Annette ese tepereni án emén turufi me oturatiw. Iei alon: “Ua achocho úkúkún ai tufich le fiu ngeni. Ua sótun púchér nge ese towu léúwei. Ua tiini, kikini, éfénú me reppwe i. Nge atun a pwosuei, ua wesen únúúnúló.”

Met kopwe féri ika a fis ngonuk met a fis ngeni Annette?

Inaamwo ika ka kan mmólnéch, neman ren óm túmúnúéch atun ka ló ekis lepwin, nge a chúen tongeni fis minne mi ngaw. Paipel a apasa: “Ämi ousap fen mwo nge silei met epwe fis ngeni manauemi lesor.”—James 4:14.

Usun chék Annette, a fis ngeni ekkóch kúkkún me sáráfé reip seni chókkewe rese sissileer. Ekkóch a fis ngeniir reip seni chókkewe ra sissileer pwal mwo nge seni emén chón ar famili. Atun a chék 10 ierin Natalie, emén chón órun teenage át a reipei. Iei alon Natalie: “Lepoputáán use ereni emén pún ua fókkun niwokkus me sáw.”

Annette a chúen mengiringir ren met a fen fis ngeni. Iei alon: “Ua kan rúwáinéi lón mékúrei met a fis lón na pwinin. Ika ú silei upwe fen wesen achocho le fiu ngeni. Nge ren enletin, mwirin an pwosuei ua peeló ren ai niwokkus. Use chúen tongeni féri och mettóch nge ua áneánei pwe itá ua pwal féri och me lúkún ena.”

Natalie a pwal mengiringir. A erá: “Itá usap kon lúkú aramas. Semei kewe me inei ra fen allúkú ngenikem me pwii we pwe aupwe kan chék mwimmwin iteitan aua urumwot lúkún, nge use aúseling. Ina popun ua meefi pwe ua ámecheresi ngeni chón órui we an epwe reipe ei. Minne a fis a eletipechowu ai we famili me ua meefi pwe ua efisi ar watteen riáfféú. Ina met a kon osukosukaei.”

Ika a pwal ina usun meefiom ren meefien Annette are Natalie, kopwe fókkun ekieki pwe ewe emén mi fis ngeni kirikiringawen reip esap turun tipan. Ekkóch aramas rese meefi choun ewe féfféringaw, ra kúnetipingen pwe ina pwúkúpwúkún napanapen ekkewe át me tipisin chókkewe a fis ngeniir ena pún ra suuki alen an epwe fis ngeniir. Nge ese fókkun wor emén a fich ngeni an epwe fis ngeni reip. Ina popun ika emén a féri ngonuk ei sókkun féffér mi kon ssenúk ngawan, iwe esap tipisum!

Ewer a mecheres óm álleani ei pwóróus: “esap tipisum” nge a weires óm kopwe lúkú. Ekkóch ra aopaaló meefier ren met a fen fis ngeniir me ra riáfféú ren ar mengiringir me ekiek ese pwúng. Nge ié epwe win ika kese akkaffat, en are ewe chón reip? Kosap mut ngeni an epwe okkufuk, pokiten mi wor met ka tongeni féri.

Paipel a kapas usun ewe mwán mi tuppwél itan Hiop atun a fókkun kúna weires lón manawan: “Üpwe fokun pwärawu ai siö, üpwe kapas fän riaföün letipei.” (Hiop 10:1) Ika kopwe usun Hiop le pwári met a fis ngonuk, iwe neman kopwe pwal kúna álillis. Óm ereni emén ka lúkúlúkú met a fis ngonuk, epwe álisuk le áppánaatá óm weires me álisuk pwe kopwe ngas seni ekkewe sókkun memmeef mi kon aosukosukok.

Annette a pwári pwúngún ena. Iei alon: “Ua fós ngeni emén chiechiei me a pese ei pwe upwe fós ngeni rúúemén mwán mi ásimaw lón ai we mwichefel. Ua pwapwa pwe ina met ua féri. Ra fós ngeniei fán chómmóng me ra ereniei pwe esap tipisi met a fis me ina met mi lamot ai upwe rong. Ese fókkun ekkekis tipisi.”

Natalie a fós ngeni seman kewe me inan usun án emén reipei. Iei met Natalie a apasa: “Ra álisiei me apéchékkúlaei. Ra pese ei pwe upwe pwári meefiei me ina met a álisiei ai usap kon letipechou me song lón letipei.”

Natalie a pwal kúna ourur seni an iótek. Iei met a apasa: “Ai ikkiótek ngeni Kot a álisiei nge ákkáeúin lón ekkewe atun ua meefi pwe ese wor emén ua tongeni ereni usun ai osukosuk. Atun ua iótek ua tongeni chék pwári masouen letipei. Ina met a fókkun ekinamwe ei.”

Kopwe pwal kúna pwe a wor fansoun péchékkúletá. (Än Salomon Afalafal 3:3) Túmúnú péchékkúlen inisum me ekiekum. Annafa óm asésé. Nge a kon fen lamot óm lúkúlúk wóón Jiowa, ewe Kot mi echipakich lón ach riáfféú meinisin.—2 Korint 1:3, 4.

Ika en emén nengngin me noum we kammwet a erenuk pwe oupwe féri féffér mi limengaw, iwe ese wor ngawen óm tuwenewen le ereni: “Komwan emmwéú!” are “Kosap attapaei!” Kosap niw ika noum we kammwet epwe likitukoló. Ika a song reom ren ena, iwe kopwe fen likitaló! A fich ngonuk emén mi tipenmwán, ewe mi súféliti inisum me súféliti óm lúkú.

Coretta a apasa: “Lón sukul, ekkewe át ra kan weiti achen ai we chichipanto me lesékúri me kapasingaw ngeniei. Iwe, ra ereniei pwe upwe fen pwapwa ika upwe lisowu ngeniir.”

Ka ekieki pwe ekkena át ra

1. Urumwotei?

2. Núesik ngeni?

3. Turunufasa lón pekin lisowu?

Candice a apasa: “Atun ua nóm wóón efóch bus, emén át a poputá le kapasingaw ngeniei me turufiei. Ua pééni péún me ereni epwe sú. A attolaei usun ngang emén mi umwes.”

Óm ekiek nge met ei át a féri ngeni Candice?

1. Urumwotei?

2. Núesik ngeni?

3. Turunufasa lón pekin lisowu?

Bethany a apasa: “Lón ewe ier, emén át a kan ereniei pwe a saniei me aupwe kukkunou me kammwetfengen inaamwo ika ua kan apasa aapw. Fán ekkóch a tottofi pei. Ua ereni epwe emmwéú nge ese. Nge atun ua féti nei we suus, a pisiri nikinongui.”

Óm lúkú nge ei át a:

1. Urumwotei?

2. Núesik ngeni?

3. Turunufasa lón pekin lisowu?

Nampa 3 ina pélúwen meinisin ekkena kapas eis.

Pwata a sókkóló turunufas lón pekin lisowu seni núesik me urumwot?

Turunufas lón pekin lisowu ina mochenin ewe mi féri, nge ewe mi fis ngeni ena turunufas a meefi sáw. Turunufas lón pekin lisowu a sópwósópwóló inaamwo ika ewe mi fis ngeni ena turunufas a fen apasa pwe epwe emmwéú.

A watte ngawen turunufas lón pekin lisowu. A tongeni emmwen ngeni reip.