A wor emén néún Isipel nengngin itan Atalia, me a fókkun ngaw ussun chék inan na. Atalia a pwúlúweni ewe kingen Juta. Atun pwúlúwan we a máló, néún we át a poputá le nemenem. Nge atun néún we át a máló, Atalia a pwisin seikaatá an epwe wisen nemenem lón Juta. Mwirin, a sótun arosaaló mwirimwirin ewe king meinisin, pwal mwo nge pwisin néún néún kewe, pwe esap wor emén epwe tongeni seikitá ngeni king me angei seni nemenian. Meinisin ra niwokkusiti.

Ewe souasor mi lapalap itan Jehoiata me pwúlúwan we itan Jehosepa, ra silei pwe met Atalia a féri a fókkun ngaw. Ra pennúkú manawer ren ar opaaló néún néún Atalia we, emén ménúkol itan Joas. Ra ámáári lón ewe imwenfel.

Atun a fisu ierin Joas, Jehoiata a ochufengenni meinisin ekkewe souemmwen me chón Lifai me a ereniir: ‘Oupwe mammasa asamalapen ewe imwenfel, me ousap mut ngeni emén an epwe tolong.’ Mwirin Jehoiata a seikaatá Joas an epwe kingen Juta me a ámwárámwára ngeni epa mwárin king. Ekkewe aramasen Juta ra kékké le erá: ‘Ewe king epwe manawattam!’

Kiwin Atalia a rong léúwommóngun ewe mwichen aramas me a mwittir feiló ren ewe imwenfel. Atun a kúna ewe mineféén king, a léúwommóng le kechiw me erá: ‘A fis rawangaw! A fis rawangaw!’ Ekkewe souemmwen ra turufi ena kiwin mi ngaw, ra atowu, me nieló. Nge ifa ussun ren ewe leenien áppirú mi ngaw a isettiw ngeni ewe mwú?

Jehoiata a álisi ewe mwú le féri eú pwonen etipeeú ngeni Jiowa ren ar repwe fel ngeni i chék. Jehoiata a  ereniir ar repwe atai ewe imwenfelin Paal me atatakkisi ekkewe uluulun. A ewisa ekkewe souasor me chón Lifai ar repwe angang lón ewe imwenfel pwe ekkewe aramas repwe férsefáli ar fel ikena. A ewisa chón mmasa ewe imwenfel pwe esap wor emén mi féfféringaw epwe tolong. Mwirin Jehoiata me ekkewe souemmwen ra uwei Joas ngeni ewe imwen king me ammótta wóón ewe móótun king. Ekkewe aramasen Juta ra fókkun pwapwa. Ra tongeni fel ngeni Jiowa, me ra kerán ngase seni Atalia ewe mi ngaw me ar fel ngeni Paal. Ka kúna ifa ussun án Jehoiata pwora a álisi chómmóng aramas?