Atun sia nóm lein chienach kewe Chón Kraist, sia meefieni meefien King Tafit ei: “Nengeni usun mürinan me apwapwan, lupwen pwipwi ra nonomfengen fän tipeeu.” (Kölfel 133:1) Ach tipeeúfengen, ese chék pwisin fisitá. A lamot án emén me emén kich sipwe álisatá ewe tipeeú lefilach.

1. Ifa ewe mettóch mi fókkun aúchea sia meefi atun sia nóm lein néún Kot aramas?

Ika kopwe fiti eú án Chón Pwáraatá Jiowa mwich lón pwal eú fénú, eli kosap tongeni weweiti ar fós, nge kopwe chúen meefi kinamwe, kúna pwe ra awasélaéchuk, me ra tongeok. Pwata? Pún a chék taitap ekkewe puken álillisin Paipel sia néúnéú le káé. Sia pwal achocho le pwári tong lefilach. Ese lifilifil ia sia nóm ie, oukich meinisin sia “angang ngeni [Jiowa] fän tipeeu.”​—Sefanaia 3:9.

2. Met ka tongeni féri pwe kopwe álisatá tipeeú?

“Oupwe wesewesen echenifengenikemi ren unusen lelukemi.” (1 Petrus 1:22) Ifa usun ka tongeni apwénúetá ena kapasen emmwen? Kosap nefótófót wóón apwangapwangen ekkewe ekkóch, nge kopwe fen achocho le kútta napanaper kewe mi múrinné. Kosap chék chiechi ngeni chókkewe mi taitap met oua sani, nge kopwe pwal achocho le chiechi ngeni chókkewe iir seni sókkopaten fénú. Sia pwal tongeni achocho le péútaaló ese lifilifil memmeefin aapaap sia eáni.​—Álleani 1 Petrus 2:17. a

3. Met kopwe féri ika oua tipefesen me emén chienom Chón Kraist?

Inaamwo ika sia tipeeúfengen, nge sise unuséch. Eli fán ekkóch sipwe elichippúngú are fen ámeteki emén chienach Chón Kraist. Ina popun án Kot we Kapas a erenikich ach sipwe “amusamusfengen.” A pwal erá: “Oupwe fokun amusamusfengen usun ach Samol a amusala ämi tipis.” (Álleani Kolose 3:13.) Sia fen ámeteki letipen Jiowa fán chómmóng, iwe nge a omusakicheló. Iwe a pwal mochen ach sipwe omusaaló chienach kewe Chón Kraist. Ika ka esilla pwe ka ámeteki letipen emén, achocho le ataweei ewe osukosuk.​—Álleani Mateus 5:23, 24. b

 KÚTTAFICHI

4. Pworacho ngeni aapaap

Sia mochen tongei chienach kewe Chón Kraist meinisin. Nge eli a weires ngenikich ach sipwe chiechi ngeni emén mi sókkóló senikich. Met epwe álisikich? Álleani Föför 10:34, 35, me mwirin pwóróusfengen wóón ekkeei kapas eis:

• Jiowa a etiwa aramas meinisin ar repwe néún Chón Pwáraatá. Ifa usun ka tongeni áppirú i atun ka ekieki usun chókkewe mi sókko sonuk?

• Met sókkun memmeefin aapaap a chéú lón leeniom we ka mochen túmúnuk seni?

Álleani 2 Korint 6:11-13, me mwirin pwóróusfengen wóón ei kapas eis:

• Ifa usun ka tongeni ririéch ngeni chienom kewe Chón Kraist iir seni pwal eú fénú?

5. Tipemecheres le omusaaló tipis me kútta kinamwe

Jiowa a tipemecheres le omusaaló tipisich inaamwo ika ese pwal lamot ach sipwe omusaaló tipisin. Álleani Kölfel 86:5, me mwirin pwóróusfengen wóón ekkeei kapas eis:

• Met ei wokisin a áiti ngonuk usun Jiowa?

• Pwata ka kilisou ren an omusaaló tipis?

• Ineet a tongeni weires ach sipwe chiechiéch ngeni ekkewe ekkóch?

Ifa usun sia tongeni áppirú Jiowa me akkamwéchú ach tipeeúfengen me chienach kewe Chón Kraist? Álleani Än Salomon Fos 19:11, me mwirin pwóróusfengen wóón ei kapas eis:

• Atun emén a asongok are ka mángaw ren, met ka tongeni féri pwe kopwe efisi kinamwe?

 Fán ekkóch sia kan asonga emén. Atun a fis ena, met sipwe féri? Fichi ei VIDEO, me mwirin pwóróusfengen wóón ei kapas eis.

• Lón ewe video, met ewe Chón Kraist fefin a féri pwe epwe awora kinamwe?

 MENLAPAN

Ka tongeni álisatá tipeeúin ewe mwichefel ren óm tipemecheres le omusaaló tipis me ren óm tongei chienom kewe Chón Kraist.

Enniwili

• Ifa usun ka tongeni ttiisonuk memmeefin aapaap?

• Met kopwe féri ika oua tipefesen me emén chienom Chón Kraist?

• Pwata ka mochen áppirú án Jiowa omusaaló tipisin ekkewe ekkóch?