LESEN 13
Timoty A Mochen Álisi Aramas
Timoty emén alúwél mi pwapwa le álisi aramas. A sái ngeni chómmóng fénú pwe epwe álisi aramas. Pokiten ena, a mmen apwapwa manawan. En mi mochen rongorong usun?—
Inen Timoty we me inan we chinnap ra áiti ngeni usun Jiowa
Timoty a mááritá lón eú leeni itan Listra. Seni lekúkkúnún, inan we chinnap Lois me inan we, Eunike ra poputá le ákkáiti ngeni usun Jiowa. Atun Timoty a mámmááritá, a mochen álisi aramas le káé usun Jiowa.
Atun Timoty a chúen alúwél, Paulus a tingorei an epwe fiti le sái me afalafal lón ekkewe ekkóch fénú. Timoty a apasa: ‘Ewer!’ A mmólnetá le ló me álisi aramas.
Timoty a fiti Paulus le sái ngeni eú telinimw itan Tesalonika, lón Masetonia. Ren ar repwe tori ena leeni, mi lamot ar repwe fetálettam me fiti efóch mwoota. Atun ra war, ra álisi chómmóng aramas le káé usun Jiowa. Nge ekkóch aramas ra song me sótun efeiengawer. Ina popun Paulus me Timoty ra sú me afalafal lón pwal ekkóch leeni.
Manawen Timoty a apwapwa me ámmeseik
Mwirin fitu maram, Paulus a tingorei Timoty an epwe liwiniti Tesalonika me ppii ifa usun ekkewe Chón Kraist ikena ie. Iwe, a lamot an epwe watte án Timoty pwora ren an epwe liwiniti ena leeni mi efeiengaw! Nge Timoty a liwin pokiten a ekieki ekkewe Chón Kraist ikena ie. Iwe mwirin, a liwinló ren Paulus nge a uwei pwóróus mi múrinné. Ekkewe Chón Kraist lón Tesalonika ra fókkun achocho!
Timoty me Paulus ra angangfengen ren fitu ier. Fán eú, Paulus a makkeei pwe Timoty, i ewe mi múrinné seni meinisin ren an epwe tiinaaló pwe epwe álisi ekkewe mwichefel. Timoty a tongei Jiowa me aramas.
Ka tongei aramas me mochen álisiir le káé usun Jiowa?— Ika ewer, iwe ka tongeni eáni manaw mi fókkun apwapwa me ámmeseik usun chék Timoty!
