Kot a etiwa sókkópaten aramas meinisin le arap ngeni lón iótek. (Kölfel 65:2) Nge, ese aúseling are etiwa iótek meinisin. Áwewe chék, ika emén mwán a áweiresi pwúlúwan we, Kot esap etiwa an kewe iótek. (1 Petrus 3:7) Pwal eú, atun ekkewe chón Israel rese úkútiw seni ar féfféringaw, Kot ese aúseling ar kewe iótek. A ffat pwe ach tufichin iótek, ina ewe mettóch mi aúchea. Iwe nge, Kot epwe etiwa pwal mwo nge iótekin chókkewe mi féri tipis mi chou, ika ra aier.​—Álleani Aisea 1:15; 55:7.

Iótek, ina kinikinin ach fel, ina popun sipwe iótek ngeni Jiowa chék, ewe Chón Férikich. (Mateus 4:10; 6:9) Pwal eú, pokiten sise unuséch, mi lamot sipwe iótek lón iten Jesus pokiten a máló fán iten ach tipis. (Johannes 14:6) Jiowa ese mochen ach sipwe epinipini ekkewe iótek sia akkamwéchúúr are ekkewe iótek mi fen makketiw. A mochen sipwe iótek seni letipach.​—Álleani Mateus 6:7, TF; Filipi 4:6, 7.

Ewe Chón Férikich a pwal mwo nge tongeni aúseling ekkewe iótek sise apasawu. (1 Samuel 1:12, 13) A etiwakich ach sipwe iótek fansoun meinisin, áwewe chék atun sia kerán leno, are mwen sipwe méúr lepwin, atun sipwe mwéngé, me atun sia kúna osukosuk.​—Álleani Kölfel 55:22; Mateus 15:36.

Ach arap ngeni Kot ese mecheres pokiten sia nonnom lein ekkewe aramas rese lúkú Kot me ra esiita an we pwon usun kinamwe  wóón fénúfan. (2 Timoty 3:1, 4; 2 Petrus 3:3, 13) Ina popun, a lamot ngenikich ewe chiechi seni chienach kewe chón lúkú pwe epwe apéchékkúlakich, me a pwal lamot ngeniir ena sókkun chiechi.​—Álleani Ipru 10:24, 25.

Ach chiechi ngeni chókkewe mi tongei Kot a álisikich le arap ngeni i. Án ekkewe Chón Pwáraatá Jiowa kewe mwich ra atufichikich le kúna álillis seni án chienach kewe lúkú.​—Álleani Rom 1:12.

Ka tongeni chiechi ngeni Jiowa ren om ekilonei met ekkewe ka fen káé seni an we Kapas. Ekieki usun féfférún kewe, an kewe kapasen fén, me an kewe pwon. Ekilon fán iótek a alapaaló ach aúcheani lón letipach án Kot tong me tipachem.​—Álleani Josua 1:8; Kölfel 1:1-3.

Ka tongeni arap ngeni Kot ika kopwe chék lúkúlúk wóón i. Lúkú a tongeni wewe ngeni efóch irá. Usun chék efóch irá mi lamot kopwe achéchénú iteitan, iwe, a pwal ina usun lamoten om kopwe “achéchénú” are apéchékkúla om lúkú ren om ekilonei popun om kewe lúkú.​—Álleani Mateus 4:4; Ipru 11:1, 6.

Jiowa a tongei chókkewe mi tongei i. A tongeni túmúnú seniir ekkewe mettóch mi tongeni atai ar lúkú me ar ápilúkúlúkún manaw esemuch. (Kölfel 91:1, 2, 7-10) A éúréúrakich usun ekkewe sókkun manaw mi tongeni atai péchékkúlen inisich me ach pwapwa. Jiowa a áitingenikich ewe manaw mi múrinné seni meinisin.​—Álleani Kölfel 73:27, 28; James 4:4, 8.