Kot a mochen pwe aramas repwe pwapwaiti manaw wóón fénúfan. A fératá ewe fénúfan me masouan kewe pokiten a tongei aramas. Ekiseló, epwele mwékút le awora manaw mi múrinné fán iten mwachkkan ngeni aramas ekis meinisin. Epwe angasaaló aramas seni ekkewe mettóch ra riáfféú rer.​—Álleani Jeremaia 29:11.

Ese wor mwúún aramas a sópwéch le amóeló mwánesol, samau, are máló. Nge, mi wor pwóróus allim pun ekiseló chék, Kot epwe wato mwúún we pwe epwe siwili meinisin mwúún fénúfan. Meinisin mi nonnom fán mwúún Kot we repwe pwapwaiti kinamwe me péchékkúlen inis.​—Álleani Aisea 25:8; 33:24; Taniel 2:44.

Epwe chék wesiló riáfféú atun Kot epwe limetawu aramas mi ngaw seni fénúfan. (Sefanaia 2:3) Ineet epwe fis ena? Án Kot we Kapas a oesini usun ekkewe mettóch mi efeiengawa aramas iei. Met a fiffis lón ei fansoun, a ánnetatá pwe Kot epwele mwékút.​—Álleani 2 Timoty 3:1-5.

Mi lamot sipwe káé usun Kot seni an we Kapas, ewe Paipel. Ena Paipel a usun néúch taropwe me ren emén sam mi tong. A erenikich ifa usun sipwe pwapwaiti manaw mi múrinné iei, me ifa usun sipwe pwapwaiti manaw esemuch wóón fénúfan lón mwachkkan. Ewer, eli ekkóch resap sani om akkangei álillis le weweiti ewe Paipel. Nge Kot a pwonei pwe sia tongeni eáni manaw mi múrinné lón mwachkkan, iwe, sisap mut ngeni ekkóch repwe eppetikich le káé ewe Paipel.​—Álleani Än Salomon Fos 29:25; Pwärätä 14:6, 7. *