Jiowa a filaatá Jeremaia an epwe emén soufós pwe epwe álisi chón Juta. A ereni an epwe afalafal ngeni ekkewe aramas me éúréúrer ar repwe úkútiw le féri met mi ngaw. Jeremaia a erá: ‘Jiowa, ngang emén mi chék ier kúkkún.’ Jiowa a ereni: ‘Kosap niwokkus pún ngang úpwe etuk, nge kopwe apasa meinisin minne úa akúné ngonuk.’

Jiowa a ereni Jeremaia pwe epwe ochufengenni ekkewe souakomw, amékkú eú leenien konik mwen meser, me mwirin ereniir: ‘Jerusalem epwe tatakkis ussun chék ei leenien konik.’ Atun Jeremaia a féri met Jiowa a ereni, ekkewe chinnap ra fókkun song. Emén souasor itan Pasur a awata Jeremaia me ékkúkaaló pechen lefilen ekkewe irá. Lón unusen ewe pwinin, Jeremaia ese tongeni mwékút. Sorotáán ewe rán, Pasur a epichaaló. Jeremaia a erá: ‘Úse chúen tongeni likiitú. Úpwele úkútiw le afalafal.’ A wesewesen fangetá? Aapw. Pokiten atun a ekieki ussun Jiowa, a erá: ‘Án Jiowa kapas a ussun ekkei mi kkú me lón lelukei. Úsapw tongeni úkútiw le afalafal.’ Jeremaia a sópweeló le éúréúra ekkewe aramas.

Fitu ier a ló, a wor emén mineféén king lón Juta. Ekkewe souasor me ekkewe soufós chofona ra oputa ewe pwóróus Jeremaia a esilei. Ra ereni ekkewe samol: ‘Ei mwán a fich ngeni an epwe máló.’ Jeremaia a erá: ‘Iká oua nieiló, oua nieló emén aramas ese wor tipisin. Met úa apasa, ina alon Jiowa nge esap aloi.’ Atun ekkewe samol ra rong ena, ra erá: ‘Ese fich ngeni ei mwán an epwe máló.’

Jeremaia a sópweeló le afalafal me ekkewe samol ra fókkun song.  Ra tingorei ewe king an epwe nieló Jeremaia. Ewe king a erá pwe ra tongeni féri met chék ra mochen ngeni Jeremaia. Ra angei Jeremaia me oturaalong lón eú pwaang mi alóllóól me pwakak pokiten ra mochen epwe máló me lón. Jeremaia a poputá le kokotiw lón ewe pwakak.

Mwirin emén néúwis itan Epet-melek a ereni ewe king: ‘Ekkewe samol ra oturaalong Jeremaia lón eú pwaang! Iká sa likitaaló ikena, epwe máló.’ Ewe king a ereni Epet-melek an epwe angei 30 mwán me feiló efiewu Jeremaia me lón ewe pwaang. Sipwe ussun Jeremaia me sisap mut ngeni och mettóch an epwe aúkúkichetiw le afalafal.