:19, 20) Lón na fansoun, pokiten ekkena popun Chón Kraist ra kúna riáfféúmwáál me ra mwékút seni leenier, ra sópweeló le afalafala pwóróusen ewe Mwú lón chómmóng leeni.

¹⁵ Lón ach ei fansoun, och mettóch mi ussun ena a fis Soviet Union me lóóm. Ákkáeúin lón ekkewe ier 1950, fitengéréú Chón Pwáraatá Jiowa ra ooló Siberia. Pokiten ra toropasfeil lón sókkopaten leeni, a chéúfetál ewe kapas allim lón ena fénú mi watte. Esap fókkun naf ngeni chómmóng Chón Pwáraatá ar repwe pwisin mééniir le sái ina epwe 6,000 mwail le afalafala ewe kapas allim lón na fénú! Iwe nge, ewe mwú a wisen tiiniireló Siberia. Emén Chón Kraist mwán a erá: “Fitengéréú aramas mi letipwenechar lón Siberia ra káé ewe enlet, pokiten ekkewe néúwisin mwú.”

16, 17. Met sókkun pisekin ánnet ussun án Jiowa efeiéchú ewe angangen afalafal a mak lón ewe puken Féffér?

¹⁶ Ese fókkun wor ach tipemwárámwár pwe Jiowa a efeiéchú ekkewe popun Chón Kraist. Paul me ekkewe ekkóch ra fótuki me étútúúi, “nge Kot a ákkámááraatá.” (1 Kor. 3:5, 6) Ekkewe pwóróus mi mak  lón ewe puken Féffér a awora pisekin ánnet pwe ra mámmááritá pokiten án Jiowa efeiéchú ar angang le afalafal. Áwewe chék, “ewe kapasen Kot a sópwósópwoló le chéúfetál me a fókkun chóchchómmóngoló chóchóón ekkewe chón káé lón Jerusalem.” (Féf. 6:7) Pokiten ekkena Chón Kraist ra achéúfetálei kapasen Kot, “meinisin ekkewe mwichefel lón unusen Jutia me Kalili me Sameria ra nóm lón fansoun kinamwe, ra péchékkúleló, me atun ra feffetál lón ar niwokkusiti Jiowa me angei ourur me ren ewe ngún mi fel, iwe ra chék chóchchómmóngoló.”—Féf. 9:31.

¹⁷ Lón Antiok lón Siria, ekkewe chón Jus me chókkewe mi eáni fósun Krik ra rong ewe enlet seni ekkewe Chón Kraist mi pwora. “Pwal och, péún Jiowa a etiir, me chómmóng ra wiliiti chón lúkú me kul ngeni ewe Samol.” (Féf. 11:21) A pwal mak pwe lón ena leeni, “án Jiowa kapas a chéúfetál me a chómmóngoló aramas ra lúkú.” (Féf. 12:24) Me atun Paul me ekkewe ekkóch ra achocho le afalafal ngeni ekkewe chón lúkún Israel, ren “án Jiowa manaman, an we kapas a chéúfetál me péppéchékúleló.”—Féf. 19:20.

18, 19. (a) Pwata sia silei pwe “péún Jiowa” a etikich? (b) Apwóróusa eú pwóróus mi affata pwe Jiowa a álisi néún kewe aramas.

¹⁸ Ese fókkun wor ach tipemwárámwár pwe “péún Jiowa” a etikich lón ach ei fansoun. Ina popun a chóchchómmóngoló aramas mi fangoló manawer ngeni Jiowa me papatais. Iká esap pwúlún án Jiowa álillis me feiéch, iwe sisap tufichin likiitú fán án aramas eriáfféúkich, me fán ekkóch ar eriáfféúkich a kon luluuló. Me ren an álillis sia tongeni sópwéch le apwénúetá wisach le afalafal, ussun chék Paul me ekkewe pwal ekkóch popun Chón Kraist. (Féf. 14:19-21) Fansoun meinisin Jiowa Kot epwe álisikich, me “pöün mi nom tori feilfeilachök” epwe álisikich lón meinisin ach kewe riáfféú. (Tut. 33:27) Sipwe pwal chechchemeni pwe “pokiten itan mi tekia” esap fókkun likitaaló néún kewe aramas.—1 Sam. 12:22; Kölf. 94:14.

