LESEN 53
Filatá Ekkewe Minen Apwapwa me Kunou mi Apwapwaai Jiowa
Jiowa i “ewe Kot mi pwapwa.” (1 Timoty 1:11, NW) A mochen ach sipwe pwapwa me eáni manaw mi pwapwa. A pwapwa atun sia awora fansoun le asésé seni ach angang. Lón ei lesen, sipwe ppii ifa usun sia tongeni áeá ach fansoun asésé lón ewe napanap epwe apwapwaaikich me ámenemenéchúkich me pwal apwapwaai Jiowa.
1. Met sipwe chemeni atun sipwe filatá ach minen apwapwa me kunou?
Met ka kan sani le féri lón óm fansoun asésé? Ekkóch ra sani le nónnóm chék lón imwer, állea puk, aúseling music, katol kachito, are tétá wóón Internet. Ekkóch ra sani le kukkunou ren chiechier kewe, áwewe chék ren ar ló kunou wóón chuuk, túkken, are play game. Ese lifilifil met sókkun minen apwapwa me kunou sipwe filatá, nge mi lamot sipwe túmúnú pwe ewe “Samol epwe pwapwa ren.” (Efisos 5:10) A mmen aúchea ach sipwe weweiti ena pún a chómmóng ekkewe minen apwapwa me kunou mi chéú ra masou ren ekkewe mettóch Jiowa a oput, áwewe chék ren féfférún akkachofesá, lisowumwáál, are angangen roong. (Álleani Kölfel 11:5.) Met epwe álisikich le filiéchú ach minen apwapwa me kunou?
Ika sia filatá le chiechi ngeni chókkewe mi tongei Jiowa, iwe repwe tongeni émúrinnékicheló me álisikich le kefiléch wóón ach minen apwapwa me kunou. Sia fen káé lón ewe lesen mwen ei pwe “eman mi chiechi ngeni aramas mi tipachem epwe tipachemela.” Nge ika sia kan chiechi ngeni chókkewe rese aúcheani án Kot kewe allúk, sipwe “feiengau.”—Än Salomon Fos 13:20.
2. Pwata a lamot ach sipwe aúkúkú ewe fansoun sia áeá fán iten minen apwapwa me kunou?
Inaamwo ika sia filatá ewe sókkun minen apwapwa me kunou ese wor ngawan, nge a chúen lamot ach sipwe aúkúkú ewe fansoun sia kan áeá fán itan. Ika sise, iwe eli esap naf ach fansoun le féri ekkewe mettóch mi kon lamot. Ewe Paipel a pesekich ach sipwe ‘alomota fansoun manauach.’—Álleani Efisos 5:15, 16.
KÚTTAFICHI
Ppii ifa usun kopwe kefiléch óm minen apwapwa me kunou.
3. Túmúnuk seni sókkun minen apwapwa me kunou mi ngaw
Pwata a lamot ach sipwe kefiléch ach minen apwapwa me kunou? Fichi ei VIDEO, me mwirin pwóróusfengen wóón ekkeei kapas eis.
-
Ifa usun ekkewe minen apwapwa lón Rom me lóóm ra usun ekkewe minen apwapwa lón ach ei fansoun?
-
Lón ewe video, met Danny a káé usun an minen apwapwa me kunou?
Álleani Rom 12:9, me mwirin pwóróusfengen wóón ei kapas eis:
-
Ifa usun ei wokisin epwe álisuk le filatá óm minen apwapwa me kunou?
Ikkefa ekkóch mettóch Jiowa a oput? Álleani Än Salomon Fos 6:16, 17 me Kalatia 5:19-21. Mwirin álleaan eú me eú ekkena wokisin, pwóróusfengen wóón ei kapas eis:
-
Menni lein ekkeei mettóch lón ei wokisin a terú lón ekkewe minen apwapwa me kunou lón ei fansoun?
Kapas eis epwe álisuk le kefiléch óm minen apwapwa me kunou
Pwisin eisinuk:
-
A masou ren och mettóch Jiowa a oput?
-
A atai ai fansoun le féri ekkewe mettóch mi kon lamot?
-
A efisi ai upwe kon chichchiechi ngeni chókkewe rese tongei Jiowa?
A eú minen túmún ach atowauakicheló seni feiengaw. Ina popun a lamot sipwe túmúnúkich seni ekkewe minen apwapwa me kunou sia esilla pwe epwe efeiengawakich
4. Áeáéchú óm fansoun
Fichi ei VIDEO, me mwirin pwóróusfengen wóón ei kapas eis.
-
Inaamwo ika ewe Chón Kraist mwán lón ewe video ese katol met mi limengaw, nge met an osukosuk?
Álleani Filipi 1:10, me mwirin pwóróusfengen wóón ei kapas eis:
-
Ifa usun ei wokisin epwe álisikich le filatá úkúkún ewe fansoun sipwe áeá lón ach minen kunou?
5. Filatá ekkewe minen apwapwa mi múrinné
Inaamwo ika a wor ekkóch minen apwapwa me kunou mi eletipengawa Jiowa, nge a wor chómmóng mettóch sia tongeni pwapwaitiir me ese pwal eletipengawa. Álleani Än Salomon Afalafal 8:15 me Filipi 4:8, me mwirin pwóróusfengen wóón ei kapas eis:
-
Met sókkun minen apwapwa me kunou mi múrinné ka sani?
Ka tongeni eáni ekkewe minen apwapwa me kunou mi múrinné
EKKÓCH RA ERÁ: “Ese wor ngawen ai katol kachito mi wor féfférún akkachofesá lón, lisowumwáál, are angangen roong saminne upwe féri ekkena mettóch.”
-
Met kopwe pélúwen ngeni?
MENLAPAN
Jiowa a mochen ach sipwe filatá me pwapwa ren ach eáni ekkewe minen apwapwa me kunou mi múrinné.
Enniwili
-
Met sókkun minen apwapwa me kunou a lamot án Chón Kraist repwe túmúnúúr seni?
-
Pwata a lamot ach sipwe túmúnú úkúkún ewe fansoun sia áeá lón ekkewe minen apwapwa me kunou?
-
Pwata ka mochen filatá minen apwapwa me kunou mi apwapwaai Jiowa?
PWAL EKKÓCH PWÓRÓUS
Ppii ika wisen ié an epwe fili met sókkun minen apwapwa me kunou sipwe eáni.
“Do Jehovah’s Witnesses Ban Certain Movies, Books, or Songs?” (Web article)
Ppii ifa usun ka tongeni eáni kefil mi múrinné wóón óm minen kunou me óm fansoun asésé.
“Om Minen Kunou a kan Apöchökkülok?” (Ewe Leenien Mas, October 1, 2011)
Lón ewe pwóróus itelapan “I Even Overcame My Prejudice,” ppii ika pwata emén mwán a siwili an kefil wóón an minen apwapwa me kunou.
“The Bible Changes Lives” (The Watchtower, February 1, 2010)
Katol ifa usun emén inelap a eáni kefil mi múrinné wóón ekkewe minen apwapwa mi weneiti angangen roong.
