Moses a pwon ngeni Farao pwe esap chúen chuursefáli. Nge me mwen Moses epwe ló seni Farao, a ereni: ‘Lukenipwin, meinisin ekkewe mwánichi lón Isip, seni noum mwánichi tori néún noum kewe slave mwánichi, repwe máló.’

Jiowa a ereni ekkewe chón Israel ar repwe féri och mwéngé mi kkóló aúchean. A erá: ‘Oupwe nieló emén átemwánnin siip are siike eú ierin me oupwe angei och seni chchaan me télú ngeni ppen asamen imwemi. Oupwe kuku ewe futuk me mwéngé ngeni pilawa ese wor iis lón. Oupwe úféúf me néúnéúlong néúmi suus pwe oupwe mmólnetá le feiló, pwe lón ei pwinin úpwe angasakemiiló.’ Ka tongeni anchangei úkúúkún mwétéresin ekkewe chón Israel?

Atun a lukenipwin, néún Jiowa we chónláng a ló ngeni eú me eú imw lón Isip. Ekkewe mwánichi lón ekkewe imw ese wor chcha wóón ppen asamer, ra máló, nge ekkewe imw mi wor chcha wóón a pássiniir. Meinisin ekkewe famili lón Isip a má seniir néúr, ese lifilifil iká iir mi pisekisek are osupwang. Nge esap mwo nge emén néún ekkewe chón Israel a máló.

Pwal mwo nge néún Farao we át a máló. Farao ese chúen tongeni likiitú ngeni, iwe mwittir chék a ereni  Moses me Aaron: ‘Oupwe towu seni ikeei. Oupwe feiló me fel ngeni ámi na Kot. Oupwe angei néúmi kewe man me feiló!’

A unus ewe maram atun ekkewe chón Israel ra fetálewu seni Isip me ra nóm lón en me tettelin an famili me einang. A wor úkúúkún 600,000 chón Israel mwán me chómmóng fefin me semirit. Me pwal ekkóch aramas ra fitiir pwe repwe pwal tongeni fel ngeni Jiowa. Akkarap nge ra kerán ngaseló ekkewe chón Israel!

Ren ar repwe chechchemeni ifa ussun Jiowa a angasereló, ra kan féri ewe mwéngé mi kkóló aúchean iteiten ier, ewe a iteni Pasofer.