Sipwe ekieki pwe itá kan sia nóm lón ewe telinimw Jeriko. Ena telinimw a nóm lón ewe fénú Kanaan, ikewe ie ekkewe aramas rese lúkú Jiowa. Emén fefin itan Rahap a nónnóm ikena ie.

Lenengnginin Rahap, a rongorong pwóróusen ifa usun án Moses áimufeseni ewe Setipar me an emmwenawu chón Israel seni Isip. A pwal rongorong ifa usun Jiowa a álisiir le win lón ar maun ngeni chón oputer. Iwe, iei a rongorong pwe ekkewe chón Israel ra nóm arapakkan Jeriko!

Eú pwiin, rúúemén chón Israel ra feiló Jeriko pwe repwe operi ewe telinimw. Ra feiló ren imwen Rahap we. A etiwer ar repwe tolong me nónnóm. Lón ena pwinin, ewe kingen Jeriko a silei pwe ekkewe spai ra nóm lón ena telinimw me ra feiló lón imwen Rahap we. Iwe, ewe king a tiinaaló ekkóch mwán pwe repwe liapeniir. Rahap a aopa ekkewe rúúemén spai wóón asen imwan we me a ereni néún ewe king kewe chón angang: ‘Ekkewe spai ra feito nge ra fen ló seni ei telinimw. Ika oupwe feiló iei, oupwe chúen tongeni liapeniir!’ En mi silei pwata Rahap a túmúnú ekkewe spai?— Pokiten a lúkú Jiowa me a silei pwe epwe ngeni chón Israel ewe fénú Kanaan.

Mwen án ekkewe spai sú seni imwen Rahap we, ra pwonei pwe i me an we famili repwe manaw atun Jeriko epwe taló. En mi silei met ra apasa ngeni pwe epwe féri?— Ra erá: ‘Angei ei sáál mi par me eitiwaatiw wóón asammwachomw we. Ika kopwe féri ena, meinisin chón lón imwom we repwe manaw.’ Rahap a féri minne ekkewe spai ra ereni epwe féri. En mi silei met a fis mwirin?—

Fitu rán mwirin, ekkewe chón Israel ra karis pwelin ewe telinimw fán mosonoson. Ra karis pwelin ewe telinimw lón wonu rán, fán eú iteiten rán. Nge lón efisuen rán ra karis pwelin ewe telinimw fán fisu. Iwe mwirin, ra léúwommóng le púchér. Jiowa a efisi pwe tittin ewe telinimw a turutiw. Nge a chúen útá ewe  imw mi wor efóch sáál mi par a ititiw me lón asammwachoon! En mi kúna me lón ei lios?— Iwe, Rahap me an we famili ra manaw!

Met ka tongeni káé seni Rahap?— Rahap a lúkú Jiowa pokiten meinisin ekkewe pwóróus mi amwarar a káé usun. Pwal en ka kákkáé chómmóng pwóróus mi amwarar usun Jiowa. En mi lúkú Jiowa usun chék Rahap?— Aua silei pwe ka pwal ina usun!