¹⁹ Ei pwóróus a ánneta pwe Jiowa a álisi néún kewe aramas: Pokiten Pwiich Harald Abt a sóssópweló le afalafal, ekkewe Nazi ra tiinaaló ngeni ewe leenien fétek lón Sachsenhausen atun ewe Oruuen Maunen Fénúfan. Lón ewe May 1942 ekkewe polis ra ló ngeni imwen pwúlúwan we itan Elsa. Ra aresini me angei seni néúr we kúkkún nengngin. Mwirin Elsa a ttittiló ngeni fitu leenien fétek. Iei met a erá: “Lón ekkewe ier úa kalapus lón Germany úa káé eú mettóch mi fókkun aúchea. Ina ái kúna ifa ussun án Kot we ngún mi fel a tongeni fókkun apéchékkúlakich atun sia nóm fán watteen sóssót! Me mwen úa ares, úa álleani eché taropwe seni emén Chón Kraist fefin mi erá pwe atun sia nóm fán watteen sóssót, án Jiowa we ngún mi fel a efisi  ach sipwe meefi kinamwe. Me rei pwe a sópweei an kapas. Nge atun úa pwisin nóm fán sóssót, úa fókkun lúkú alon na. A fókkun fis ena. A weires án emén epwe weweiti iká ese pwisin fis ngeniir. Nge a fókkun fis ngeniei.”

20. Met Paul a féri atun a kalapus lón imwan we, me ifa ussun ekkóch chienach kewe ra tongeni péchékkúletá ren pwóróusan?

²⁰ A muchúló ewe puken Féffér ren án Paul ‘afalafala ewe Mwúún Kot’ fán tinikken. (Féf. 28:31) Pokiten a kalapus lón imwan we, iwe ese tongeni afalafal imw me imw lón Rom. Iwe nge, a tinikken le afalafal ngeni meinisin mi etto chuuri. Lón ach ei fansoun, ekkóch pwiich kewe mi áchengicheng ra mwenilóng lón imwer, eli ekkóch me leir rese tongeni pwáátá seni ar bed, are ra nóm lón ekkewe leenien túmún chinnap, mi semmwen, are apwangapwang. Iwe nge, a fókkun péchékkúl ar tongei Kot me ar mochen afalafal ussun i. Sia kan ióteki chókkana me sia tongeni tingorei Semach we lón láng an epwe emmweniir ngeni chókkewe mi mochen káé ussun i me an kewe kókkót mi amwarar.

21. Pwata a mmen atapwalapwal ach féri ewe angangen esilefeili pwóróusen ewe Mwú?

²¹ Lape ngenikich sia tongeni fiti ewe angangen afalafal imw me imw are pwal ekkóch alen ach álisi aramas le káé ussun Jiowa. Ina popun, ousipwe achocho úkúúkún ach tufich le apwénúetá wisach le esilefeili pwóróusen ewe Mwú, me unusen pwáraatá ewe enlet “tori lesopwuchikin fénúfan.” Sia mirititi pwe ei angang a mmen atapwalapwal, pokiten sia kúna “esissillen” pwe sia nóm lón ekkewe ránin lesópwólóón. (Matt. 24:3-14) Ewer, a mmen atapwalapwal ach ei fansoun. Lón ei fansoun, a ‘chómmóng minne sia féri lón angangen ewe Samol.’—1 Kor. 15:58.

22. Atun sia wikkitiwiti ránin Jiowa we, met sipwe úppós le féri?

²² Atun sia witi warotoon “ränin ewe Samol mi Lapalap, ewe rän mi lap o eniwokus,” ousipwe úppós le afalafal fán pwora me túppwél. (Sow. 2:31) A chúen suuk ngenikich ach sipwe chuuri chókkewe mi ussun ekkewe chón Perea, iir mi “fókkun mwasangasang le etiwa ewe kapas.” (Féf. 17:10, 11) Amwo sipwe unusen pwáraatá ewe enlet tori ach áwesaaló ewe angang. Atun a fis ena ussun itá sipwe rong: “Mi fókkun éch, chón angang mi múrinné me túppwél!” (Mat. 25:23) Iká sia tinikken le féri wisach lón ewe angangen afalafal me akkamwéchú ach túppwél ngeni Jiowa, iwe sipwe fókkun pwapwa tori feilfeiló pokiten sia álillis le “unusen pwáraatá” pwóróusen ewe Mwúún Kot!