Jiowa a Kot a féri ewe áeúin pwúpwúlú. Ewe Paipel a apasa ngenikich pwe a féri ewe áeménún fefin me “uwato” ngeni ewe mwán. Atam a fókkun pwapwa ina popun a apasa: “Iei chün chüi, nge fitukan fitukei.” (Keneses 2:22, 23) Jiowa a chúen mochen pwe ekkewe mi pwúpwúlú repwe pwapwa. Lón ei puk, pwúpwúlú a wewe ngeni pwúpwúlú mi rechister.

Atun ka pwúpwúlú, neman ka ekieki pwe mettóch meinisin repwe fisiéch. Nge ren enletin, eú pwúpwúlú mi wesewesen tongfengen epwe pwal mwo nge wor ekkóch osukosuk repwe fis lefiler. (1 Korint 7:28) Lón ei puk, kopwe kúna pwe ika án Paipel kewe kapasen emmwen repwe pwénúetá, iwe óm pwúpwúlú me óm famili epwe pwapwa.​—Kölfel 19:8-11.

MET EWE PAIPEL A APASA: “Mwän möküren pwülüan.” —Efisos 5:23.

Ika en emén mwán mi pwúpwúlú, Jiowa a kútta sonuk óm kopwe túmúnúéchú pwúlúwom fán tóng. (1 Petrus 3:7) Kot a féri ewe fefin pwe epwe emén mi pélúwéch ngonuk me a mochen kopwe aúcheani me tongei. (Keneses 2:18) Kopwe fókkun echeni pwúlúwom pwe kopwe tipemecheres le akkomwa minne epwe échiti lap seni pwisin mochenum.​—Efisos 5:25-29.

Ika en emén fin pwúpwúlú, Jiowa a kútta sonuk óm kopwe fókkun súféliti pwúlúwom we me álisi i le apwénúetá wisan. (1 Korint 11:3; Efisos 5:33) Kopwe álisatá minne a eáni kefil me álisi seni enletin letipom. (Kolose 3:18) Ika kopwe féri ena, kopwe liéch me ren pwúlúwom me pwal mwen mesen Jiowa.​—1 Petrus 3:1-6.

MINNE KA TONGENI FÉRI:

• Eisini pwúlúwom ika ifa usun kopwe wiliti emén mwán pwúpwúlú are fin pwúpwúlú mi múrinné. Aúselingéch meefian me féri úkúkún óm tufich pwe kopwe amúrinnékóló

• Kopwe mosonottam. A lamot fansoun pwe oupwe tongeni káé ifa usun oupwe tongeni apwapwaai emén me emén lefilemi

MET EWE PAIPEL A APASA: “Ousap chök ekieki en me an feiöch, nge oupwe pwal ekieki feiöchün chienemi.” (Filipi 2:4) Kopwe pwáraatá pwe ka aúcheani pwúlúwom, me chechchemeni pwe Jiowa a kútta seni néún kewe aramas ar repwe “kirikiröch ngeni aramas meinisin.” (2 Timoty 2:24) Iei alon Paipel: “Kapas ka chok oturau nge kose mo ekieki, a fakkun anonnon kinasan ussun posun efoch ketinas, nge kapasen mirit mi touu a tongeni echikara.” Ina popun túmúnúéchú minne ka eáni fós. (Än Salomon Fos 12:18, Kapasen God) Án Jiowa we manaman mi fel epwe álisuk le eáni fós mi kirekiréch me tong.​—Kalatia 5:22, 23; Kolose 4:6.

MINNE KA TONGENI FÉRI:

• Tingor álillis seni Kot pwe kosap song me eáni ekiek mi múrinné me mwan oupwe pwóróusfengen me pwúlúwom usun mettóch mi weires

• Ekiekiéchú minne kopwe apasa me napanapen óm kapas

MET EWE PAIPEL A APASA: Atun ka pwúpwúlú, ka wiliti “eu chok fituk” me pwúlúwom we. (Mateus 19:5, Testament Mi Fö) Nge ámi me rúúemén, oua chúen rúúemén aramas me neman a sókkóló met oua eáni ekiek. Ina popun, a lamot oupwe káé le etipeeúfengeni minne oua eáni ekiek me memmeef. (Filipi 2:2) A lamot tipeeú atun oua féri kefil. Iei met Paipel a apasa: “Ren pwúngúpwúngfengen, kókkót epwe sópwéch.” (Än Salomon Fos 20:18, New World Translation) Mut ngeni án Paipel kewe kapasen emmwen epwe álisikemi le pwúngúpwúngfengen wóón kefil mi lamot.​—Än Salomon Fos 8:32, 33.

MINNE KA TONGENI FÉRI:

• Kopwe pwár ngeni pwúlúwom met ka meefi nge esap chék met ka silei are met ka ekieki

• Pwúngúpwúng ngeni pwúlúwom me mwen kopwe akkóta le féri och mettóch