Lap seni 400 ier me mwirin kaúsefáliin ttitin Jerusalem, emén souasor itan Sekaraia me pwúlúwan we Elisapet, ra nóm kkan ngeni ena telinimw. A fen fite ier mwirin ar pwúpwúlú nge rese néúnéú. Eú rán atun Sekaraia a tolong lón ewe imwenfel pwe epwe eáni ewe asoren appach mi pwokkus, ewe chónláng itan Kapriel a pwá ngeni. Sekaraia a fókkun niwokkus, nge Kapriel a ereni: ‘Kosap niwokkus. Úa uweato kapas allim me ren Jiowa. Pwúlúwom we, Elisapet, epwe néúni emén át nge epwe iteni Jon. Jiowa a filaatá Jon an epwe féri eú angang mi aúchea.’ Sekaraia a eisini: ‘Ifa ussun ái úpwe tongeni lúkuk? Ám me pwúlúwei we áúa chinnap.’ Kapriel a apasa: ‘Úa tiitiito me ren Kot pwe úpwe esile ngonuk ei pwóróus. Nge pokiten kese lúkúei, kosap chúen tongeni kapas tori mwirin án ewe ménúkol uputiw.’

A kerán ina án Sekaraia epwe mmangowu me lón ewe imwenfel. Iwe, atun chék a towu, ekkewe aramas mi witiwit lúkún ra mochen silei met a fis. Sekaraia ese tongeni fós. A chék tongeni pwoomw ngeniir wóón péún. Iwe, ekkewe aramas ra esilla pwe a wor pwóróus Sekaraia a angei me ren Kot.

Mwirin ekis fansoun, Elisapet a pwopwo me a néúnatiw emén ménúkol át, ussun chék met ewe chónláng a apasa. Chienan kewe me aramasan ra etto pwe repwe katol ewe ménúkol. Ra fiti neminna le pwapwa. Elisapet a erá: ‘Epwe iteni Jon.’ Ra erá: ‘Ese wor emén lón óm famili a iteni Jon. Kopwe eita ngeni Sekaraia pwe epwe iteit seni seman.’ Nge iei met Sekaraia a makkeetiw: ‘Itan Jon.’ Lón ena atun, Sekaraia a tongeni kapassefál! Pwóróusen ewe semirit a chéúfetál lón unusen Jutia, me ekkewe aramas ra ekieki: ‘Epwe met ei kúkkún semirit epwe wiliiti iká a mááritá?’

Mwirin Sekaraia a ur ren ngún mi fel. A osuni: ‘Sipwe mwareiti Jiowa. A pwon ngeni Eperiam pwe i epwe  tiinaato emén chón amanaw, ewe Messaia, pwe epwe selánikich. Jon epwe emén soufós, me i epwe ammólnatá alen ewe Messaia.’

A pwal wor och mettóch mi kkóló aúchean a fis ngeni aramasen Elisapet we Meri. Sipwe ppii met ena a fis lón en sópwun mwirin ei.