Satan me néún kewe chónláng mi ngaw, ra kirikiringaw chék seni lóóm. Lón fansoun ewe mwán mi tuppwél Hiop, Satan a nieló néún Hiop kewe man me chón angang. Mwirin, a pwal nieló néún Hiop kewe engol ren an efisi “och asepwäl mi pöchökül” mi ataieló ewe imw ra nóm lón. Mwirin ena, Satan a esemweni Hiop ren och “kilingau o rup seni fän pechen tori won möküran.”​—Hiop 1:7-19; 2:7.

Lón fansoun Jesus we, ekkewe chónláng mi ngaw are timon ra efisi án ekkóch aramas repwe chunuló me awemwéch. (Mateus 9:32, 33; 12:22) * Ra eriáfféwú emén mwán me efisi an epwe ekinasa inisin ngeni ekkewe faú. (Markus 5:5) Ra pwal efisi án emén át epwe púchérútá me ra “aturätiu lepwül o achecha.”​—Lukas 9:42.

Lón ei fansoun, Satan me ekkewe chónláng mi ngaw ra chúen chón ninni aramas. Ren enletin, ar féffér mi ngaw a fen lapóló seni ewe atun ra kóturutiw me láng. Ekkewe pwóróus seni sókkópaten fénú ra pwáraatá usun  ar kirikiringaw. Ra eriáfféwú ekkóch aramas ren ar esemmweniir. Ren pwal ekkóch, ra aosukosuka aramas lepwin ren ar efisi ar resap tongeni méúr are repwe eáni ttan mi fókkun eniweniw. Ra pwal kirikiringaw ngeni aramas ren ar pwúlúweniir. Ra pwal efisi án aramas repwe umwesiló, me eriániir ar repwe nieló aramas, are pwisin nireló.

Lintina, ewe a nóm lón Suriname, a apwóróusa usun án emén chónláng mi ngaw nieló engol me wonomén chón an we famili me eriáfféwú inisin me oumwesaaló ekiekin lón úkúkún 18 ier. Seni met Lintina a kúna, a erá pwe ekkewe chónláng mi ngaw “ra pwapwaiti le eriáfféwú ekkewe aramas tori ar máló.”

Nge Jiowa a tongeni túmúnú néún kewe chón angang seni án Satan sótun efeiengawer.​—Än Salomon Fos 18:10.