LESEN 04
Ié ewe Kot mi Enlet?
Seni lóóm, aramas ra kan feffel ngeni chómmóng kot. Nge ewe Paipel a fósun emén Kot mi “fokun tekia seni ekewe kot meinisin.” (2 Kronika 2:5) Ié na? Me pwata a tekia seni meinisin ekkewe kot aramas ra kan feffel ngeniir? Lón ei lesen, sipwe káé met ena Kot a mochen óm kopwe silei usun i.
1. Ifa iten Kot, me pwata sia silei pwe a mochen ach sipwe silei itan na?
Kot a pwisin erenikich itan na me lón ewe Paipel. A erá: “Ngang Jiowa. Iei itei we.” (Aisea 42:8, NW) a Me ren chómmóng soukáé pwe ewe it “Jiowa” lón fósun Ipru, a wewe ngeni “A Efisi An Epwe Wiliti.” Jiowa a mochen ach sipwe silei itan we. (Ekistos 3:15) Pwata sia silei? A mak itan we lón ewe Paipel lap seni fán 7,000! b Ewe it Jiowa, ina iten ewe “wesewesen Kot lon läng pwal won fanüfan.”—Tuteronomi 4:39.
2. Met ewe Paipel a erenikich usun Jiowa?
Ewe Paipel a erá pwe Jiowa, i chék ewe Kot mi enlet me lein meinisin ekkewe kot aramas ra kan feffel ngeniir. Pwata a erá ena? A wor chómmóng popun. Án Jiowa nemenem a tekia seni meinisin, ina popun i chék “Ewe mi Unusen Tekia won unusen fanüfan.” (Álleani Kölfel 83:18.) I ewe mi “Unusen Manaman,” weween pwe a wor an manaman le féri chék met a filatá le féri. A fératá “mettoch meinisin” lón unuselapen láng me meinisin ménúmanaw wóón fénúfan. (Pwärätä 4:8, 11) Jiowa a sókkóló seni meinisin pwe a chék nónnóm seni fansoun ese pop, me epwe nóm tori feilfeiló chék.—Kölfel 90:2.
KÚTTAFICHI
Alapaaló óm káé usun sókkofesenin ekkewe itelap mi weneiti Kot seni itan we mi kkóló aúchean. Mwirin, káé ifa usun a pwáraaló itan we ngonuk, me pwata a féri ena.
3. A chómmóng ekkewe itelap mi weneiti Kot, nge a chék wor eú itan
Ren óm kopwe kúna sókkofesenin eú itelap mi weneiti emén, me pwisin itan we, fichi ei VIDEO, me mwirin pwóróusfengen wóón ei kapas eis.
-
Ifa sókkofesenin eú itelap seni eú it, áwewe chék ren ei itelap “Samol”?
Ewe Paipel a erá pwe aramas ra fel ngeni chómmóng kot me samol. Iei alon Kölfel 136:1-3, NW: “Oupwe kilisou ngeni Jiowa, pún i a múrinné. An tong enlet a nóm tori feilfeiló chék. Oupwe kilisou ngeni ewe Kot mi tekia seni ekewe kot meinisin, pún an tong enlet a nóm tori feilfeiló chék. Oupwe kilisou ngeni ewe Samol mi tekia seni ekewe samol meinisin, pún an tong enlet a nóm tori feilfeiló chék.” Iwe, pwóróusfengen wóón ei kapas eis:
-
Ié “ewe Kot mi tekia seni ekewe kot meinisin,” me “ewe Samol mi tekia seni ekewe samol meinisin”?
4. Jiowa a mochen óm kopwe silei itan we me nénnéúnéú
Met a pwári pwe Jiowa a mochen óm kopwe silei itan we? Fichi ei VIDEO, me mwirin pwóróusfengen wóón ei kapas eis.
-
Óm lúkú nge Jiowa a mochen án aramas repwe silei itan we?
Jiowa a mochen án aramas repwe nénnéúnéú itan we. Álleani Rom 10:13, mwirin pwóróusfengen wóón ekkeei kapas eis:
-
Ifa aúchean ach nénnéúnéú iten Kot we, Jiowa?
-
Met ka meefi atun emén a chemeni itom me kékkér ngonuk?
-
Óm lúkú nge met meefien Jiowa atun ka kan pappani itan we?
5. Jiowa a mochen óm kopwe chiechi ngeni
Emén fefin seni Cambodia itan Soten a erá pwe an silei iten Kot we, a efisi an epwe eáni ewe esin pwapwa ese wor táppin. Fichi ei VIDEO, me mwirin pwóróusfengen wóón ei kapas eis.
-
Lón ewe video, ifa usun án Soten silei iten Kot we a achchúngú manawan?
Me mwen óm kopwe chiechi ngeni emén, ka kan akkomw silei itan. Álleani James 4:8a, me mwirin pwóróusfengen wóón ekkeei kapas eis:
-
Met Jiowa a etiwok óm kopwe féri?
-
Ifa usun óm silei me nénnéúnéú iten Kot we a álisuk le chiechiéch ngeni?
EKKÓCH RA ERÁ: “A chék wor emén Kot, ina popun ese pwal lifilifil met sipwe kér ngeni.”
-
En mi lúkú pwe iten Kot, Jiowa?
-
Ifa usun kopwe áweweei pwe Kot a mochen ach sipwe nénnéúnéú itan we?
MENLAPAN
Jiowa, ina iten ewe emén chék Kot mi enlet. A mochen ach sipwe silei itan na, me nénnéúnéú pwe sipwe tongeni chiechiéch ngeni.
Enniwili
-
Met a asókkalóói Jiowa seni meinisin ekkewe kot aramas ra kan feffel ngeniir?
-
Pwata a lamot ach sipwe nénnéúnéú iten Kot we?
-
Met a pwári pwe Jiowa a mochen óm kopwe chiechiéch ngeni?
PWAL EKKÓCH PWÓRÓUS
Káé nimu pisekin ánnet mi ánnetatá pwe a wor Kot.
Káé popun a pwúng ach sipwe lúkú pwe Kot a chék nónnóm seni fansoun ese pop.
Káé pwata a lamot ach sipwe nénnéúnéú iten Kot we inaamwo ika sise silei ifa usun chón lóóm ra ánewenewa.
Mi pwal lamot ach sipwe silei met sipwe kér ngeni Kot? Ppii ewe popun sia tongeni erá pwe mi pwisin wor eú itan.
a Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”
b Ren pwal ekkóch pwóróus usun weween iten Kot we me ewe popun ekkóch chiyakúún Paipel ra télawu, ppii kinikin nampa 1 lón ewe puk itelapan, Minen Álillis fán Iten Káéén Paipel.
